ଉନ୍ନାଓ ଓ ହାଇଦ୍ରାବାଦ ପରେ ପୁଣି ଯୌନ ରାକ୍ଷସର ଶିକାର ହେଲେ ଯୁବତୀ । ଦୁଷ୍କର୍ମ ପରେ କିରୋସିନ ଢାଳି ଜିଅନ୍ତା ଜାଳିଦେବାକୁ ସର୍ମ୍ପକୀୟ ଯୁବକଙ୍କ ଉଦ୍ୟମ, ମୃତ୍ୟୁ ସଂଗ୍ରାମ କରୁଛନ୍ତି ପୀଡିତା ।
ଉନ୍ନାଓ ଓ ହାଇଦ୍ରାବାଦ ଯୁବତୀଙ୍କୁ ଗଣଦୁଷ୍କର୍ମ ଓ ଜିଅନ୍ତା ଜାଳି ହତ୍ୟା କରିବାର ଦିନ କେଇଟା ନ ବିତୁଣୁ ପୁଣିଥରେ ସେହିଭଳି ଏକ ହୃଦୟ ବିଦାରକ ଘଟଣା ସାମ୍ନାକୁ ଆସିଛି । ଶନିବାର ଉତ୍ତରପ୍ରଦେଶର ଫତେହପୁରରେ ଜଣେ ଯୁବତୀଙ୍କୁ ଦୁଷ୍କର୍ମ କରିବା ସହ ନିଆଁ ଲଗାଇ ଦେଇଛନ୍ତି । ଗୁରୁତର ଅବସ୍ଥାରେ ପୀଡିତାଙ୍କୁ କାନପୁର ମେଡିକାଲକୁ ସ୍ଥାନାନ୍ତର କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ପୋଲିସ ସୂଚନା ଅନୁଯାୟୀ, ଯୁବତୀ ଜଣକ ଘରେ ଏକା ଥିବାର ସୁଯୋଗ ନେଇ ଘରକୁ ଆସିଥିଲେ ସର୍ମ୍ପକୀୟ ଯୁବକ । ଯୁବତୀ ଜଣଙ୍କୁ ଦୁଷ୍କର୍ମ କରିବା ପରେ ଯେପରି ଘଟଣା ପ୍ରଘଟ ନ ହୁଏ ସେଥିପାଇଁ ଯୁବତୀଙ୍କ ଉପରେ କିରୋସିନ ଢାଳି ନିଆଁ ଲଗାଇଦେଇଥିଲେ । ଆଉ ଯୁବତୀ ଜଣଙ୍କ ନିଆଁରେ ପୋଡି ହୋଇ ଚିତ୍କାର କରୁଥିବା ବେଳେ ସର୍ମ୍ପକୀୟ ଯୁବକ ଜଣକ ସେଠାରୁ ଫେରାର ହୋଇଯାଇଥିଲେ । ତେବେ ଝିଅ ନିଆଁରେ ଜଳୁଥିବାର ଦେଖି ପଡୋଶୀ ଦୌଡି ଆସିବା ନିଆଁ ଲିଭାଇଥିଲେ ।
ନିଆଁ ଲିଭାଇବା ସଙ୍ଗେ ସଙ୍ଗେ ପୀଡିତା ଯୁବତୀଙ୍କୁ ହସ୍ପିଟାଲ ନିଆଯାଇଥିଲା । ତେବେ ସେଠାରେ ପୀଡିତାଙ୍କ ଅବସ୍ଥା ଗୁରୁତର ହେବାରୁ ସଙ୍ଗେ ସଙ୍ଗେ କାନପୁର ସ୍ଥାନାନ୍ତର କରାଯାଇଥିଲା । ଯୁବତୀ ଜଣକ ଶରୀର ୯୦ ପ୍ରତିଶତ ଜଳି ଯାଇଥିବା ବେଳେ ପୋଲିସ ଏହି ଘଟଣାର ଯାଞ୍ଚ ଆରମ୍ଭ କରିଛି ।
ଏହି ଘଟଣାର ଅଭିଯୁକ୍ତଙ୍କୁ ଧରିବା ପାଇଁ ପୋଲିସ ଜାଲ ବିଛାଇଛି । ଗ୍ରାମବାସୀଙ୍କ ସୂଚନା ଆଧାରରେ ଅଭିଯୁକ୍ତଙ୍କୁ ଧରିବା ପାଇଁ ପୋଲିସ ୫ଟି ଟିମ୍ ଗଠନ କରିଛି । ଏପରିକି ଅଭିଯୁକ୍ତଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ନିଆଯିବ ବୋଲି ପ୍ରତିଶ୍ରୁତି ଦେଇଛି ।