୫ ବର୍ଷ ପରେ ହଜିଲା ପୁଅର ଠିକଣା ମିଳିଲା : ପୁଅକୁ ପାଇ ଖୁସିରେ ଆତ୍ମହରା ବାପା, ଚେନ୍ନାଇରୁ ନିଖୋଜ ପୁଅ ନେଦରଲାଣ୍ଡରେ ପଢୁଛି ପାଠ
କନକ ବ୍ୟୁରୋ : ୫ ବର୍ଷ ଧରି ପୁଅ ମୃତ ଭାବି ଅଶା ଛାଡି ଦେଇ ଥିଲେ ପରିବାର ଲୋକେ । ତେବେ ସେଇ ପୁଅର ଏବେ ସନ୍ଧାନ ମିଳିଛି ସୁଦୁର ନେଦରଲ୍ୟାଣ୍ଡରେ । ଏପରି ଘଟଣା ସାମନାକୁ ଆସିଛି ମାଲାକନଗିରି ଜିଲ୍ଲାରୁ । ତାମିଲ ଶରଣାର୍ଥୀ ଭାବେ କେ ରବିଚନ୍ଦ୍ରନ ୧୯୯୦ ମସିହା ରେ ଆସି ଥିଲେ ମାଲକାନଗିରି । ୯୩ ମସିହାରେ ଚେନ୍ନାଇ ଠାରେ ବସତି ସ୍ଥାପନ କରି ସେଠାରେ ଶ୍ରମିକ ଭାବେ କାମ କରି ପୁଅକୁ ଏକ ମିଶନାରୀ ଆବାସିକ ସ୍କୁଲରେ ଭର୍ତି କରାଇଥିଲେ ବାପା ।
Kanak News is now on WhatsApp
Join and get latest news updates delivered to you via WhatsApp
୨୦୧୪ ମସିହାରେ ବାପା କେ ରବିଚନ୍ଦ୍ରନ ଶ୍ରୀଲଙ୍କାକୁ ଯାଇଥିବା ବେଳେ ୨୦୧୫ ରେ ପୁଅକୁ ଆଉ ଫେରି ପାଇ ନଥିଲେ । ଅନେକ ଖୋଜା ଖୋଜି କରିବା ପରେ ପୁଅ ସନ୍-ସିଗିଦାନ ଜଳପଥ ଅଷ୍ଟ୍ରେଲିୟା କିମ୍ବା ମାଲେସିଆ ଚାଲି ଯାଇଥିବା ଖବର ପାଇ ଥିଲେ । ମୋଟର ଲଂଚ ଦୁର୍ଘଟଣାରେ ପୁଅ ପ୍ରାଣ ହରାଇଥିବା ନେଇ ଖବର ବି ପାଇଥିଲେ । ତେବେ ନିରାଶ ହୋଇ ଗତ ୫ବର୍ଷ ଧରି ପୁଅକୁ ନପାଇ ପୁଣି ମାଲକାନଗିରି ଚାଲି ଆସିଥିଲେ ବାପା । ତେବେ ପୁଅ ନେଦରଲାଣ୍ଡରେ ଥାଇ ଆଇନ ପାଠ ପଢୁଥିବା ନେଇ ଏବେ ବାପା କେ ରବିଚନ୍ଦ୍ରନଙ୍କୁ ସୂଚନା ମିଳିଛି । ଏହି ସୂଚନା ମିଳିବା ପରେ ଫୋନ୍ ଯୋଗେ ଭିଡିଓ କଲରେ ବାପାଙ୍କ ସହ କଥା ହୋଇଥିଲେ ପୁଅ ।
ଦୀର୍ଘ ବର୍ଷ ଧରି ପରସ୍ପର ଠାରୁ ଅଲଗା ହୋଇଯାଇଥିବା ବାପା , ପୁଅକୁ ପାଇ ଖୁସିରେ ଆତ୍ମହରା ହୋଇ ପଡିଥିଲେ । ବାପାଙ୍କୁ ପୁଅ ନିକଟରେ ପହଁଚାଇବା କିମ୍ବା ପୁଅକୁ ବାପା ନିକଟକୁ ଆଣିବା ଲାଗି ସମସ୍ତ ସୁବିଧା ଯୋଗାଇ ଦିଆ ଯିବ ବୋଲି କହିଛନ୍ତି ଜିଲ୍ଲା ଆଇନ ସେବା ପ୍ରାଧିକରଣର ସମ୍ପାଦକ ।