ମୋଦି ଓ ଜିନପିଙ୍ଗଙ୍କ ବନ୍ଧୁତାରେ ଆଶ୍ଚର୍ଯ୍ୟ ହେଲା ପୁରା ବିଶ୍ୱ ! ଚୀନରେ କିପରି ହୋଇଥିଲା ମୋଦିଙ୍କ ସ୍ୱାଗତ, ପଢ଼ନ୍ତୁ ଟିକିନିକି ତଥ୍ୟ
କନକ ବ୍ୟୁରୋ : ମୋଦି ଓ ଜିନ୍ ପିଙ୍ଗ ମଧ୍ୟରେ ଶିଖର ବୈଠକ ଯେମିତି ଅନୌପଚାରିକ ଥିଲା ସେମିତି ସେମାନଙ୍କ ଆଲୋଚନା ଓ କାର୍ଯ୍ୟଶୈଳୀ ବି ଥିଲା ନିଆରା । ଉହାନ ସହରର ଇଷ୍ଟ ଲେକ୍ କୂଳରେ ଦୁଇ ନେତା କରିଥିବା ଭ୍ରମଣ ବେଳର ଦୃଶ୍ୟକୁ ଦେଖି ବେଶ୍ ଆଶ୍ଚର୍ଯ୍ୟ ହୋଇଥିଲା ସାରା ବିଶ୍ୱ ।
Kanak News is now on WhatsApp
Join and get latest news updates delivered to you via WhatsApp
ଦୁଇ ଦିନିଆ ଚୀନ ଗସ୍ତରେ ଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ କାରକେଡ, ଯେତେବେଳେ ଉହାନ ସହରର ଇଷ୍ଟ ଲେକ ନିକଟରେ ପହଂଚିଥିଲା ଏହାର ବହୁ ପୂର୍ବରୁ ତାଙ୍କୁ ସ୍ୱାଗତ କରିବା ପାଇଁ ସେଠାରେ ପହଂଚିସାରିଥିଲେ ରାଷ୍ଟ୍ରପତି ସି ଜିନପିଙ୍ଗ । ଆଉ ଚୀନ ରାଷ୍ଟ୍ରପତି, ମୋଦିଙ୍କୁ ପାଛୋଟି ନେବାବେଳେ ଯେଉଁ ବନ୍ଧୁତ୍ୱପୂର୍ଣ୍ଣ ପରିବେଶ ସୃଷ୍ଟି ହୋଇଥିଲା ତାହା ବାର୍ତ୍ତା ଦେଉଥିଲା ଯେ, ଦୁଇନେତା ୮ମାସ ତଳର ଡୋକଲାମ ବିବାଦକୁ ବହୁ ପଛରେ ଛାଡିଆସିଛନ୍ତି । ବିଶ୍ୱ ଅର୍ଥନୈତିକ ବିକାଶର ଇଂଜିନ କୁହାଯାଉଥିବା ଏସିଆର ଦୁଇ ମହାଶକ୍ତି ଭାରତ ଓ ଚୀନ ପରସ୍ପରର ନିକଟତର ହେଉଛନ୍ତି ଆଉ ଏକ ଅନୌପଚାରିକ ସମ୍ମିଳନୀର ଏହି ଚିତ୍ର ସାରା ବିଶ୍ୱକୁ ବିସ୍ମିତ କରିଥିଲା । ପୂର୍ବ କାର୍ଯ୍ୟସୂଚୀ ଅନୁଯାୟୀ ଇଷ୍ଟ ଲେକ କୂଳରେ ବେଶ କିଛି ସମୟ ବିତାଇଥିଲେ ଦୁଇ ରାଷ୍ଟ୍ରମୁଖ୍ୟ । ଭ୍ରମଣ ଭିତରେ ଚାଲିଥିଲା ଚର୍ଚ୍ଚା ଆଲୋଚନା । ଉଭୟ ଭାରତ ଓ ଚୀନର ଆଭ୍ୟନ୍ତରୀଣ ପ୍ରସଙ୍ଗ ସହ ଅନ୍ତର୍ଜାତୀୟ ପ୍ରସଙ୍ଗଗୁଡିକ ଉପରେ ଆଲୋକପାତ କରିଥିଲେ ମୋଦି ଓ ଜିନପିଙ୍ଗ ।
ଜଣେ ଚା ବିକାଳିକୁ ଭାରତର ପ୍ରଧାନମନ୍ତ୍ରୀ ବନିଥିବା ନରେନ୍ଦ୍ର ମୋଦି କେବେହେଲେ ନିଜ ଅତୀତ ଜୀବନକୁ ଗୌଣ କରିନଥାନ୍ତି । କାରଣ ଭାରତୀୟ ଗଣତନ୍ତ୍ରର ଏହା କରିସ୍ମା ଯେ, ଏଠାରେ ଜଣେ ଚା ବିକାଳି ବି ଦେଶର ପ୍ରଧାନମନ୍ତ୍ରୀ ଆସନରେ ବସିବାର ସୁଯୋଗ ପାଆନ୍ତି । ତେବେ ଇଷ୍ଟ ଲେକ କୂଳରେ ମୋଦିଙ୍କ ପାଇଁ କରାଯାଇଥିବା ଚା ଷ୍ଟଲରେ ନିଜ ଚା ତିଆରି କରିବାର ଅଭିଜ୍ଞତା ସଂପର୍କରେ ରାଷ୍ଟ୍ରପତି ଜିନପିଙ୍ଗଙ୍କୁ ଜଣାଇବାକୁ ଭୁଲିନଥିଲେ ପ୍ରଧାନମନ୍ତ୍ରୀ ମୋଦି । ଆଉ ଏଭଳି ଏକ ବିରଳ ଦୃଶ୍ୟ ଜଣେ ବିଶ୍ୱନେତାଙ୍କ ଗାରିମାକୁ ଆହୁରି ବଢାଇଦେଥିବା ନେଇ ଚୀନ ଗଣମାଧ୍ୟମରେ ଚର୍ଚ୍ଚା ହୋଇଛି ।
ଏହାପରେ ଅବସର ଥିଲା ନୌକା ବିହାରର । ଦୁଇଟି ଦେଶର ନେତା ନମ୍ବର ୱାନଙ୍କ ମଧ୍ୟରେ କୂଟନୈତିକ କଥାବାର୍ତାର ମାହୋଲ କିଭଳି ହୋଇପାରେ ତାର ଏକ ନିଆରା ଚିତ୍ର ଦେଖିବାକୁ ମିଳିଥିଲା । ଯେତେବେଳେ ମୋଦି ଓ ଜିନପିଙ୍ଗ ବୋଟରେ ବସି ଇଷ୍ଟ ଲେକ ସାରା ବୁଲିଥିଲେ । ଏହି ସମୟରେ ମଧ୍ୟ ଦୁଇ ନେତା ଚର୍ଚ୍ଚା ଆଲୋଚନା ଜାରି ରଖିଥିଲେ । ଅତି ସାଧାରଣ ଓ ସ୍ୱାଭାବିକ ଢଙ୍ଗରେ ପରସ୍ପରର କଥାକୁ ଶୁଣୁଥିଲେ ଓ ଗୁରୁତ୍ୱ ଦେଉଥିଲେ । ଟି ସେରିମନିରେ ମୋଦି ଓ ଜିନପିଙ୍ଗ ସାରା ବିଶ୍ୱର ବିଭିନ୍ନ ପ୍ରସଙ୍ଗରେ ନିଜନିଜ ଆଭିମୁଖ୍ୟ ରଖିଥିବାବେଳେ ଚାଏ ପେ ଚର୍ଚ୍ଚା କରିଥିଲେ । କୁହାଯାଉଛି ମୋଦିଙ୍କ ଆତିଥ୍ୟ ପାଇଁ ପ୍ରତ୍ୟେକଟି ଆୟୋଜନ ରାଷ୍ଟ୍ରପତି ଜିନପିଙ୍ଗଙ୍କ ପ୍ରତ୍ୟକ୍ଷ ତତ୍ୱାବଧାନରେ ହୋଥିଲା । ଆଉ ଏହିଳି ଏକ ସୌହାର୍ଦ୍ଦ୍ୟପୂର୍ଣ୍ଣ ପରିବେଶରେ ନିଜର ଅନୌପଚାରିକ ସମ୍ମିଳନୀ ଶେଷ କରି ସ୍ୱଦେଶ ଫେରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଯାହା ଦୁଇଦେଶର ସଂପର୍କରେ ଅନେକ ପ୍ରଭାବ ପକାଇବା ଅନୁମାନ କରାଯାଉଛି ।