ଭାରତରେ ବିଶ୍ୱର ସବୁଠୁ ବଡ କ୍ରିକେଟ୍ ଷ୍ଟାଡିୟମ୍ । ୧ ଲକ୍ଷ ୧୦ ହଜାର ଦର୍ଶକ ବସିବାର ରହିଛି କ୍ଷମତା, ସ୍ୱତନ୍ତ୍ର ବ୍ୟବସ୍ଥା ସହ ପ୍ରଥମ ଥର ପାଇଁ ଲାଗିଛି ଏଲଇଡି ଲାଇଟ୍ ।
କନକ ବ୍ୟୁରୋ : ଭାରତରେ ବିଶ୍ୱର ସବୁଠାରୁ ବଡ କ୍ରିକେଟ୍ ଷ୍ଟାଡିୟମ୍ । ଗୁଜୁରାଟ ଅହମ୍ମଦାବାଦରେ ଚାଲିଛି ସବୁଠୁ ବଡ ଷ୍ଟାଡିୟମର ନିର୍ମାଣ କାର୍ଯ୍ୟ । ଏହି ଷ୍ଟାଡିୟମ୍ ୬୩ ଏକର ଜାଗାରେ ତିଆରି ଚାଲିଛି । ଜାତୀୟ ଗଣମାଧ୍ୟମରୁ ମିଳିଥିବା ସୂଚନା ଅନୁଯାୟୀ, ଏହି ଷ୍ଟାଡିୟମର ବ୍ୟୟ ଅଟକଳ ୭୦୦ କୋଟି ଟଙ୍କା ରହିଛି । ସବୁଠାରୁ ବଡ କଥା ହେଉଛି, ମ୍ୟାଚ୍ ସମୟରେ ଏହି ଷ୍ଟାଡିୟମରେ ପାଖାପାଖି ୧ ଲକ୍ଷ ୧୦ ହଜାର ଲୋକ ବସିବାର କ୍ଷମତା ରହିଛି । ଆଉ ଷ୍ଟାଡିୟମର ନାଁ ରଖାଯାଇଛି ସର୍ଦ୍ଦାର ପଟେଲ୍ କ୍ରିକେଟ୍ ଷ୍ଟାଡିୟମ ।
Kanak News is now on WhatsApp
Join and get latest news updates delivered to you via WhatsApp
କୁହାଯାଉଛି, ଯଦି ସବୁକିଛି ଠିକଠାକ୍ ଚାଲେ, ତେବେ ଆସନ୍ତା ବର୍ଷ ମାର୍ଚ୍ଚ ମାସରେ ଏଠାରେ ଏସିଆ ଏକାଦଶ ଏବଂ ବିଶ୍ୱ ଏକାଦଶ ମଧ୍ୟରେ ପ୍ରଥମ ପ୍ରଦର୍ଶନୀ ମ୍ୟାଚ୍ ଖେଳାଯିବ । କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କ ପୁଅ ତଥା ବର୍ତ୍ତମାନର ବିସିସିଆଇ ସଚିବ ଜୟ ଶାହାଙ୍କ କହିବା ଅନୁଯାୟୀ, ଏହି ଷ୍ଟାଡିୟମ୍ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କର ସ୍ୱପ୍ନର ଷ୍ଟାଡିୟମ୍ ଅଟେ । ଏହି ଷ୍ଟାଡିୟମର ପରିକଳ୍ପନା ମଧ୍ୟ ପ୍ରଧାନମନ୍ତ୍ରୀ ମୋଦିଙ୍କ ନେତୃତ୍ୱରେ କରାଯାଇଥିଲା । ଏବଂ ଏହି ଷ୍ଟାଡିୟମର ଉଦଘାଟନ୍ ମଧ୍ୟ ନିଜେ ପ୍ରଧାନମନ୍ତ୍ରୀ କରିପାରନ୍ତି ।
