ଜାତୀୟ ରାଜପଥରେ ଦୁର୍ଘଟଣା ହେଲେ ଶୀଘ୍ର ମିଳିବ ସାହଯ୍ୟ ! ଆସନ୍ତା ଫେବୃୟାରୀରେ ଜାରି ହେବ ଟୋଲ ଫ୍ରି ନମ୍ବର
ପ୍ରତିବର୍ଷ ହଜାର ହଜାର ଲୋକ ସଡ଼କ ଦୁର୍ଘଟଣାରେ ପ୍ରାଣ ହରାଉଛନ୍ତି । ଆମ ଦେଶରେ ସଡ଼କ ଦୁର୍ଘଟଣା ଦ୍ରୁତ ଗତିରେ ବଢ଼ିଚାଲିଛି । ସଚେତନାତା ବାର୍ତ୍ତା ମଧ୍ୟ କିଛି କାମ ଦେଉନି । ଆଜିକାଲି ଆପଣ ଦେଖୁଥିବେ ସଡ଼କରେ ଦୁର୍ଘଟଣା ଘଟାଇବା ପରେ ଅତ୍ୟନ୍ତ ଅମାନବିକତାର କାର୍ଯ୍ୟ କରୁଛନ୍ତି ଲୋକେ । ଦୁର୍ଘଟଣାଗ୍ରସ୍ତ ଲୋକକୁ ଡାକ୍ତରଖାନା ନେବା ପରିବର୍ତ୍ତେ ଦୁର୍ଘଟଣାସ୍ଥଳରୁ ପଳାଇ ଯାଉଛନ୍ତି । ଓଡ଼ିଶା ସମେତ ସାରା ଦେଶରେ ଘଟୁଥିବା ରାସ୍ତା ଦୁର୍ଘଟଣାକୁ ନେଇ କେନ୍ଦ୍ର ସରକାରଙ୍କ ପକ୍ଷରୁ ଉଦବେଗ ପ୍ରକାଶ ପାଇଛି । ସଡ଼କ ସଚେତନତା ଏବଂ ରାସ୍ତାଗୁଡ଼ିକର ମାନ ବୃଦ୍ଧି ପାଇବା ସତ୍ୱେ ଏତିକି ସଂଖ୍ୟାରେ ଦୁର୍ଘଟଣା ଘଟିବା ଉଭୟ ରାଜ୍ୟ ଏବଂ କେନ୍ଦ୍ର ସରକାରଙ୍କ ପାଇଁ ମୁଣ୍ଡବ୍ୟଥାର କାରଣ ପାଲଟିଛି । ନିଶାସକ୍ତ ଅବସ୍ଥାରେ ଗାଡ଼ିଚାଳନା, ବେପରୱା ଭାବରେ ଓଭରଟେକ କରିବା ଆଦି ରାସ୍ତା ଦୁର୍ଘଟଣାର ମୁଖ୍ୟ କାରଣ ବୋଲି ରିପୋର୍ଟରେ ଉଲ୍ଲେଖ କରାଯାଇଛି । ପରିବହନ ବିଭାଗ ଅନୁସାରେ ରାସ୍ତାଗୁଡ଼ିକର ଖରାପ ଡ଼ିଜାଇନ୍ ଓ ଇଞ୍ଜିନିୟରିଂ ଯୋଗୁଁ ଅଧିକ ଦୁର୍ଘଟଣା ଘଟୁଛି ।
Kanak News is now on WhatsApp
Join and get latest news updates delivered to you via WhatsApp
ଭାରତ ସରକାର ବୃଦ୍ଧି ପାଉଥିବା ଦୁର୍ଘଟଣାକୁ ଦୃ୍ଷ୍ଟିରେ ରଖି ଜାତୀୟ ସ୍ତରରେ ଏକ ଟୋଲ ଫ୍ରି ନମ୍ବର ଜାରି କରିବା ପାଇଁ ପ୍ରସ୍ତୁତି ଆରମ୍ଭ କରିଛନ୍ତି । ଏହି ନମ୍ବର ଜାରି ହେବା ପରେ ସଡ଼କ ଦୁର୍ଘଟଣା ସହ ଜଡ଼ିତ ସମସ୍ତ ଅଭିଯୋଗ କରାଯାଇପାରିବ । ନ୍ୟାସନାଲ ହାଇୱେ ଅଥରିଟି ଅଫ୍ ଇଣ୍ଡିଆ (NHAI ) ହେଲ୍ପଲାଇନ୍ ୧୦୩୩କୁ ଫେବୃୟାରୀ ପ୍ରଥମ ସପ୍ତାହରେ ଲଂଚ କରିବା ପାଇଁ ପ୍ରସ୍ତୁତି ଚାଲିଛି । NHAI ର ଚେୟାରମ୍ୟାନ୍ ଦୀପକ କୁମାର କହିଛନ୍ତି ଏହି ପ୍ରୋଜେକ୍ଟ ସହ ଜଡ଼ିତ ସମସ୍ତ କାମ ଶେଷ ହୋଇସାରିଛି । ଏହି ନମ୍ବର ସାହଯ୍ୟରେ ପୀଡ଼ିତଙ୍କ ପାଖରେ ଶୀଘ୍ର ପହଞ୍ଚି ହେବ । ଆଉ ତୁରନ୍ତ ମେଡ଼ିକାଲରେ ଭର୍ତ୍ତି କରିବା ଦ୍ୱାରା ଦୁର୍ଘଟଣାଗ୍ରସ୍ତ ବ୍ୟକ୍ତିଙ୍କ ଜୀବନ ବଞ୍ଚିପାରିବ । ଏନେଇ ସମସ୍ତ ରାଜ୍ୟ ସରକାରଙ୍କ ସହ ମଧ୍ୟ କଥାବାର୍ତ୍ତା ଚାଲିଛି । ଯାହାଦ୍ୱାରା ରାସ୍ତାରେ ହେଉଥିବା ଦୁର୍ଘଟଣାଗ୍ରସ୍ତ ଲୋକଙ୍କୁ ଶୀଘ୍ର ସୁବିଧା ଉପଲବ୍ଧ କରାଯାଇପାରିବ । ସୂତ୍ର ଅନୁସାରେ NHAI ର ସହାୟକ ନ୍ୟାସନାଲ ହାଇୱେ ନେଟୱର୍କ ପାଇଁ ଜିଆରଏସ୍ ମ୍ୟାପିଂର କାମ ପୁରା କରି ସାରିଛନ୍ତି । ଏହି ନମ୍ବରକୁ କଲ କଲେ ପୀଡ଼ିତଙ୍କୁ ତାଙ୍କ ଭାଷାରେ କଥାହେବା ପାଇଁ ସୁଯୋଗ ମିଳିବ । ଆଉ ଠିକ ସମୟରେ ସାହାଯ୍ୟ ପହଞ୍ଚିପାରିବ ।
ସୂଚନାଯୋଗ୍ୟ ୨୦୧୭ ତୁଳନାରେ ୨୦୧୮ରେ ରାଜ୍ୟରେ ୧୦ ପ୍ରତିଶତ ଅଧିକ ଦୁର୍ଘଟଣା ଘଟୁଛି । 
୨୦୧୬ରେ ରାଜ୍ୟରେ ସଡ଼କ ଦୁର୍ଘଟଣା ଜନତି ମୃତ୍ୟୁସଂଖ୍ୟା ୩୩୦୬ ଥିଲା । ୨୦୧୭ରେ ୩୪୯୫ ଜଣଙ୍କ ଜୀବନ ଯାଇଥିବା ଜଣାଯାଇଛି । ରାଜ୍ୟରେ ଓଡ଼ିଶାର ସଡ଼କ ଦୁର୍ଘଟଣା ବିହାର, ଉତ୍ତରପ୍ରଦେଶ ସହିତ ସମାନ ହେବାକୁ ବସିଲାଣି । କଟକ, ଖୋର୍ଦ୍ଧା, ଯାଜପୁର, ବଲାଙ୍ଗିର, କେନ୍ଦୁଝର, ସୁନ୍ଦରଗଡ଼ ଓ ବାଲେଶ୍ୱର ଆଦି ୧୧ଟି ଜିଲ୍ଲାରେ ଅଧିକ ଦୁର୍ଘଟଣା ଘଟିଥିବା କୁହାଯାଇଛି । ରାଜ୍ୟରେ ହେଉଥିବା ସଡ଼କ ଦୁର୍ଘଟଣା ଗୁଡ଼ିକ ମଧ୍ୟରୁ ୮୦ ପ୍ରତିଶତ ଦୁର୍ଘଟଣା ମନୁଷ୍ୟକୃତ କାରଣରୁ ହୋଇଥାଏ । ନିଶା ସେବନ କରି ଗାଡ଼ି ଚାଳନା, ମୋବାଇଲି ଫୋନ ସହ ଡ୍ରାଇଭିଂ, ଦ୍ରୁତ ଗତି, ଟ୍ରାଫିକ ନିୟମର ଉଲ୍ଲଂଘନ, ଓଭର ଟେକିଂ ଆଦି କାରଣରୁ ଅଧିକ ସଂଖ୍ୟକ ଦୁର୍ଘଟଣା ହେଉଥିବାବେଳେ ତ୍ରୁଟିପୂର୍ଣ୍ଣ ସଡ଼କ ଡ଼ିଜାଇନିଂ, ଯାନ୍ତ୍ରିକ ତ୍ରୁଟି, ପ୍ରାକୃତିକ ବିପର୍ୟ୍ୟୟ ଓ ଅନ୍ୟାନ୍ୟ କାରଣରୁ ମଧ୍ୟ ଦୁର୍ଘଟଣା ଘଟିଥାଏ ।