ପାଞ୍ଚଶହ ଟଙ୍କାକୁ ପାଞ୍ଚପ୍ରାଣୀ କୁଟୁମ୍ବ… ବଞ୍ଚିବାର ରାହା ୨୫ କେଜି ଚାଉଳ… ରାତି ପାହିଲେ ଚାରି ଝିଅଙ୍କ ପେଟ ପାଇଁ ଭାତ ଖୋଜୁଛନ୍ତି ରାଣୀଲତା
କନକ ବ୍ୟୁରୋ: ୫୦୦ ଟଙ୍କାରେ କଣ ପାଞ୍ଚଟି ପେଟ ପୂରିବ ? ୨୫ କେଜି ଚାଉଳରେ କଣ ମାସେ ଚଳି ହେବ? ଜୀବନ ବଞ୍ଚାଇବା ପାଇଁ ଘର କୋଣରେ ସାଇତା ଥିବା ଚାଉଳ ବସ୍ତା ସରି ସରି ଆସିଲେ କଣ ଖାଇବେ ପିଲା? କେମିତି ବଞ୍ଚିବେ ସେମାନେ ? କଇଁକଇଁ ହୋଇ ଦୁଃଖ କହିଲା ବେଳେ ବନ୍ଧ ମାନୁନି ଲୁହ, କାନ୍ଥକୁ ଆଉଜି ଘର ଖୁଣ୍ଟରେ ମୁଣ୍ଡ ପିଟୁଛି କୋହ…
Kanak News is now on WhatsApp
Join and get latest news updates delivered to you via WhatsApp
ତିନି ବର୍ଷ ତଳୁ ସ୍ୱାମୀ ଚାଲିଯିବା ପରେ ତଳିତଳାନ୍ତ ହୋଇଛନ୍ତି ରାଣୀଲତା । ମାତ୍ର ୪୦ ବର୍ଷ ବୟସରୁ ହାତରୁ ସଙ୍ଖା ଭାଙ୍ଗିଛି, ମଥାରୁ ସିନ୍ଦୂର ଲିଭିଛି । ଗୋଟିଏ ପଟେ ସ୍ୱାମୀଙ୍କୁ ହରାଇବାର ଦୁଃଖ ଆଉ ଅନ୍ୟପଟେ ଚାରି ଚାରିଟି ଝିଅଙ୍କ ପେଟରେ ଦାନା ଯୋଗାଡର ଦାୟିତ୍ୱ । ନାରୀଟିଏ ହୋଇଥିବାରୁ ଆଉ ଘରେ ସାଇତା ସମ୍ପତ୍ତି ନଥିବାରୁ ନିଇତି ଯନ୍ତ୍ରଣା ଜୁଇରେ ଜଳୁଛନ୍ତି କେନ୍ଦ୍ରାପଡା ଜିଲ୍ଲା ରାଜନଗର ଦିଘିଗାଁର ରାଣୀଲତା ବାରିକ ।
ସ୍ୱାମୀ ଗଲା ପରେ ଝାଟିମାଟି ଘରେ ଦୁଃଖକଷ୍ଟରେ ଚଳିଯାଉଥିଲେ ସମସ୍ତେ । ଓଳିଏ ଖାଇଲେ ଓଳିଏ ଉପାସ ରହିଲେବି ଦୁଃଖ ନଥିଲା । କାରଣ ସେମାନେ ରାତିରେ ଶାନ୍ତିରେ ଶୋଇ ପାରୁଥିଲେ । ୪ଟି ଝିଅଙ୍କୁ ନେଇ ନିର୍ଭୟରେ ରାତି କାଟୁଥିଲେ ରାଣୀଲତା । ହେଲେ ଏବେ ବାତ୍ୟା ବୁଲବୁଲ ଚାଳ ଛପର ଉଡାଇ ନେବା ପରେ ଭାଙ୍ଗି ଯାଇଛି ଘର । ଜୁ ନଥିବା ହାତରେ ଭଙ୍ଗା ଘରକୁ ଯେତେ ସଜାଡିଲେ ବି ନା ସେ ସଜାଡି ହେଉଛି ନା ସୁରକ୍ଷିତ ରହୁଛି । ପୁରୁଷ ଶୂନ୍ୟ ଏ ଚାରିକାନ୍ଥ ଭିତରେ ଚାରି ଝିଅଙ୍କ ସୁରକ୍ଷା ପାଇଁ ରାତି ଅନିଦ୍ରା ହେଉଛନ୍ତି ରାଣୀଲତା । ତେବେ ରାଣୀଙ୍କ ସମସ୍ୟା କଥା ଶୁଣିବା ପରେ ଖୁବଶୀଘ୍ର ସବୁ ସମସ୍ୟାର ସମାଧାନ କରିବାକୁ ପ୍ରତିଶ୍ରୁତି ଦେଇଛନ୍ତି ଜିଲ୍ଲାପାଳ ।