ପାରିବାରିକ କଳହର କରୁଣ ପରିଣତି : ଆତ୍ମହତ୍ୟାର ଧମକ ଦେବାରୁ ସ୍ତ୍ରୀ ଉପରେ କିରୋସିନ ଢ଼ାଳି ନିଆଁ ଲଗାଇ ଦେଲା ସ୍ବାମୀ

442

କନକ ବ୍ୟୁରୋ : ପାରିବାରିକ ଅଶାନ୍ତିକୁ ନେଇ ହତ୍ୟାକାଣ୍ଡ । ସ୍ତ୍ରୀ ଆତ୍ମହତ୍ୟାର ଧମକ ଦେବାରୁ ଅଭିଯୁକ୍ତ ସ୍ବାମୀ ରାଗରେ ସ୍ତ୍ରୀ ଦେହରେ କିରୋସିନ ଢ଼ାଳି ନିଆଁ ଲଗାଇଦେବା ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି ।  ଚେନ୍ନାଇରେ ଘଟିଛି ଏପରି ଅଭାବନୀୟ ଘଟଣା । ପୀଡ଼ିତାଙ୍କ ଶରୀର ୬୫ପ୍ରତିଶତ ପୋଡ଼ି ଯାଇଥିବା ଜଣା ପଡ଼ିଛି । ଏବେ ତାଙ୍କୁ ଗୁରୁତର ଅବସ୍ଥାରେ କିଲପୌକ୍ ମେଡିକାଲ କଲେଜ ଆଣ୍ଡ ହସ୍ପିଟାଲରେ ଭର୍ତ୍ତି କରାଯାଇ ଚିକିତ୍ସା କରାଯାଉଛି । ପୀଡ଼ିତାଙ୍କ ନାଁ ପଞ୍ଚାଭରମ୍ ବୋଲି ଜଣା ପଡ଼ିଥିବା ବେଳେ ଅଭିଯୁକ୍ତ ସ୍ବାମୀର ନାଁ ରାଜନ ବୋଲି ଜଣା ପଡ଼ିଛି ।

ସୂୂଚନା ମୁତାବକ, ପଞ୍ଚାଭରମ୍ ଓ ରାଜନଙ୍କର ଅନେକ ସମୟରେ ବିଭିନ୍ନ କାରଣରୁ ଝଗଡ଼ା ହୋଇଥାଏ । ବୁଧବାର ମଧ୍ୟ କୌଣସି କାରଣକୁ ନେଇ ପରସ୍ପର ମଧ୍ୟରେ ଝଗଡ଼ା ହେଉଥିବା ବେଳ ପଞ୍ଚାଭରମ୍ ଦେହରେ କିରୋସିନ୍ ଢ଼ାଳି ଆତ୍ମହତ୍ୟା କରିବାର ଧମକ ଦେଇଥିଲେ । ସ୍ତ୍ରୀର ଏଭଳି କଥା ଶୁଣି ରାଜନ ରାଗିଯିବା ସହ ନିଜେ କିରୋସିନ୍ ଆଣି ପଞ୍ଚାଭରମଙ୍କ ଉପରେ ଢ଼ାଳିବା ସହ ନିଆଁ ଲଗାଇ ଦେଇଥିଲେ । ପରେ ପଞ୍ଚାଭରମଙ୍କ ଚିତ୍କାର ଶୁଣି ରାଜନ ଧରା ପଡ଼ିଯିବା ଡ଼ରରେ ତୁରନ୍ତ ଘଟଣାସ୍ଥଳରୁ ଫେରାର ହୋଇ ଯାଇଥିଲେ । ପରେ ପଡ଼ୋଶୀଙ୍କ ସହାୟତାରେ ପୀଡ଼ିତାଙ୍କୁ ଡାକ୍ତରଖାନା ନିଆଯିବା ସହ ଏବେ ଚିକିତ୍ସା ଜାରି ରହିଛି । ତେବେ ଏହା ପ୍ରଥମ ନୁହେଁ ଏହା ପୂର୍ବରୁ ଅନେକ ଚୋରି ଅଭିଯୋଗରେ ରାଜନ ଜେଲ ଯାଇ ସାରିଥିବା ଜଣା ପଡ଼ିଛି ।

Comments are closed.