ତେବେ ଷ୍ଟାଡିୟମର ନିର୍ମାଣ କାର୍ଯ୍ୟ ପାଖାପାଖି ଶେଷ ହେବାକୁ ବସିଥିବା ବେଳେ, ଏଠାରେ ଖେଳାଯିବାକୁ ଥିବା ପ୍ରଥମ ମ୍ୟାଚକୁ ସ୍ମରଣୀୟ କରିବାକୁ ଯାଉଛି ଗୁଜୁରାଟ କ୍ରିକେଟ୍ ଆସୋସିଏସନ୍ । ଆଉ କୁହାଯାଉଛି, ଦୁନିଆର ସମସ୍ତ ଷ୍ଟାର କ୍ରିକେଟର ଏକାସଙ୍ଗେ ଏହି ମ୍ୟାଚ୍ ଖେଳିବେ । ତେବେ ଏହି ଷ୍ଟାଡିୟମଟି ମେଟ୍ରୋ ଷ୍ଟେସନ ପାଖରେ ଥିବା ସାବରମତି ନଦୀ କୂଳରେ ନିର୍ମାଣ କରାଯାଇଛି । ସର୍ଦ୍ଦାର ପଟେଲ କ୍ରିକେଟ୍ ଷ୍ଟାଡିୟମ୍ ଅଷ୍ଟ୍ରେଲିଆର ମେଲବର୍ଣ୍ଣ କ୍ରିକେଟ୍ ଗ୍ରାଉଣ୍ଡ ଠାରୁ ମଧ୍ୟ ବଡ ଅଟେ । ତେବେ ଆସନ୍ତୁ ଜାଣିବା ଏହି ଷ୍ଟାଡିୟମରେ ଆଉ କଣ ରହିଛି ବିଶେଷତ୍ୱ ।
ବିଶ୍ୱର ଏହି ବଡ ଷ୍ଟାଡିୟମରେ ତିନୋଟି ପ୍ରାକ୍ଟିସ୍ ଗ୍ରାଉଣ୍ଡ, କ୍ଲବ ହାଉସ, ଅଲମ୍ପିକ ସାଇଜ୍ ସୁଇମିଂ ପୁଲ ଏବଂ ଗୋଟିଏ ଇଣ୍ଡୋର କ୍ରିକେଟ୍ ଏକାଡେମି ମଧ୍ୟ ତିଆରି କରାଯାଇଛି ।
ଷ୍ଟାଡିୟମର ଷ୍ଟ୍ରକଚର ଏମିତି ହୋଇଛି ଯେ, ଯେତେବେଳେ ବି ଜଣେ ଖେଳାଳୀ ବ୍ରାଉଣ୍ଡ୍ରିଂ ମାରିବେ, ଷ୍ଟାଡିୟମରେ ବସିଥିବା ପ୍ରତିଟି କ୍ରିକେଟ୍ ପ୍ରେମୀ ଏହାକୁ ଦେଖିପାରିବେ ।
ସେହିପରି ପାର୍କିଂ ବ୍ୟବସ୍ଥା ମଧ୍ୟ ଉନ୍ନତ ଧରଣର ରହିଛି । ଯେଉଁଥିରେ ୪ ହଜାର କାର୍ ଏବଂ ୧୦ ହଜାର ବାଇକ୍ ପାର୍କିଂର ବ୍ୟବସ୍ଥା ରହିଛି ।
ପ୍ରଥମ ଥର ପାଇଁ କୌଣସି ଷ୍ଟାଡିୟମରେ ଏଲଇଡି ଲାଇଟ୍ ଲଗାଯିବ ।
ଏହା ଛଡା ୭୫ଟି କର୍ପୋରେଟ୍ ବକ୍ସ ନିର୍ମାଣ କରାଯାଇଛି ।
ଷ୍ଟାଡିୟମରେ ପ୍ରବେଶ ଏବଂ ପ୍ରସ୍ଥାନ ପାଇଁ ଅଲଗା ଅଲଗା ବ୍ୟବସ୍ଥା କରାଯାଇଛି ।
ଷ୍ଟାଡିୟମ ପାଖରେ ମେଟ୍ରୋ ଲାଇନ୍ ମଧ୍ୟ ଅଣାଯାଇଛି ।
ଆଖି ଝଲସିଯିବା ଭଳି ଆଲୋକମାଳାରେ ଷ୍ଟାଡିୟମକୁ ସଜାଯିବାକୁ ଥିବାବେଳେ କେବେ ଏହାର ଉଦଘାଟନ ହେଉଛି, ଏବେ ତାକୁ ହିଁ ଅପେକ୍ଷା ।