ରବିବାର ସକାଳେ ତାମିଲନାଡୁର ବିଜେପି ସଭାପତି ଡକ୍ଟର ତାମିଲିସାଇ ସୌନ୍ଦରରାଜନ ତେଲେଙ୍ଗାନାର ଦ୍ୱିତୀୟ ରାଜ୍ୟପାଳ ଭାବେ ଶପଥ ଗ୍ରହଣ କରିଛନ୍ତି। ତେଲେଙ୍ଗାନା ହାଇକୋର୍ଟର ମୁଖ୍ୟ ବିଚାରପତି ରାଘବେନ୍ଦ୍ର ସିଂହ ଚୌହାନ ରାଜଭବନରେ ଆୟୋଜିତ ସଂକ୍ଷିପ୍ତ ଉତ୍ସବରେ ତାମିଲିସାଇଙ୍କୁ ପଦ ଓ ଗୋପନୀୟତାର ଶପଥ ପାଠ କରାଇଥିଲେ। ଶପଥ ନେବା ପରେ ତାମିଲିସାଇ ତାଙ୍କ ପିତାମାତାଙ୍କ ଚରଣ ସ୍ପର୍ଶ କରି ଆଶୀର୍ବାଦ ଗ୍ରହଣ କରିଥିଲେ।
Kanak News is now on WhatsApp
Join and get latest news updates delivered to you via WhatsApp
ତେଲେଙ୍ଗାନା ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ, ତାଙ୍କ କ୍ୟାବିନେଟ୍ ସହଯୋଗୀବୃନ୍ଦ, ବିଧାନସଭା ବାଚସ୍ପତି ପୋଚାରାମ ଶ୍ରୀନିବାସ ରେଡ୍ଡୀ, ହିମାଚଳ ପ୍ରଦେଶ ରାଜ୍ୟପାଳ ଭାବେ ମନୋନୀତ ବନ୍ଦାରୁ ଦତ୍ତାତ୍ରେୟ, ଗୃହ ରାଷ୍ଟ୍ର କେନ୍ଦ୍ରମନ୍ତ୍ରୀ ଜି କିଷନ ରେଡ୍ଡୀ, ତାମିଲନାଡୁର ପୂର୍ବତନ ମୁଖ୍ୟମନ୍ତ୍ରୀ ଓ ପନ୍ନେ ସେଲ୍ଭାନ୍, ହାଇଦ୍ରାବାଦର ମେୟର୍ ବୋନ୍ତୁ ରାମମୋହନ ଏବଂ ତେଲେଙ୍ଗାନା ରାଷ୍ଟ୍ର ସମିତିର ଅନ୍ୟ ବିଧାୟକ ଏବଂ ବିଭିନ୍ନ ବିରୋଧୀ ଦଳର ନେତୃବୃନ୍ଦ ଏହି ଶପଥ ଗ୍ରହଣ ଉତ୍ସବରେ ଯୋଗ ଦେଇଥିଲେ। ସପରିବାର ତାମିଲିସାଇ ହାଇଦ୍ରାବାଦର ବେଗମପେତ୍ ବିମାନ ବନ୍ଦରରେ ଅବତରଣ କରିଥିଲେ। ମୁଖ୍ୟମନ୍ତ୍ରୀ, ମନ୍ତ୍ରୀସମୂହ ଏବଂ ବରିଷ୍ଠ ଅଧିକାରୀମାନେ ରାଜ୍ୟପାଳଙ୍କୁ ଭବ୍ୟ ସ୍ୱାଗତ କରିଥିଲେ। ରାଜଭବନରେ ପହଞ୍ଚିବା ପୂର୍ବରୁ ସେ ପୁଲିସ ଠାରୁ ଅଭିବାଦନ ଗ୍ରହଣ କରିଥିଲେ।