ମହିଳା ବିଲ୍ ପାଇଁ ତତ୍ପରତା ! ମୋଦିଙ୍କ ପରେ ସବୁ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିଲେ ନବୀନ

କନକ ବ୍ୟୁରୋ : ସଂସଦ ଓ ବିଧାନସଭାରେ ମହିଳାଙ୍କ ପାଇଁ ଏକ ତୃତୀୟାଂଶ ଆସନ ସଂରକ୍ଷଣ ପାଇଁ ବିଜେଡି ସୁପ୍ରିମୋ ଆଜି ସବୁ ରାଜ୍ୟ ଓ କେନ୍ଦ୍ର ଶାସିତ ଅଂଚଳର ମୁଖ୍ୟମନ୍ତ୍ରୀଙ୍କ ସହଯୋଗ ଲୋଡ଼ି ଚିଠି ଲେଖିଛନ୍ତି । ବିଲ୍ ପାରିତ କରିବା ପାଇଁ ଅଣ୍ଟା ଭିଡିଛନ୍ତି ନବୀନ ପଟ୍ଟନାୟକ । ଦେଶ ଓ ସମାଜ ଗଠନରେ ମିହିଳାଙ୍କ ଗୁରୁତ୍ୱପୂର୍ଣ୍ଣ ଭୂମିକା ରହିଛି । ମହିଳାମାନେ ଶସକ୍ତ ହେଲେ ଦେଶ ସଶକ୍ତ ହେବ । ବିକାଶ ପ୍ରକ୍ରିିୟା ମଧ୍ୟ ତ୍ୱରାନ୍ୱିତ ହେବ । ଲୋକ ସଂଖ୍ୟାର ଅଧା ହେଉଛନ୍ତି ମହିଳା । ତେଣୁ ବିକାଶ ଦିଗରେ ତଥା ଗଣତନ୍ତ୍ରକୁ ଅଧିକ ସୁଦୃଢ଼ କରିବାରେ ତାଙ୍କର ନିଷ୍ପତି ଗୁରୁତ୍ୱପୂର୍ଣ୍ଣ । ଆମ ସମ୍ବିଧାନ ଲିଙ୍ଗଗତ ମତଭେଦକୁ ଦୂର କରିବା ପାଇଁ ଗୁରୁତ୍ୱ ଦେଉଛି । ଏଥିିପାଇଁ ଆମେ ଅଧିକ ସଚେତନ ହେବା ଜରୁରୀ ।

ଅନ୍ୟପଟେ ମହିଳାମାନେ ସଶକ୍ତ ନହେଲେ ପରିବାର, ସମାଜ ଓ ରାଜ୍ୟର ଅଗ୍ରଗତି ହୋଇପାରିବ ନାହିିଁ । ଏହି ଉଦ୍ୟମରେ ମୁଖ୍ୟମନ୍ତ୍ରୀ ମାନଙ୍କର ସହଯୋଗ ନିହାତି ଜରୁରୀ ବୋଲି ଚିଠିରେ ଉଲ୍ଲେଖ କରିଛନ୍ତ ମୁଖ୍ୟମନ୍ତ୍ରୀ । ମୁଖ୍ୟମନ୍ତ୍ରୀମାନେ ସହଯୋଗ କଲେ ମହିଳା ସଶକ୍ତିକରଣ ପାଇଁ ଏକ ନୂତନ ଦିଗ ଦେଖାଇବ ବୋଲି ମଧ୍ୟ ସେ ଚିଠିରେ ଉଲ୍ଲେଖ କରିଛନ୍ତି ।

ଏହାସହ ସେ ପତ୍ରରେ ଲେଖିଛନ୍ତି ୧୯୯୦ରେ ବିଜୁ ପଟ୍ଟନାୟକ ସାରା ଦେଶରେ ମହିଳାଙ୍କ ପାଇଁ ବିଭିନ୍ନ ପଂଚାୟତ, ପୌର ପରିଷଦ ସମେତ ସରକାରୀ ଚାକରିରେ ୩୩ ପ୍ରତିଶ ସଂରକ୍ଷଣ ଆରମ୍ଭ କରିଥିଲେ। ଆଉ ତାଙ୍କର ଏହି ପଦକ୍ଷେପ ଅତ୍ୟନ୍ତ ପ୍ରଭାବଶାଳୀ ହୋଇପାରିଥିଲା । ଏହି ସଫଳତାକୁ ଦୃଷ୍ଟିରେ ରଖି ୨୦୧୧ରେ ବିଜେଡ଼ି ସରକାର ମହିଳାଙ୍କ ପଂଚାୟତ ଓ ପୌର ପରିଷଦର ସ୍ଥାନ ସଂରକ୍ଷଣକୁ ୫୦ ପ୍ରତିଶତ ବୃଦ୍ଧ କରିଥିଲା । ତେଣୁ ଏ ଉଦ୍ୟମ ଜାରି ରହିବା ଆବଶ୍ୟକ ।

image courtesy-http://newsmobile.in

ଏହି ବିଲ୍ ପାଇଁ ନବୀନ ପଟ୍ଟନାୟକ ବିଧାନସଭାର ଶୀତକାଳୀନ ଅଧିବେଶନରେ ସଂକଳ୍ପ ଆଣିଥିଲେ । ସଂକଳ୍ପକୁ ସାକାର ତଥା ଜୋରଦାର କରିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସହଯୋଗ ଲୋଡିଥିଲେ ବୋଲି ମୁଖ୍ୟମନ୍ତ୍ରୀ ଚିଠିରେ ଉଲ୍ଲେଖ କରିଛନ୍ତି । ସୂଚନାଯୋଗ୍ୟ ମହିଳା ବିଲ୍ ପାସ ପାଇଁ ସମର୍ଥନ ଉଦ୍ୟମ ଆରମ୍ଭ କରିଛି ବିଜେଡି । ଏନେଇ ଏକ କମିଟି ଗଠନ କରିଛି ବିଜେଡି । ଏହି କମିଟିରେ ବିଜେଡିର ବିଧାୟକ,ସାଂସଦ ଓ ମନ୍ତ୍ରୀ ରହିଛନ୍ତି ।