ପ୍ରଧାନମନ୍ତ୍ରୀଙ୍କୁ କଂଗ୍ରେସର ପ୍ରଶ୍ନ ! ସାଧାରଣ ନିର୍ବାଚନ ପୂର୍ବରୁ ଚାଷୀଙ୍କ କଥା ମନେପଡ଼ିଲା କିପରି, ଆଗରୁ କେଉଁଠି ଥିଲେ ମୋଦି ?
କନକ ବ୍ୟୁରୋ : ଛୋଟ ଓ ସୀମାନ୍ତ କୃଷକଙ୍କ ପାଇଁ ପିଏମ କିଷାନ୍ ଯୋଜନାର ଶୁଭାରମ୍ଭ ହୋଇଯାଇଛି । ଗତକାଲି ଉତ୍ତରପ୍ରଦେଶରେ ପ୍ରଧାନମନ୍ତ୍ରୀ କିଷାନ୍ ସମ୍ମାନ ନିଧି ଯୋଜନାର ଶୁଭାରମ୍ଭ କରିଛନ୍ତି ନରେନ୍ଦ୍ର ମୋଦି । ନିର୍ବାଚନ ପୂର୍ବରୁ ଏକ ବଡ ଭୋଟ୍ ବ୍ୟାଙ୍କ୍ କୁହାଯାଉଥିବା ଚାଷୀ ସଂପ୍ରଦାୟଙ୍କୁ ମନ ଜିଣିବାକୁ ଉଦ୍ୟମ କରିଛନ୍ତି କେନ୍ଦ୍ର ସରକାର। ତେବେ ଏହି ଯୋଜନା ଆରମ୍ଭ ହେବା ପରେ କଂଗ୍ରେସ ଟାର୍ଗେଟକୁ ଆସିଯାଇଛନ୍ତି ମୋଦି ସରକାର ।
Kanak News is now on WhatsApp
Join and get latest news updates delivered to you via WhatsApp
କଂଗ୍ରେସ ଅଭିଯୋଗ କରିଛି ସାଧାରଣ ନିର୍ବାଚନ ପୂର୍ବରୁ ନିଜ ଛବି ବଦଳାଇବା ପାଇଁ କେନ୍ଦ୍ର ସରକାର କୃଷକଙ୍କ ହିତ ପାଇଁ ଏପରି ନିଷ୍ପତ୍ତି ନେଇଛନ୍ତି । ନିଜର ଶାସନକାଳ ଭିତରେ କୃଷକଙ୍କ ପାଇଁ କିଛି କରିନାହାନ୍ତି ମୋଦି ସରକାର । କଂଗ୍ରେସ ପ୍ରବକ୍ତା ପବନ ଖେଡ଼ା କହିଛନ୍ତି କୃଷକଙ୍କ କଷ୍ଟ ତଥା କୃଷକଙ୍କ ହିତ କଥା ମୋଦିଙ୍କୁ ଏବେ ମନେପଡ଼ିଲା । ତେବେ ସ୍ୱତଃପ୍ରବୃତ୍ତ ଭାବେ କୃଷକଙ୍କୁ ମନେ ପକାଇନାହାନ୍ତି ମୋଦି । କଂଗ୍ରେସ ଅଧ୍ୟକ୍ଷ ନିକଟରେ ୩ ରାଜ୍ୟରେ କୃଷି ଋଣ ଛାଡ଼ କରିବା ପରେ ମୋଦିଙ୍କୁ କୃଷକଙ୍କ କଥା ମନେପଡ଼ିଲା ।
ସୂଚନାଯୋଗ୍ୟ ଗତକାଲି ନରେନ୍ଦ୍ର ମୋଦି ପ୍ରଧାନମନ୍ତ୍ରୀ କିଶାନ ସମ୍ନାନ ନିଧି ଯୋଜନା ୟୁପି ଗୋରଖପୁର ଠାରୁ ଶୁଭାରମ୍ବ କରିଛନ୍ତି । ପ୍ରଥମ ପର୍ଯ୍ୟାୟରେ ଏକ କୋଟିରୁ ଅଧିକ ଚାଷୀଙ୍କ ଖାତାକୁ ପହଂଚିଛି ୨ ହଜାର ଲେଖାଏଁ ଆର୍ଥିକ ପ୍ରୋତ୍ସାହନ ରାଶି । ପର୍ଯ୍ୟାୟ କ୍ରମେ ୧୨ କୋଟି ଚାଷୀଙ୍କ ପାଖକୁ ୩ଟି କିସ୍ତିରେ ଟଙ୍କା ପଠାଇବେ ମୋଦି । ଖେଡ଼ା ମିଡ଼ିଆକୁ କହିଛନ୍ତି ମୋଦିଙ୍କୁ ନିଜ ଛବି ବଂଚାଇବା ପାଇଁ ଏହି ଯୋଜନାର ଶୁଭାରମ୍ଭ କରିବା ପାଇଁ ପଡ଼ିଲା । ଏହାବ୍ୟତୀତ ସେ ଦାବି କରିଛନ୍ତି ନିର୍ବାଚନ ପୂର୍ବରୁ ମୋଦିଙ୍କ ଏପରି ନିର୍ବାଚନୀ ଭେଳିକି କାମ କରିବ ନାହିଁ ।
ଆସାମରେ ବିଷାକ୍ତ ମଦ ପିଇ ୧୨୪ ଜଣଙ୍କ ମୃତ୍ୟୁ ଘଟଣା ଓ ଅରୁଣାଚଳ ପ୍ରଦେଶରେ ହୋଇଥିବା ହିଂସା ବିଷୟରେ ମୋଦି କାହିଁକି ଚୁପ୍ ଅଛନ୍ତି ବୋଲି ମଧ୍ୟ ପ୍ରଶ୍ନ କରିଛି କଂଗ୍ରେସ । କଂଗ୍ରେସ କଟାକ୍ଷ କରି କହିଛି, ମୋଦି ସକାଳୁ ସନ୍ଧ୍ୟା ପର୍ଯ୍ୟନ୍ତ ଯାତ୍ରା କରୁଛନ୍ତି । ଦିନକୁ ତିନି ଚାରି ଥର ପୋଷାକ ବଦଳାନ୍ତି । ହେଲେ ଲୋକେ ଯେଉଁଥିପାଇଁ ତାଙ୍କୁ ଚୟନ କରିଛନ୍ତି, ସେକାମ କିଛି ବି କରନ୍ତି ନାହିଁ । ହେଲେ ନିର୍ବାଚନ ପୂର୍ବରୁ ଲୋକଙ୍କ ମନ ଜିଣିବା ପାଇଁ ବିଭିନ୍ନ ଯୋଜନା ଆରମ୍ଭ କରୁଛନ୍ତି ।