କନକ ବ୍ୟୁରୋ : ମୋବାଇଲ ଧରିଲେ ପ୍ରଜାକୋର୍ଟରେ ମିଳିବ ମୃତ୍ୟୁଦଣ୍ଡ । ଯଦି କଥାବାର୍ତ୍ତା ପାଇଁ ମୋବାଇଲ ଆବଶ୍ୟକ ପଡ଼ୁଛି ତେବେ ଅନୁମତି ନେବାକୁ ପଡ଼ିବ । ଏହି ଆଦେଶକୁ ଅମାନ୍ୟ କଲେ ନିଜ ଜୀବନ ପାଇଁ ନିଜେ ଦାୟୀ ରହିବ । ମାଲକାନଗିରି ଜିଲ୍ଲା ବିଚ୍ଛିନ୍ନାଞ୍ଚଳରେ ଏମିତି ଅଜବ ଫତୱା ଜାରି କରିଛନ୍ତି ନକ୍ସଲ । ଏପରିକି ବାହାରୁ ଯାଉଥିବା ଲୋକଙ୍କ ପାଇଁ ବି ନୋଟିସ୍ ବୋର୍ଡରେ ଏହି କଥା ଲେଖି ଚେତାଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଗାଁ ଗହଳିରେ ମୋବାଇଲ ନେଟୱର୍କ ପହଞ୍ଚିବା ପରେ ମଣିଷ ପାଇଁ ଗୋଟିଏ ଅଙ୍ଗ ପାଲଟି ଯାଇଛି ମୋବାଇଲ ଫୋନ । ହେଲେ ମାଲକାନଗିରି ଜିଲ୍ଲା ବିଚ୍ଛିନ୍ନାଞ୍ଚଳରେ ମୋବାଇଲ ଫୋନ ଲୋକଙ୍କ ପାଇଁ ଅଭିଶାପ ସଦୃଶ ହୋଇଛି । ବିଚ୍ଛିନ୍ନାଞ୍ଚଳର ଅଣ୍ଡ୍ରାପାଲୀ ପଞ୍ଚାୟତର ଅରାପଦର ଗ୍ରାମରେ ନକ୍ସଲମାନେ ଗୋଟିଏ ନୋଟିସ୍ ବୋର୍ଡ ଲଗାଇଛନ୍ତି । ସେଥିରେ ମୋବାଇଲ ବ୍ୟବହାରକୁ ବାରଣ କରାଯାଇଛି । ଯଦି କେହି ବ୍ୟବହାର କରିବାକୁ ଚାହୁଁଛନ୍ତି; ତେବେ ଅନୁମତି ଦେବାକୁ ନିର୍ଦେଶ ଦେଇଛନ୍ତି। ଏନେଇ ଗ୍ରାମବାସୀଙ୍କୁ ପଚାରିବାରୁ ପ୍ରଥମେ ମୁହଁ ଖୋଲି ନଥିଲେ ।
ଶେଷରେ ସେମାନେ ଆଶଙ୍କା ମଧ୍ୟରେ ରହି ଏଭଳି ଫତୱାକୁ ସ୍ବୀକାର କରିଥିଲେ। ଇଚ୍ଛା ଥିଲେ ମଧ୍ୟ ସେମାନେ ମୋବାଇଲ ଧରୁନଥିବା କହିଥିଲେ। ଯଦି ଭୁଲ ବଶତଃ କେହି ମୋବାଇଲ ଧରନ୍ତି; ତେବେ ନକ୍ସଲଙ୍କ ନିକଟକୁ ଏ ଖବର ଚାଲିଯାଏ । ପରେ ପ୍ରଜାକୋର୍ଟରେ ଏଥିପାଇଁ ଦଣ୍ଡ ଦିଆଯାଏ। କେବଳ ଏହି ଗୋଟିଏ ଗାଁ ନୁହେଁ, ବିଚ୍ଛିନ୍ନାଞ୍ଚଳର ପ୍ରାୟ ସବୁ ଗ୍ରାମରେ ଏକା ଅବସ୍ଥା । ମୋବାଇଲ ଧରୁଥିବା ଲୋକଙ୍କ ଉପରେ ନକ୍ସଲ ସନ୍ଦେହ କରିବା ସହ ପୁଲିସ ଇନଫର୍ମର ଆଖ୍ୟା ଦେଇଥାନ୍ତି ।