ଚଳିତ ବିଶ୍ୱକପରେ ଆହତ ସମସ୍ୟା ଭାରତୀୟ ଟିମ୍ ପାଇଁ ଚିନ୍ତାର କାରଣ ପାଲଟିଛି । ଗୋଟିଏ ପଟେ ଦମଦାର ଫର୍ମରେ ଥିବା ଶିଖର ଧୱନ ଆହତ ହୋଇ ବିଶ୍ୱକପ ଅଧାରୁ ଟିମରୁ ବାଦ୍ ପଡିଥିବା ବେଳେ ଦ୍ରୁତ ବୋଲର ଭୁବନେଶ୍ୱର କୁମାର ମଧ୍ୟ ପାକିସ୍ତାନ ବିପକ୍ଷ ମ୍ୟାଚରେ ଆହତ ହୋଇଛନ୍ତି । ଏସବୁ ଭିତରେ ଆହତ ତାଲିକାରେ ବିଜୟ ଶଙ୍କରଙ୍କ ନାଁ ମଧ୍ୟ ଯୋଡି ହୋଇଯାଇଛି । ଗତକାଲି ପ୍ରାକ୍ଟିସ ସେସନ ସମୟରେ ବିଜୟ ଶଙ୍କରଙ୍କ ଗୋଡରେ ଆଘାତ ଲାଗିଥିବା ଖବର ସାମ୍ନାକୁ ଆସିଛି ।
Kanak News is now on WhatsApp
Join and get latest news updates delivered to you via WhatsApp
ଷ୍ଟାର ଅଲରାଉଣ୍ଡର ବିଜୟ ଶଙ୍କରଙ୍କ ଆଘାତ ସେତେଟା ଗୁରୁତର ନଥିଲେ ମଧ୍ୟ ଭାରତ ପାଇଁ ଚିନ୍ତାର କାରଣ ପାଲଟିଛି । କାରଣ ବିଶ୍ୱକପରେ ଭାରତ ଯେତିକି ଆଗକୁ ବଢୁଛି, ଆହତ ସମସ୍ୟା ମଧ୍ୟ ସେତିକି ବଢିବାରେ ଲାଗିଛି । ବୁଧବାର ଅଭ୍ୟାସ କରୁଥିବା ବେଳେ ଯଶପ୍ରୀତ ବୁମରାହଙ୍କ ୟର୍କର ବଲ ବିଜୟ ଶଙ୍କରଙ୍କ ଗୋଡରେ ବାଜିଥିଲା । ବଲ୍ ଆଙ୍ଗୁଠିରେ ବାଜିବା ପରେ କିଛି ସମୟ ପାଇଁ ଅଭ୍ୟାସରୁ ଦୂରେଇ ରହିଥିଲେ ବିଜୟ । ତେବେ ମିଳିଥିବା ସୁତ୍ର ଅନୁଯାୟୀ, ବିଜୟ ଶଙ୍କରଙ୍କ ଗୋଡରେ ଲାଗିଥିବା ଆଘାତ ସେତେଟା ଗୁରୁତର ନୁହେଁ ବୋଲି ଭାରତୀୟ ଟିମ୍ ପକ୍ଷରୁ କୁହାଯାଇଛି ।
ଏହାପୂର୍ବରୁ ଶିଖର ଧୱନ ଆହତ ହୋଇ ବିଶ୍ୱକପରୁ ବାଦ୍ ପଡିଥିବା ବେଳେ ତାଙ୍କ ବଦଳ ଖେଳାଳି ଭାବେ ଋଷଭ ପନ୍ତଙ୍କୁ ସାମିଲ କରାଯାଇଛି । ସେହିଭଳି ଭୁବନେଶ୍ୱର କୁମାରଙ୍କ ଆହତ ହୋଇଥିବାରୁ ଆଗାମୀ କିଛି ମ୍ୟାଚ୍ ନ ଖେଳିପାରନ୍ତି । ତେବେ ଇଂଲଣ୍ଡ ବିପକ୍ଷ ମ୍ୟାଚ୍ ପୂର୍ବରୁ ଭୁବନେଶ୍ୱର ଠିକ୍ ହୋଇଯାଇପାରନ୍ତି ବୋଲି ଟିମ୍ ମ୍ୟାନେଜମେଣ୍ଟ ପକ୍ଷରୁ କୁହାଯାଇଛି । ଯଦି ଭୁବନେଶ୍ୱର କୁମାରଙ୍କ ଆଘାତ ଠିକ୍ ନ ହୁଏ ତେବେ ଷ୍ଟାଣ୍ଡବାଇରେ ଥିବା ଖଲିଲ ଅହମ୍ମଦଙ୍କୁ ମଧ୍ୟ ଟିମରେ ସାମିଲ କରାଯାଇପାରେ । ଏପରିକି ଅନୁଭବୀ ଇଶାନ୍ତ ଶର୍ମାଙ୍କୁ ମଧ୍ୟ ବିଶ୍ୱକପ ପାଇଁ ଡାକରା ଆସିପାରେ ।