ପାକ୍ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ନସିରୁଦ୍ଦିନ ଶାହଙ୍କ କଡ଼ା ଜବାବ ! ପ୍ରଥମେ ନିଜ ଦେଶ କଥା ସମ୍ଭାଳ
କନକ ବ୍ୟୁରା : ଗୋହତ୍ୟା ସନ୍ଦେହରୁ କିଛିଦିନ ତଳେ ବୁଲନ୍ଦସର୍ରେ ଘଟିଥିବା ହିଂସାକାଣ୍ଡକୁ ନେଇ ଅଭିନେତା ନସିରୁଦ୍ଦିନ ଶାହ ଟିପ୍ପଣୀ ଦେବା ପରେ ଏହାକୁ ନେଇ ବିବାଦ ଥମିବାର ନାଁ ଧରୁନାହିଁ । ତେବେ ନସିରୁଦ୍ଦିନଙ୍କ ଟିପ୍ପଣୀ ପାଇଁ ତାଙ୍କୁ ଭାରତରେ ସମାଲୋଚନା କରାଯିବା ପରିପ୍ରେକ୍ଷୀରେ ଗତକାଲି ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ଙ୍କୁ ତାଙ୍କ ସପକ୍ଷରେ ଯୁକ୍ତି ବାଢ଼ିଥିଲେ । ନସିରୁଦ୍ଦିନଙ୍କୁ ଏଭଳି ସମାଲୋଚନା କରାଯିବା ଗ୍ରହଣୀୟ ନୁହେଁ ବୋଲି କହିଥିଲେ । କିନ୍ତୁ ଇମ୍ରାନ୍ଙ୍କ ଏଭଳି ବୟାନକୁ କଡ଼ା ବିରୋଧ କରି ନସିରୁଦ୍ଦିନ ତାଙ୍କୁ ଭର୍ତ୍ସନା କରିଛନ୍ତି । ଇମ୍ରାନ୍ ପ୍ରଥମେ ନିଜ ଦେଶ ପାକିସ୍ତାନକୁ ସମ୍ଭାଳନ୍ତୁ ଏବଂ ଅନ୍ୟ କଥା ଚିନ୍ତା କରିବା ଦରକାର ନାହିଁ ବୋଲି ସେ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏକ ସାକ୍ଷାତକାରରେ ନସିରୁଦ୍ଦିନ କହିଛନ୍ତି, ପାକିସ୍ତାନ ସହ ଜଡ଼ିତ ପ୍ରସଙ୍ଗ ଗୁଡ଼ିକ ଉପରେ ଇମ୍ରାନ୍ ଗୁରୁତ୍ବ ଦେବା ଆବଶ୍ୟକ । ଭାରତରେ କ’ଣ ଘଟିଲା ବା ଘଟିବ, ତାହାକୁ ନେଇ ସେ ମୁଣ୍ଡ ଖେଳାଇବା ଅନୁଚିତ । ବୁଲନ୍ଦସର୍ ହିଂସାକୁ ଆଧାର କରି ନସିରୁଦ୍ଦିନ କହିଥିଲେ, ଦେଶରେ ପୁଲିସ ଇନ୍ସପେକ୍ଟରଙ୍କ ମୃତ୍ୟୁଠାରୁ ଗାଈ ମୃତ୍ୟୁକୁ ଅଧିକ ଗୁରୁତ୍ବ ଦିଆଯାଉଛି । ଏହାପରେ ତାଙ୍କୁ ବିଭିନ୍ନ ମହଲରୁ ସମାଲୋଚନା କରାଯାଇଥିଲା । ଏହାକୁ ନେଇ ପାକ୍ ପ୍ରଧାନମନ୍ତ୍ରୀ ଇମ୍ରାନ୍ କହିଥିଲେ ଯେ ଭାରତରେ ସଂଖ୍ୟାଲଘୁ ସମ୍ପ୍ରଦାୟକୁ ପ୍ରକୃତ ନାଗରିକର ମର୍ଯ୍ୟାଦା ମିଳୁନାହିଁ । ସଂଖ୍ୟାଲଘୁଙ୍କୁ କିଭଳି ବ୍ୟବହାର କରିବାକୁ ହୁଏ, ଆମେ ତାହା ଦେଖାଇବୁ ।