ଠିକ ଠିକ ସମୟରେ ଔଷଧ ଖାଇପାରିବେ ବୟୋଜ୍ୟେଷ୍ଠ ବ୍ୟକ୍ତି : ଅଷ୍ଟମ ଛାତ୍ର ତିଆରି କଲେ ସ୍ୱତନ୍ତ୍ର ଯନ୍ତ୍ର, ଜାଣନ୍ତୁ କିପରି ଏହା କାମ କରିବ ?
ବୟୋଜ୍ୟେଷ୍ଠ ବ୍ୟକ୍ତିମାନେ ବେଳେ ବେଳେ ଠିକ ସମୟରେ ଔଷଧ ଖାଇପାରନ୍ତି ନାହିଁ । କାରଣ ଆଜିକା ବ୍ୟସ୍ତବହୁଳ ଜୀବନରେ ସମସ୍ତ କାମରେ ବ୍ୟସ୍ତ । ଘରର ବଡ଼ ଲୋକଙ୍କ ଧ୍ୟାନ ରଖିବା ପାଇଁ ଘରେ ରହିବା ସମସ୍ତଙ୍କ ପାଇଁ ସମ୍ଭବପର ହୋଇପାରୁନାହିଁ । ଆଉ ବୟସ ବଢ଼ିବା ସଙ୍ଗେ ସଙ୍ଗେ କେଉଁ ସମୟରେ ଔଷଧ ଖାଇବା କଥା ବୟୋଜ୍ୟେଷ୍ଠ ବ୍ୟକ୍ତିମାନେ ଭୁଲିଯାଆନ୍ତି । ଯଦ୍ୱାରା ତାଙ୍କ ରୋଗ ବଢ଼ି ବଢ଼ିଯାଏ । ତେବେ ଆଗକୁ ଏପରି ଅସୁବିଧା ହେବ ନାହିଁ ବୋଲି ଆଶା କରାଯାଉଛି । କାରଣ ଘରର ବୟୋଜ୍ୟେଷ୍ଠ ବ୍ୟକ୍ତିମାନଙ୍କୁ ଔଷଧ ଦେବା ପାଇଁ ତିଆରି ହୋଇସାରିଛି ସ୍ୱତନ୍ତ୍ର ଯନ୍ତ୍ର ।
Kanak News is now on WhatsApp
Join and get latest news updates delivered to you via WhatsApp
ଅଷ୍ଟମ ଶ୍ରେଣୀ ଛାତ୍ର ସୂର୍ଯ୍ୟ ନାରାୟଣ ଏପରି ଏକ ଡିଭାଇସ୍ ତଆରି କରିଛନ୍ତି, ଯାହା ଠିକ ଠିକ ସମୟରେ ବୟୋଜ୍ୟେଷ୍ଠ ବ୍ୟକ୍ତିମାନଙ୍କୁ ଔଷଧ ଦେଇପାରିବ । ଉକ୍ତ ଯନ୍ତ୍ରରେ ଔଧଷର ନାମ, ଡୋଜ୍ ଓ ସମୟ ସେଟ୍ କରିଦେଲେ ଆପେ ଆପେ ଆଲାର୍ମ ବାଜି ଉଠିବ ଏବଂ ମେସିନ ଔଷଧ ଦେବା ପାଇଁ ପ୍ରସ୍ତୁତ ହୋଇଯିବ । ଔଷଧ ନେବା ପରେ ଆଲାର୍ମ ଆପେ ଆପେ ବନ୍ଦ ହୋଇଯିବ । ଯଦି କେହି ବ୍ୟକ୍ତି ଔଷଧ ନଖାଇ ଆଲାର୍ମ ବନ୍ଦ କରିଦିଏ, ତେବେ ଆଲାର୍ମ ସେଟ୍ କରୁଥିବା ବ୍ୟକ୍ତ ପାଖକୁ ଔଷଧ ଖାଇନାହାନ୍ତି ବୋଲି ମେସେଜ ଚାଲିଯବ । ମେସିନରେ ଥରକରେ ୨୪ ଘଂଟା ପାଇଁ ଔଷଧ ଦେବା ପାଇଁ ସମୟ ସେଟ୍ କରାଯାଇପାରିବ । ଏହି ସ୍ୱତନ୍ତ୍ର ଯନ୍ତ୍ରର ପ୍ରେଜେନଟେସନ ଶନିବାର ଦିନ ଆଇଆଇଟି ପାଟନାର ଆୟୋଜିତ ହେକଥନରେ କରାଯାଇଛି ।
ଏହି ସ୍ୱତନ୍ତ୍ର ଯନ୍ତ୍ର ତିଆରି କରିଥିବା ଛାତ୍ର ସୂର୍ଯ୍ୟ ନାରାୟଣ ୧୩ ବର୍ଷ ବୟସର । ସେ ହେକଥନରେ ସବୁଠାରୁ କମ୍ ବୟସର ପ୍ରତିଯୋଗୀ । ସୂଚନା ଅନୁସାରେ ଡିଭାଇସରେ ଉନ୍ନତ ଧରଣ ସପ୍ଟୱେର ଓ ଜ୍ଞାନକୌଶଳ ବ୍ୟବହାର ହୋଇଛି । ସୂର୍ଯ୍ୟ କହିଛନ୍ତି ତାଙ୍କ ଅଜା ଏକୁଟିଆ ରୁହନ୍ତି । ଆଉ ତାଙ୍କୁ ଠିକ ଠିକ ସମୟରେ ଔଷଧ ଖାଇବାରେ ଅସୁବିଧା ହୁଏ । ଅଜାଙ୍କର ଅସୁବିଧା ଦେଖି ଏପରି ଏକ ଯନ୍ତ୍ର ତିଆରି କରିବା ପାଇଁ ସେ ମନସ୍ଥ କରିଥିଲେ । ତେବେ ଏହି ଯନ୍ତ୍ରକୁ ଅନେକ ଥର ପରୀକ୍ଷା କରାଯାଇଛି । ଆଉ ରେଜଲ୍ଟ ସବୁବେଳେ ଠିକ ହିଁ ଆସିଛି ।
ସୂର୍ଯ୍ୟଙ୍କର ମା’ ତଥା ସହାୟକ ପ୍ରଫେସର ଡଃ ଲୀନା କହିଛନ୍ତି ଏହି ଯନ୍ତ୍ର ତିଆରି କରିବା ପାଇଁ ତାଙ୍କୁ ୪୫୦ ରୁ ୫୦୦ ଟଙ୍କା ଖର୍ଚ୍ଚ ହେଉଛି । ବଜାରରେ ଏହାକୁ ମାତ୍ର ୬୦୦ ଟଙ୍କାରେ ଉପଲବ୍ଧ କରାଯାଇପାରିବ । ସମସ୍ତ ଜ୍ଞାନକୌଶଳର ସୂର୍ଯ୍ୟ ନିଜେ ପ୍ରସ୍ତୁତ କରିଛନ୍ତି ବୋଲି ତାଙ୍କ ମା’ ପ୍ରକାଶ କରିଛନ୍ତି । ଏହାକୁ ସୋଲାର ସିଷ୍ଟମରେ ମଧ୍ୟ ବ୍ୟବହାର କରିହେବ ।