ଅସ୍ତମିତ ଅରୁଣ ! ବିଜେପି ପାଇଁ ଅପୂରଣୀୟ କ୍ଷତି, ମୋଦି ସରକାରଙ୍କ ପ୍ରଥମ ପାଳିର ସଙ୍କଟମୋଚକ ଜେଟଲୀ
କନକ ବ୍ୟୁରୋ : ଜଣେ ବିଚକ୍ଷଣ ରାଜନେତାକୁ ହରାଇଲା ଦେଶ । ବାଜପେୟୀଙ୍କ ପରେ ଯଦି କେବେ ଦ୍ୱିତୀୟ ଧାଡିର ନେତାଙ୍କୁ ବଛାଯାଏ, ତେବେ ଆଗରେ ଆସିବେ ଜେଟଲି । ଆଜି ତାଙ୍କର ପରଲୋକ ବିଜେପି ପାଇଁ ଜାତୀୟ ରାଜନୀତିରେ ଏକ ବଡ ଝଟକା ହୋଇଛି । ଜେଟଲୀଙ୍କ ନିଧନ ଖବର ପାଇବା ପରେ ବିଦେଶ ଗସ୍ତ ବାତିଲ କରି ଭାରତ ଫେରୁଛନ୍ତି ପ୍ରଧାନମନ୍ତ୍ରୀ ମୋଦି । ସେହିପରି ହାଇଦ୍ରାବାଦ ଗସ୍ତରେ ଥିବା କେନ୍ଦ୍ର ଗୃହମନ୍ତ୍ରୀ ଅମିତ ଶାହା ମଧ୍ୟ ଦିଲ୍ଲୀ ଫେରୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସ୍ଵାସ୍ଥ୍ୟଗତ ସମସ୍ୟା କାରଣରୁ ଚଳିତ ନିର୍ବାଚନରୁ ଦୂରେଇ ରହିଥିଲେ ମଧ୍ୟ ପରୋକ୍ଷ ଭାବେ ନିର୍ବାଚନରେ ସକ୍ରିୟ ଥିଲେ ଅରୁଣ ଜେଟଲୀ । ଲୋକସଭା ନିର୍ବାଚନ ପ୍ରଚାର ସମୟରେ ସକ୍ରିୟ ଅଂଶ ଗ୍ରହଣ କରୁଥିଲେ । ସାମାଜିକ ଗଣମାଧ୍ୟମ ଜରିଆରେ ସେ ବିରୋଧୀଙ୍କ କ୍ରମାଗତ ସମାଲୋଚନା କରିଚାଲିଥିଲେ । ମୋଦିଙ୍କ ପ୍ରଥମ ପାଳିରେ ଜେଟଲୀ ଅମୃତସର ଲୋକସଭା ନିର୍ବାଚନରେ ହାରିଥିଲେ ମଧ୍ୟ ତାଙ୍କର ଯୋଗ୍ୟତାକୁ ଦୃଷ୍ଟିରେ ରଖି ପ୍ରଧାନମନ୍ତ୍ରୀ ତାଙ୍କୁ କ୍ୟାବିନେଟ୍ ମନ୍ତ୍ରୀ ପଦ ଦେଇଥିଲେ । ମୋଦି ସରକାରଙ୍କ ପୂର୍ବରୁ ଜେଟଲୀ ଅଟଳ ବିହାରୀ ବାଜପେୟୀ ସରକାରରେ କ୍ୟାବିନେଟ୍ ମନ୍ତ୍ରୀ ଥିଲେ ଅରୁଣ । ସେହି ସମୟରେ ସେ ଉଦ୍ୟୋଗ-ବାଣିଜ୍ୟ ଓ ଆଇନ ମନ୍ତ୍ରାଳୟ ଦାୟିତ୍ୱ ସମ୍ଭାଳିଥିଲେ । ମୋଦି ସରକାରରେ ଅନେକ ଥର ମୁସ୍କିଲ ସମୟରେ ସଙ୍କଟମୋଚକ ହୋଇ କେନ୍ଦ୍ର ସରକାରଙ୍କୁ ସଙ୍କଟରୁ କାଢିଥିଲେ।
ମୋଦି ସରକାରଙ୍କ ପ୍ରଥମ କାର୍ଯ୍ୟକାଳରେ ସଙ୍କଟମୋଚକ ସାଜିଥିଲେ ଅରୁଣ ଜେଟଲୀ । ମୋଦି ସରକାରଙ୍କ ପ୍ରଥମ ପାଳିରେ ଅନେକ ଗୁରୁତ୍ୱପୂର୍ଣ୍ଣ ପଦେକ୍ଷପ ନେଇଛନ୍ତି । ତାଙ୍କର ଅର୍ଥମନ୍ତ୍ରୀତ୍ୱ କାଳରେ ୮ ନଭେମ୍ବର ୨୦୧୬ରେ ଦେଶରେ ବିମୁଦ୍ରାକରଣ ଘୋଷଣା କରିଥିଲେ । କଳାଧନ ଉପରେ ଅଙ୍କୁଶ ଲଗାଇବା ପାଇଁ ୫୦୦ଓ ୧୦୦୦ ଟଙ୍କିଆ ନୋଟ୍ ପ୍ରଚଳନ ଉପରେ ନିଷେଧାଦେଶ ଜାରି କରିଥିଲେ । ତାଙ୍କର କାର୍ଯ୍ୟକାଳରେ ଜିଏସଟି ମଧ୍ୟ ଲାଗୁ ହୋଇଥିଲା । ମୋଦି ସକରାରରେ ଅର୍ଥମନ୍ତ୍ରୀ ଭାବେ ବିମୁଦ୍ରାକରଣ ଓ ଜିଏସଟି ନିଷ୍ପତ୍ତି ବେଶ ଗୁରୁତ୍ୱପୂର୍ଣ୍ଣ ।