ଟପ୍ପର କହିଲେ ସଫଳତାର ମନ୍ତ୍ର ! ଆଇଏଏସ୍ ପରୀକ୍ଷାରେ କିପରି କୃତକାର୍ଯ୍ୟ ହେଲେ ଦ୍ୱିତୀୟ ସ୍ଥାନ ଅଧିକାରୀ କରିଥିବା ଅନୁ କୁମାରୀ?
କନକ ବ୍ୟୁରୋ : ଇଚ୍ଛାଶକ୍ତି ଯଦି ଦୃଢ଼ ହୁଏ, ସବୁ ବାଧାବିଘ୍ନକୁ ଅତିକ୍ରମ କରି ଜଣେ ଲକ୍ଷ୍ୟସ୍ଥଳରେ ପହଂଚିପାରେ । ଏହି ଉକ୍ତିକୁ ଅକ୍ଷରେ ଅକ୍ଷରେ ପ୍ରମାଣିତ କରି ଦେଖାଇଛନ୍ତି ଅନୁ କୁମାରୀ । ସର୍ବଭାରତୀୟ ପ୍ରଶାସନିକ ସେବା ପରୀକ୍ଷା ଦ୍ୱିତୀୟ ସ୍ଥାନ ଅଧିକାରୀ କରିଥିବା ହରିୟାଣାର ଅନୁ କୁମାରୀଙ୍କ କାହାଣୀ ଅନେକ ମହିଳାଙ୍କ ପାଇଁ ପ୍ରେରଣା ଭାବରେ ସାମ୍ନାକୁ ଆସିଛି । ଆଇଏଏସ୍ ହେବାର ସ୍ୱପ୍ନ ପୂରଣ କରିବା ପାଇଁ ନିଜ ୪ବର୍ଷର କୁନି ପୁଅଠାରୁ ବି ଦୂରେଇ ରଖିବାକୁ ପଡ଼ିଥିଲା ଅନୁ କୁମାରୀଙ୍କୁ । ୯ବର୍ଷ ଧରି କରିଆସୁଥିବା ଚାକିରିକୁ ବି ଛାଡ଼ିବାକୁ ପଡ଼ିଥିଲା । ହେଲେ ଫଳ ଯେତେବେଳେ ଆସିଲା ସବୁ ଦୁଃଖ ଭୁଲିଗଲେ ଅନୁ କୁମାରୀ ।
Kanak News is now on WhatsApp
Join and get latest news updates delivered to you via WhatsApp
ଛାତିରେ ପଥର ରଖି ଅତି ସ୍ନେହର କୁନି ପୁଅକୁ ପ୍ରାୟ ଦେଢ଼ ବର୍ଷ ଧରି ନିଜଠାରୁ ଦୂରେଇ ରଖିଥିଲେ ଅନୁ କୁମାରୀ । ଅଝଟ ହେଲେ ପୁଅକୁ ବୁଝାଇ ଦେବା ପାଇଁ ମା’ ପାଖରେ ନଥିଲେ । ସଂପର୍କୀୟ ମାଉସୀ ପାଖରେ ଛାଡି ଦେଇ ନିଜ ଏବଂ ପରିବାରର ସ୍ୱପ୍ନ ପୁରଣ ପାଇଁ ମା’ କରୁଥିଲେ ଅନବରତ ପ୍ରାୟସ । ଆଉ ଆଜି ସେହି ସ୍ୱପ୍ନ ପୁରଣ ହୋଇଛି । ହରିୟାଣାର ସୋନିପଥ୍‘ର ଅନୁ କୁମାରୀ ଆଜି ସଫଳତାର ଯେଉଁ ଶୀର୍ଷରେ ପହଂଚିଛନ୍ତି-ହୁଏତ ସବୁ ବାପା-ମାଙ୍କ ଏହି ସ୍ୱପ୍ନ ଥାଏ । ସର୍ବଭାରତୀୟ ପ୍ରଶାସନିକ ସେବା ପରୀକ୍ଷା ଦ୍ୱିତୀୟ ସ୍ଥାନ ଅଧିକାର କରିଛନ୍ତି ହରିୟାଣାର ଅନୁ କୁମାରୀ । ଘର ପରିବାରର ଦ୍ୱାୟିତ୍ୱ ଭିତରେ ଆଇଏଏସ୍ ହେବାର ସ୍ୱପ୍ନ ପୁରଣ କରିଛନ୍ତି ଅନୁ ।
ଉଚ୍ଚଶିକ୍ଷା ପରେ ଦୀର୍ଘ ୯ ବର୍ଷ ଧରି ଘରୋଇ କଂପାନୀରେ ଚାକିରି କରିବା ପରେ ଆଇଏଏସ୍ ହେବାର ସ୍ୱପ୍ନ ଦେଖିଥିଲେ ଅନୁ କୁମାରୀ । ପ୍ରଥମ ପ୍ରୟାସରେ ମାତ୍ର ଗୋଟିଏ ମାର୍କ କମ୍ ହେବାରୁ ପ୍ରିଲିମିନାରୀ ପରୀକ୍ଷାରେ କୃତକାର୍ଯ୍ୟ ହୋଇ ପାରିନଥିଲେ । ଆଉ ତା’ପରେ ନିଷ୍ପତ୍ତି ନେଲେ ଚାକିରି ଛାଡ଼ି କେବଳ ଆଇଏଏସ୍ ପରୀକ୍ଷାରେ ଧ୍ୟାନ ଦେଲେ ।
ବଡ କଥା ହେଉଛି-ଅନୁ କୌଣସି ପ୍ରତ୍ୟକ୍ଷ କୋଚିଂ ମଧ୍ୟ ନେଇ ନାହାଁନ୍ତି । କୋଚିଂ ସେଂଟର ଗୁଡ଼ିକ ଯୋଗାଉଥିବା ଅନଲାଇନ୍ ପାଠ୍ୟକ୍ରମ ପଢ଼ି ହାସଲ କରିଛନ୍ତି ଏହି ସଫଳତା । ଆଉ ଦ୍ୱିତୀୟ ପ୍ରୟାସରେ ସାରା ଦେଶରେ ଅନୁ ହୋଇଛନ୍ତି ଦ୍ୱିତୀୟ ଟପ୍ପର । ଆଇଏଏସ୍ ପରୀକ୍ଷାରେ କୃତକାର୍ଯ୍ୟ ହୋଇଥିବା ଅନୁ, ମହିଳାଙ୍କ ସୁରକ୍ଷା ଦିଗରେ କାମ କରିବେ ବୋଲି କହିଥିବା ବେଳେ ଅନୁଙ୍କ ସଫଳତାକୁ ନେଇ ପରିବାର ଲୋକ ବି ଖୁସ୍ । ଜଣେ ମହିଳା ଚାହିଁଲେ ସବୁ କିଛି କରିପାରେ,ଅନୁ କୁମାରୀଙ୍କ ସଫଳତାର କାହାଣୀ ବୋଧେ ଏହା ହିଁ ବୟାନ କରୁଛି ।