କିଏ ହେବ ବିଜେପୁରର ବାଜିଗର ? ସରିଲା ମତଦାନ, ଇଭିଏମରେ ସିଲ୍ ହେଲା ପ୍ରାର୍ଥୀଙ୍କ ଭାଗ୍ୟ, ୨୪ରେ ଆସିବ ଆଶା ଆଶଙ୍କାର ଚୂଡାନ୍ତ ପରିଣାମ ।
କନକ ବ୍ୟୁରୋ : ବିଜେପୁରରେ ଉପନିର୍ବାଚନ ଶେଷ ହୋଇଛି । ଦେଢବର୍ଷ ଭିତରେ ତିିନି ତିନି ଥର ମତଦାନ କରିଥିବା ବିଜେପୁର ବାସୀ ନୂଆ ବିଧାୟକ ବାଛିସାରିଛନ୍ତି । ବିଜେପୁରବାସୀଙ୍କ ନିଷ୍ପତି ଇଭିଏମରେ ସିଲ୍ ହୋଇସାରିଥିବା ବେଳେ ଆସନ୍ତା ୨୪ ତାରିଖରେ ଫଳାଫଳ ପ୍ରକାଶ ପାଇବ । ଏବଂ ସେଦିନ ସ୍ପଷ୍ଟ ହୋଇଯିବ, ବିଜେପୁରରେ ବାଜି ମାରିଲା କିଏ । ରିତା ସାହୁ, ସନତ ଗଡତିଆ ନା ଦିଲ୍ଲୀପ ପଣ୍ଡା । ତେବେ ତିନି ଦଳର ଦମ୍ଭୋକ୍ତି, ବିଜେପୁରରେ ବିଜୟୀ ହେବେ ।
Kanak News is now on WhatsApp
Join and get latest news updates delivered to you via WhatsApp
ସମସ୍ତ ରାଜନୈତିକ ଦଳ ଗୁଡିକର ଦମ୍ଭୋକ୍ତି ଭିତରେ ବଡ ପ୍ରଶ୍ନ ଉଠୁଛି, କାହା ସପକ୍ଷରେ ଭୋଟ୍ ଦେଲା ବିଜେପୁର ? ନବୀନ, ଧର୍ମେନ୍ଦ୍ର ନା’ ନିରଞ୍ଜନ ? ମତଦାନ କେନ୍ଦ୍ରରେ ଲମ୍ବିଥିବା ଲମ୍ବା ଲାଇନ ଏବଂ ଇଭିଏମରେ ପଡିଥିବା ଭୋଟ୍, ନିର୍ଣ୍ଣୟ କରିବ ବିଜେପୁରର ପରବର୍ତୀ ବିଧାୟକ ହେବ କିଏ ? ରୀତା ସାହୁ, ସନତ ଗଡ଼ତିଆ ଏବଂ ଦିଲ୍ଲୀପ ପଣ୍ଡା, ମୁକାବିଲାର ମୈଦାନରେ ତିନି ପ୍ରମୁଖ ଦଳର ଚେହେରା । କିନ୍ତୁ ପ୍ରଚ୍ଛଦପଟରେ ବିଜେଡି ସୁପ୍ରିମୋ ନବୀନ ପଟ୍ଟନାୟକ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏବଂ ପିସିସି ସଭାପତି ନିରଞ୍ଜନ ପଟ୍ଟନାୟକ । କାହା ସପକ୍ଷରେ ଭୋଟ୍ ଦେଲା ବିଜେପୁର ?
ପ୍ରାର୍ଥୀଙ୍କ ଦମ୍ଭୋକ୍ତି ଭିତରେ ପ୍ରାୟ ଦେଢ଼ବର୍ଷ ଭିତରେ ୩-୩ଟି ନିର୍ବାଚନ ଦେଖିସାରିଛି ବିଜେପୁର । ଆଉ ଏହାରି ଭିତରେ ବିଜେପୁର ମନ ପରିବର୍ତନ କରିଛି ନା’ ମନୋବଳ ଦୃଢ଼ ରଖିଛି, ତାହା ଆସନ୍ତା ୨୪ ତାରିଖରେ ସ୍ପଷ୍ଟ ହୋଇଯିବ, ଯେତେବେଳେ ଉପ-ନିର୍ବାଚନର ଫଳାଫଳ ସାମ୍ନାକୁ ଆସିବ । ୫ ପ୍ରାର୍ଥୀଙ୍କ ଭାଗ୍ୟ ନିର୍ଣ୍ଣୟ କରିଛନ୍ତି ୨ଲକ୍ଷ ୩୨ ହଜାର ଭୋଟର । ଆଉ ଏବେ ଇଭିଏମରେ ସିଲ୍ ହୋଇ ରହିଛି ଆଶା-ଆଶଙ୍କାର ଚୁଡ଼ାନ୍ତ ପରିଣାମ । ଆଉ ଯେତେବେଳେ ଇଭିଏମ୍ ଖୋଲିବ ବିଜେପୁର ବାଜିର ବାଦଶାହା କିଏ, ତାହା ସ୍ପଷ୍ଟ ହୋଇଯିବ ।
ଏପଟେ ଅତି ବ୍ୟବସ୍ଥିତ ଭାବରେ ନିର୍ବାଚନ ପ୍ରକ୍ରିୟାକୁ ଶେଷ କରିଛି ପ୍ରଶାସନ । ଦିବ୍ୟାଙ୍ଗମାନଙ୍କ ପାଇଁ ଗାଡ଼ି, ଭୋଟରଙ୍କୁ ଆକର୍ଷିତ କରିବା ପାଇଁ ମଡ଼େଲ ବୁଥ, ସମ୍ବେଦନଶୀଳ ବୁଥ ଉପରେ କଡ଼ା ନଜର ଏବଂ ମାଓ ପ୍ରଭାବିତ ବୁଥ ଗୁଡ଼ିକରେ ବ୍ୟାପକ ସୁରକ୍ଷା ବ୍ୟବସ୍ଥା କରିଥିଲା ରାଜ୍ୟ ନିର୍ବାଚନ କାର୍ଯ୍ୟାଳୟ । ଆଉ ଏବେ ଅପେକ୍ଷା ବିଜେପୁର ଫଳାଫଳକୁ । ଆଉ ଫଳାଫଳ ହିଁ ସ୍ପଷ୍ଟ କରିବ, ବିଜେପୁରରେ ବିଜେଡିର ଶଙ୍ଖ ବାଜିବ ? ବିଜେପିର ପଦ୍ମଫୁଟିବ ? ନା’ କଂଗ୍ରେସର ହାତ ଆସିବ ?