ପଶ୍ଚିମ ଓଡ଼ିଶାରେ ବଢୁଛି ତାତିି : ଟିଟିଲାଗଡ ଓ ତାଳଚେରରେ ସର୍ବାଧିକ ତାପମାତ୍ରା ରେକର୍ଡ
କନକ ବ୍ୟୁରୋ : ପଶ୍ଚିମ ଓଡ଼ିଶାର ଅଧିକାଂଶ ସହର ତାପମାତ୍ରା ୩୮ ଡିଗ୍ରି ଉପରକୁ ଚାଲିଯାଇଥିବା ବେଳେ ଲଗାତାର ଦ୍ୱିତୀୟ ଦିନ ଲାଗି ଟିଟିଲାଗଡ଼ ତତଲା ସହର ପାଲଟିଥିଲା । ତାଳଚେରର ତାପମାତ୍ରା ମଧ୍ୟ ବୃଦ୍ଧି ପାଇଥିଲା। ଏଠାରେ ଗତକାଲିର ତାପମାତ୍ରା ୪୦ ଡିଗ୍ରି ଛୁଇଁଥିଲା । ଟିଟିଲାଗଡ଼ ଓ ତାଳଚେର ରାଜ୍ୟର ଉତ୍ତପ୍ତ ସହର ଭାବେ ପରିଗଣିତ ହେବା ସହ ଦେଶର ସର୍ବୋଚ୍ଚ ତାପମାତ୍ରା ମଧ୍ୟ ଏହି ଦୁଇ ସହରରେ ରେକର୍ଡ କରାଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଓଡ଼ିଶାର ଉକ୍ତ ଦୁଇ ସହର ସମେତ ରୟାଲସୀମାର କୋଠାଗୁଡେମ୍, ତେଲେଙ୍ଗାନାର କୁରନୁଲ, ତାମିଲନାଡ଼ୁର ମଦୁରାଇ ସହର ତାପାମତ୍ରା ୪୦ ଡିଗ୍ରି ରହିଥିଲା। ଏହି ସମୟରେ ଜମ୍ମୁ ଓ କାଶ୍ମୀର, ଉତ୍ତର ପ୍ରଦେଶ ଓ ତାମିଲନାଡ଼ୁର ତାପମାତ୍ରା ଯେତିକି ରହିବା କଥା ତା’ଠାରୁ ୩.୧ ଡିଗ୍ରିରୁ ୫ ଡିଗ୍ରି ପର୍ଯ୍ୟନ୍ତ ଅଧିକ ରହୁଛି। ସେହିପରି ଏହି ସମୟରେ ଓଡ଼ିଶାର ତାପମାତ୍ରା ଯେତିକି ରହିବା କଥା ତା’ଠାରୁ ୩ ଡିଗ୍ରି ପର୍ଯ୍ୟନ୍ତ ଅଧିକ ରହୁଛି। ଓଡ଼ିଶା ସମେତ ବିହାର, ଛତିଶଗଡ଼, ପଶ୍ଚିମ ଉତ୍ତର ପ୍ରଦେଶ, ଝାରଖଣ୍ଡ ଏବଂ ଜମ୍ମୁ ଓ କାଶ୍ମୀରର କିଛି ଅଂଶରେ ତାପମାତ୍ରା ମଧ୍ୟ ୩ ଡିଗ୍ରି ପର୍ଯ୍ୟନ୍ତ ଅଧିକ ରହୁଥିବା ନେଇ ଭାରତୀୟ ପାଣିପାଗ ବିଭାଗ ପକ୍ଷରୁ ସୂଚନା ଦିଆଯାଇଛି।
ତାଳଚେର, ଟିଟିଲାଗଡ଼ ବ୍ୟତୀତ ଅନୁଗୁଳ ଓ ବଲାଙ୍ଗୀରର ତାପମାତ୍ରା ୩୯.୭ ଡିଗ୍ରି ରେକର୍ଡ କରାଯାଇଥିଲା। ଭବାନୀପାଟଣାରେ ୩୯.୫, ମାଲକାନଗିରିରେ ୩୯.୪, ବାରିପଦାରେ ୩୮.୪, ଝାରସୁଗୁଡ଼ା ଓ ହୀରାକୁଦରେ ୩୮.୩, ସମ୍ବଲପୁରରେ ୩୮, ସୋନପୁରରେ ୩୭.୮, ଢ଼େଙ୍କାନାଳରେ ୩୭.୪, କେନ୍ଦୁଝରଗଡ଼ ଓ ଫୁଲବାଣୀରେ ୩୭ ଡିଗ୍ରି ରେକର୍ଡ ହୋଇଥିଲା । ଆସନ୍ତା ମାର୍ଚ୍ଚ ୩୦ ପର୍ଯ୍ୟନ୍ତ ସାରା ରାଜ୍ୟରେ ତାତି ଜାରି ରହିବ। ୨୭ରୁ ରାଜ୍ୟର ଅଧିକାଂଶ ସହରର ତାପମାତ୍ରା ୪୦ ଡିଗ୍ରି ଉପରକୁ ଚାଲିଯିବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର।