କନକ ବ୍ୟୁରୋ : ଟମାଟୋ କିଲୋପିଛା ଦର କେବେ ୧୦୦ ତ ପୁଣିକେବେ ୨ ଟଙ୍କା । ୮ ମାସରେ ଟମାଟୋକୁ ନେଇ ଯେଉଁ ଉଦବେଗ ଜନକ ଚିତ୍ର ସାମ୍ନାକୁ ଆସିଛି ତାହା ଚାଷୀକୂଳର ଦୁରବସ୍ଥାକୁ ଦର୍ଶାଉଛି । ସମ୍ବଲପୁରରେ ଏବେ ୧ କିଲୋ ଟମାଟୋ ବିକ୍ରି ହେଉଛି ମାତ୍ର ୨ ଟଙ୍କାରେ । ପରିସ୍ଥିତି ଏମିତି ହୋଇଛି ଯେ, ଚାଷୀଙ୍କଠାରୁ ଟମାଟୋ କିଣିବାକୁ ଆଗ୍ରହ ଦେଖାଉ ନାହାନ୍ତି ବ୍ୟବସାୟୀ । ଧାର ଉଧାର କରି ଟମାଟୋ ଚାଷ କରିଥିବା ଚାଷୀ ମୂଳଧନ କେମିତି ଫେରି ପାଇବେ ସେହି ଚିନ୍ତାରେ । ପରିଣାମ ସ୍ୱରୁପ କିଆରି କିଆରି ବିଲରେ ବିଲାତି ସଢିବାକୁ ବସିଛି ।
Kanak News is now on WhatsApp
Join and get latest news updates delivered to you via WhatsApp
ଗତବର୍ଷ ଜୁନ୍ ମାସର କଥା ଯେତେବେଳେ ମନୋଜ ଆଉ ରାଧିକା ସେମାନଙ୍କ ପଂଚମ ବିବାହ ବାର୍ଷିକୀ ପାଳନ କଲାବେଳେ ଜଣେ ବନ୍ଧୁ ଦେଇଥିଲେ କିଲେ ଟମାଟୋର ଉପହାର । କାରଣ ସେତେବେଳେ ଟମାଟୋର କିଲୋପିଛା ବଜାର ଦର ଥିଲା ୧୦୦ ଟଙ୍କା । ବନ୍ଧୁ ଜଣକ ହୁଏତ ମଜା ମଜାରେ ଏହି ଉପହାର ଦେଇଥିଲେ, କିନ୍ତୁ ବନ୍ଧୁଙ୍କ ଏଭଳି ଉପହାରରେ ବେଶ ଖୁସି ହୋଇଥିଲେ ମନୋଜ ଆଉ ରାଧିକା ।
ମନୋଜ ଓ ରାଧିକାଙ୍କ ସେହି ବନ୍ଧୁ ଯଦି ଏବେ ୧୦୦ ଟଙ୍କାର ଟମାଟୋ ଉପହାର ଦେବା କଥା ଚିନ୍ତା କରନ୍ତି ତାହେଲେ ତାଙ୍କୁ ହୁଏତ ଗୋଟିଏ ଟ୍ରଲି ଭଡା କରିବାକୁ ପଡିବ । କାରଣ ସମ୍ବଲପୁରରେ ଏବେ ଚାଷୀ ଗୋଟିଏ କ୍ୟାରେଟ ଅର୍ଥାତ ୨୫ କିଲୋ ଟମାଟୋ ୫୦ ଟଙ୍କାରେ ବ୍ୟବସାୟୀଙ୍କୁ ବିକ୍ରି କରୁଛି । ଖାଲି ଦର କମିନାହିଁ ଚାହିଦା ବି କମିଯାଇଛି । ଯେତେବେଳେ ଟମାଟୋ ଦର ୧୦ ଟଙ୍କା ଥିଲା ସେତେବେଳେ ବେପାରୀ ଅଗ୍ରୀମ ଦେଇ ଚାଷୀଙ୍କଠାରୁ ଟମାଟୋ କିଣୁଥିଲେ । ଏବେ ବଜାର ଦର ଏତେ ଶସ୍ତା ଯେ ବେପାରୀ ବାକିରେ ଟମାଟୋ ଉଠାଉଛନ୍ତି ।
ଗୋଟିଏ କିଲୋ ଟମାଟୋ ଉତ୍ପାଦନ ପାଇଁ ମଞ୍ଜି, ଖତ, ସାର, ପାଣି ମଡାଇବାକୁ ବିଜୁଳିଠାରୁ ଆରମ୍ଭ କରି ଅମଳ ପାଇଁ ଶ୍ରମିକ ଓ ପରିବହନ ଖର୍ଚ୍ଚ ମିଶିଲେ ୧୦ ଟଙ୍କାରେ ବିକ୍ରି ହେଲେ ମଧ୍ୟ ମୂଳଧନ ଉଠିବା ମୁସ୍କିଲ । ସେଠି କିଲେ ଟମାଟୋ ୨ ଟଙ୍କାରେ ବିକ୍ରି କରିବାକୁ ବାଧ୍ୟ ହେଉଛନ୍ତି ଚାଷୀ । ବେପାରୀଙ୍କୁ ନଦେଇ ନିଜେ ବଜାରରେ ବିକ୍ରିକଲେ ଅଢେଇ କିଲୋକୁ ୧୦ ଟଙ୍କାରେ ବିକ୍ରି କରିବାକୁ ପଡୁଛି । ନିକଟରେ କେନ୍ଦ୍ର ସରକାର ଚାଷୀର ସମସ୍ତ ଉତ୍ପାଦର ସର୍ବନିମ୍ନ ସହାୟକ ମୂଲ୍ୟ ଦୁଇଗୁଣା କରିବାକୁ ଘୋଷଣା କରିଥିଲେ । ରାଜ୍ୟ ସରକାର ମଧ୍ୟ ପ୍ରତିବର୍ଷ ଅଲଗା ଭାବେ କୃଷି ବଜେଟ ଉପସ୍ଥାପନ କରୁଛନ୍ତି । ହେଲେ ପନିପରିବା ଚାଷ କରୁଥିବା ଚାଷୀଙ୍କ ଉତ୍ପାଦିତ ସାମଗ୍ରୀର କିଭଳି ଉଚିତ ମୂଲ୍ୟ ମିଳିବ ସେନେଇ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ଉଦ୍ୟମ ଆଖିଦୃଶିଆ ହେଉନାହିଁ ।