ରେଡିଓ କଲାର ରୋକିବ ହାତୀ-ମଣିଷ ଯୁଦ୍ଧ: ଦୁର୍ଦ୍ଦାନ୍ତ ହାତୀଙ୍କ ଗତିବିଧି ସହ ସେମାନଙ୍କ ଭାଷା ବୁଝିବାକୁ ବେକରେ ଲାଗିବ ସ୍ୱତନ୍ତ୍ର ଯନ୍ତ୍ର
କନକ ବ୍ୟୁରୋ: ତିନି ଦୁର୍ଦ୍ଦାନ୍ତ ହାତୀଙ୍କ ଦେହରେ ଲାଗିବ ରେଡିଓ କଲାର । ଅନଗୁଳ ଓ ଦେବଗଡ ଜିଲ୍ଲାରେ ଆତଙ୍କ ସୃଷ୍ଟି କରିଥିବା ୩ ହାତୀଙ୍କ ଗତିବିଧି ଉପରେ ଲକ୍ଷ୍ୟ ରଖି ନିଆଯିବ ପ୍ରତିଶେଧକ ପଦକ୍ଷେପ । ଏହା ସହିତ ହାତୀଙ୍କ ଭାଷା ବୁଝିବାକୁ ଚେଷ୍ଟା କରିବ ବନବିଭାଗ । ଆଉ ଏଥିପାଇଁ ସହଯୋଗ କରିବ ଆଇଆଇଟି । ଏକ ନୂତନ ଇନଫ୍ରା ରେଞ୍ଜ ଯନ୍ତ୍ର ସାହାଯ୍ୟରେ ହାତୀର ଶଦ୍ଦକୁ ଦୂରରୁ ଜାଣିପାରିବେ ବନ କର୍ମଚାରୀ । ହାତୀ ୫ କିଲୋମିଟର ଦୂରରେ ଥିଲେ ବି ସେମାନଙ୍କ ଭାଷା ଓ ଗତିବିଧିକୁ ଏହି ଯନ୍ତ୍ର ଦ୍ୱାରା ଜାଣିହେବ ।
Kanak News is now on WhatsApp
Join and get latest news updates delivered to you via WhatsApp
ତେବେ ଜଙ୍ଗଲୀ ହାତୀଙ୍କ ଶବ୍ଦ ବୁଝି ସେହି ତଥ୍ୟ ଅନୁସାରେ ସାଧାରଣ ଲୋକଙ୍କୁ ସତର୍କ କରାଯିବ ।ଫଳରେ ହାତୀ-ମଣିଷ ଭିତରେ ହେଉଥିବା ଲଢେଇରେ ରୋକ ଲାଗିପାରିବ । ରାଜ୍ୟରେ ହାତୀଙ୍କ ଚଳପ୍ରଚଳକୁ ଅନୁଧ୍ୟାନ କରିବା ପରେ କନ୍ଧମାଳ ଓ ଗଞ୍ଜାମ ଜିଲ୍ଲାର ସୀମାନ୍ତ ଜଙ୍ଗଲକୁ ନୂତନ ହାତୀ ଅଭୟାରଣ୍ୟ ଘୋଷଣା କରିବାକୁ ଉଦ୍ୟମ ଆରମ୍ଭ କରିଛନ୍ତି ରାଜ୍ୟ ସରକାର ।
ହାତୀଙ୍କ ସଂଖ୍ୟା ବୃଦ୍ଧି ଉପରେ ଗୁରୁତ୍ୱ ନଦେଇ ପ୍ରଥମେ ରାଜ୍ୟରେ ଥିବା ହାତୀଙ୍କ ସୁରକ୍ଷା ଦରକାର ବୋଲି ରାଜଧାନୀରେ ଆୟୋଜିତ କର୍ମଶାଳାରେ ମତ ରଖିଛନ୍ତି ଆନ୍ତର୍ଜାତୀୟ ସ୍ତରରେ ସୁନାମ ଲାଭ କରିଥିବା ହସ୍ତୀ ବିଶେଷଜ୍ଞ ଡଃ ରମଣ ସୁକୁମାର । ରାଜ୍ୟରେ ଥିବା ତିନୋଟି ହସ୍ତୀ ଅଭୟାରଣ୍ୟ ମଧ୍ୟରୁ ଶିମିଳିପାଳ ବନାଚଂଳ ହାତୀଙ୍କ ପାଇଁ ସୁରକ୍ଷିତ ଅଛି । କିନ୍ତୁ ମହାନଦୀ ବନାଚଂଳ ଓ ସମ୍ବଲପୁର ବନାଚଂଳର ପରିସୀମା ବୃଦ୍ଧି କରିବା ସହ ଏହି ଦୁଇ ଅଭୟାରଣ୍ୟ ମଧ୍ୟରେ ବାଧାରହିତ କରିଡର ସ୍ଥାପନ କରିବା ପାଇଁ ମଧ୍ୟ ସେ ଅନୁରୋଧ କରିଛନ୍ତି ।
୨୦୧୭ ହାତୀଗଣନା ଅନୁସାରେ ରାଜ୍ୟରେ ସମୁଦାୟ ୧୯୭୬ ହାତୀ ଥିବା ବନବିଭାଗ ଆକଳନ କରିଛି । ବର୍ତ୍ତମାନ ରାଜ୍ୟର ଜଙ୍ଗଲର ଘନତାକୁ ଅନୁଧ୍ୟାନ କଲେ ଓଡିଶାରେ ୨ ହଜାର ହାତୀ ରହିପାରିବେ । କିନ୍ତୁ ଏଥିପାଇଁ ଅନେକ ପଦକ୍ଷେପ ନେବାକୁ ପଡିବ ଯାହା ଫଳରେ ଧନଜୀବନ ସହ ହାତୀ ମୃତ୍ୟୁ ଉପରେ ମଧ୍ୟ ଅଙ୍କୁଶ ଲାଗିପାରିବ ।