ଆଶା-ନିରାଶାର ‘ବିଜେପୁର’: ଯିଏ ବିଶ୍ୱାସ ଜିତିବ, ସିଏ ବିଜୟୀ ହେବ । ତିନି ଦଳରୁ କାହାକୁ ତଥାସ୍ତୁ କରିବେ ବିଜେପୁରବାସୀ ?
କନକ ବ୍ୟୁରୋ: କିଏ ଜିତିବ ବିଜେପୁର ବାଜି ? କିଏ ହେବ ବିଜେପୁର ବାଦସାହା? ୨୪ରେ ବିଜେପୁର ନୂଆ ବିଧାୟକ ପାଇବାକୁ ଥିବା ବେଳେ ଆଜି ଚାଲିଛି ବିଜେପୁର ପାଇଁ ବଡ ପରୀକ୍ଷା । ଗଡ ଦଖଲ ପାଇଁ ୩ ପ୍ରମୁଖ ରାଜନୈତିକ ଦଳ ପ୍ରାଣମୂର୍ଚ୍ଛା ଉଦ୍ୟମ କରିଥିବା ବେଳେ ଆଜି ନେତାଙ୍କ ଭାଗ୍ୟ ଇଭିଏମରେ କଏଦ କରୁଛନ୍ତି ଜନତା । ତେବେ ଗୋଟିଏ ପଟେ ମତଦାନ ଚାଲିଥିବା ବେଳେ ଅନ୍ୟପଟେ ମତାମତ ଦେଇଛନ୍ତି ଦଳୀୟ ନେତା ।
Kanak News is now on WhatsApp
Join and get latest news updates delivered to you via WhatsApp
ବିଜେପୁରରେ ବିଜେଡି ଭଲ ପ୍ରଦର୍ଶନ କରିବ ବୋଲି ପୂର୍ବରୁ ବିଜେଡି ବାରମ୍ବାର ଦମ୍ଭୋକ୍ତି ଦେଖାଇ ଆସିଥିବା ବେଳେ ଆଜି ପୁଣି ଦମ୍ଭ ଦେଖାଇଛନ୍ତି ବିଜେଡି ନେତା ସମୀର ଦାଶ । ବିଜେପୁରରେ ଆମେ ଭଲ କରିବୁ । ଲୋକେ ଆମ ଉପରେ ଆସ୍ଥା ପ୍ରକଟ କରିଛନ୍ତି । ବିଜେପୁରରେ ଆମେ ବହୁତ ପରିଶ୍ରମ କରିଛୁ ତେଣୁ ଆମେ ନିଶ୍ଚୟ ଜିତିବୁ ବୋଲି ସମୀର କହିଛନ୍ତି । ତେବେ କେତେ ମାରଜିନରେ ଜିତିବୁ ବର୍ତ୍ତମାନ କହିହେବନି ମାତ୍ର ୨୦୧୮-୧୯ ଠାରୁ ଏଥର ଅଧିକ ଭୋଟରେ ଜିତିବୁ ବୋଲି ସମୀର ଆଶା ରଖିଛନ୍ତି ।
ସେପଟେ ବିଜେପୁର ନେଇ ନିରାଶ ଅଛି କଂଗ୍ରେସ । ବିଜେପୁର ପରୀକ୍ଷାରେ କଂଗ୍ରେସ ପାସ୍ ହୋଇପାରିବନି ବୋଲି ତାରା ସଂକେତ ଦେଇଛନ୍ତି । ବିଜେପୁରରେ ହାତର ସ୍ଥିତି ଭଲ ନଥିବା କଂଗ୍ରେସ ବିଧାୟକ ତାରା ବାହୀନିପତି କହିଥିବା ବେଳେ ୨୦ ଲକ୍ଷ ଟଙ୍କାରେ ନିର୍ବାଚନ ଲଢୁଥିବା ଦଳର ଭାଗ୍ୟ କଣ ହେବ ଭଗବାନ ଜାଣନ୍ତି ବୋଲି କହି ପରୋକ୍ଷରେ ପରାଜୟକୁ ସ୍ୱୀକାର କରିଛନ୍ତି ତାରା । ମାତ୍ର ହାରିବା କଥା କହୁଥିବା ସୁର ‘ବିବେକ’ ଭୋଟ କଥା ଉଠାଇ ବିଜେପୁର ବିଜୟ ପାଇଁ ଆଶାବାଦୀ ଅଛନ୍ତି ।
ବିଜେପି ମଧ୍ୟ ଗତଥର ପରାଜୟରୁ କିଛି ଶିକ୍ଷାକରି ଏଥର ଗଡ ଦଖଲ ପାଇଁ ଜଗିଛକି ଗୋଟି ଚାଳନା କରିଛି । ଯେଉଁଠି ଯେଉଁଠି ଦଳ ଦୁର୍ବଳ ସ୍ଥିତିରେ ଥିଲା ସେଠି ସବୁ ପ୍ରକାର ବଳ ଖଟାଇ ଏଥର ବିଜେପୁର ମାଟିରେ ପଦ୍ମ ଫୁଟାଇବ ବୋଲି ବିଜେପି ଆଶା ବାନ୍ଧି ବସିଛି । ତେଣୁ ଆଶା-ନିରାଶା ଭିତରେ ତିନି ଦଳ ଥିବା ବେଳେ ବିଜେପୁରବାସୀ କାହାକୁ ବିଜୟୀଭବଃ କହୁଛନ୍ତି ତାରି ଉପରେ ନଜର ।