ଜୀବନ ଯନ୍ତ୍ରଣାର ଆଉ ଏକ କାହାଣୀ: ଭୁଶୁଡି ପଡିଲାଣି ଜୀବନର ଭିତ୍ତିପ୍ରସ୍ତର…କେବଳ ହାଡ କେଇଖଣ୍ଡ ବୋହୁଛି ଶରୀରର ବୋଝ…ନା ଘର ଅଛି ନା ଅଛି ଜାଗା…ଦୁର୍ବିସହ ହୋଇପଡିଛି ରଘୁନାଥଙ୍କ ଜୀବନ
ସରକାରୀ ନିର୍ଦ୍ଦେଶନାମା ପାଣିର ଗାର
• ଜୀବନ ଯନ୍ତ୍ରଣାର ଆଉ ଏକ କାହାଣୀ
Kanak News is now on WhatsApp
Join and get latest news updates delivered to you via WhatsApp
• କଷ୍ଟରେ ଛଟପଟ ହେଉଛନ୍ତି ରଘୁନାଥ
• କେମିତି ଗଡିବ ଜୀବନ ରଥ,
• ବୁଝିପାରୁନାହାନ୍ତି ଅସହାୟ ରଘୁନାଥ
• ସରକାରୀ ନିର୍ଦ୍ଦେଶନାମା ପାଣିର ଗାର
• ଜୀବନ ଥିଲେ ବି ସବୁ ଅସାର
• କେବେ ମିଳିବ ସହାୟତା, ଅପେକ୍ଷାରେ ରଘୁନାଥ…
କନକ ବ୍ୟୁରୋ: ଆଉ ବଂଚିବାକୁ ଇଚ୍ଛା ନାହିଁ । ଜୀବନ ଯନ୍ତ୍ରଣାରେ ଛଟପଟ ହୋଇ ଜୀବନ କାଟିବାକୁ ଇଚ୍ଛା ନାହିଁ । ଶରୀର ଜରାଜୀର୍ଣ୍ଣ । କେବଳ ହାଡ କେଇଖଣ୍ଡ ବୋହୁଛି ଶରୀରର ବୋଝ । ନା ଘର ଅଛି ନା ଅଛି ଜାଗା । ପାଖରେ ପଇସା ବି ନାହିଁ । ଆଗକୁ ପାଦ ପକାଇବା ପାଇଁ ସାହାରା ବି କେହିନାହିଁ । କଷ୍ଟ ଆଉ ଯନ୍ତ୍ରଣା ଏମିତି ମାଡିବସିଛି ଯେ, ଆଉ ଆଗକୁ ଗଡି ପାରୁନି ଜୀବନ ଚକ । ହେଲେ ସବୁ ଦେଖି ନିରବଦ୍ରଷ୍ଟା ପାଲଟିଛନ୍ତି ସରକାର ।
ଏ କାହାଣୀ ହେଉଛି ରଘୁନାଥ ମହାନ୍ତିଙ୍କର । ଏକ ଏମିତି କାହାଣୀ ଯାହା ଶୁଣିଲେ ଆପଣଙ୍କ ଆଖି ଛଳ ଛଳ ହୋଇଯିବ । ସତେ ଯେମିତି ଦୁନିଆର ସବୁ ଦୁଃଖ ଆଉ ଯନ୍ତ୍ରଣା ଠାରୁ ବଳିଯାଇଛି ରଘୁନାଥଙ୍କ ଯନ୍ତ୍ରଣା । ପ୍ରଥମେ କୃଷ୍ଠ ରୋଗରେ ଆକ୍ରାନ୍ତ ହେଲେ ରଘୁନାଥ । ଉଭୟ ହାତ ଓ ଗୋଡ ନଷ୍ଟ ହୋଇଗଲା । ଦୁର୍ବିସହ ହୋଇପଡିଲା ରଘୁନାଥଙ୍କ ଜୀବନ । କୃଷ୍ଠ ରୋଗରେ ଶିକାର ହୋଇଛନ୍ତି ବୋଲି ଗାଁଲୋକେ ବାସନ୍ଦ କରିଦେଲେ । ଆଉ ଦୀର୍ଘ ଦୁଇ ଦଶନ୍ଧି ହେବ ଘରକୁ ଫେରିନାହାନ୍ତି ରଘୁନାଥ । ପିଲାଛୁଆ, ସ୍ତ୍ରୀ ରହି ଯାଇଛନ୍ତି ବହୁ ଦୂରରେ । ଏବେ ସ୍ଥାନୀୟ ଅଂଚଳରେ ନିଃସଙ୍ଗ ଜୀବନ ବିତାଉଛନ୍ତି ରଘୁନାଥ । ରଘୁନାଥଙ୍କ ବର୍ତମାନ ବୟସ ହେବ ପାଖାପାଖି ୭୬ ବର୍ଷ । ନା ଘର ଅଛି ନା ଜାଗା ଖଣ୍ଡିଏ ଅଛି । ନା ପାଖରେ ପଇସା ଅଛି ନା ଆଗକୁ ପାଦ ପକାଇବାକୁ କେହି ସାହାରା ଅଛନ୍ତି । ଆଙ୍ଗୁଠିବିହୀନ ପାଦ ଦୁଇଟି ବି ଆଉ ତାଙ୍କୁ ବଳ ଦେଉନି । ଆଗକୁ ବଢିବା ପାଇଁ ଦେହରେ ଜୁ ବି ନାହିଁ । ଗୋଟିରେ ପାଦ ଉପରେ ଗଛ ପଡିଯିବା ପରେ ତାହା ଆଉ ଭଲ ହେଉନି । ପାଦ ପକାଇଲେ ଯନ୍ତ୍ରଣାରେ ଜୀବନ ଛଟପଟ । ଗୋଡ ଭଲ କରିବାକୁ ଯେତେ ଚିକିତ୍ସା କଲେ ବି ସୁସ୍ଥ ହୋଇପାରୁନାହାନ୍ତି ରଘୁନାଥ । କାମ ଦେଉନି ଡାକ୍ତରବାବୁଙ୍କ ଔଷଧ ।
ଗୋଟିଏ ପଟେ ଭୋକର ଜ୍ୱାଳା, ଅନ୍ୟପଟେ ଦେହର ଯନ୍ତ୍ରଣା । ବଂଚିବେ ତ କେମିତି ବଂଚିବେ । ଏଭଳି ସ୍ଥିତିରେ ଏକମ୍ବା ଅଂଚଳରେ ଯେଉଁ କୁଡିଆ ଘରେ ରଘୁନାଥ ଆଶ୍ରୟ ନେଇଥିଲେ ତାକୁ ଖାଲି କରିଦେବାକୁ ନିର୍ଦ୍ଦେଶ ଦେଇଥିଲେ ଘରେ ମାଲିକ । ମାସକରେ ୧୦ ଦିନ ବି ଶୁଖିଲା ପେଟ ଚାଖଣ୍ଡକୁ ଆହାର ମୁଠେ ମିଳିବା କଷ୍ଟକର ହୋଇପଡିଛି ତାଙ୍କ ପାଇଁ । ତଥାପି ସରକାରଙ୍କ ନିଦ ଭାଙ୍ଗିନି ।
ସରକାରଙ୍କ ପାଖକୁ ଧାଇଁ ଧାଇଁ ନିରାଶ ହୋଇଗଲେଣି ରଘୁନାଥ । ମୁଖ୍ୟମନ୍ତ୍ରୀଙ୍କଠାରୁ ଆରମ୍ଭ କରି ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟରେ ପହଂଚି ଗଲାଣି କଥା । ପ୍ରଧାନମନ୍ତ୍ରୀଙ୍କ କାର୍ଯ୍ୟାଳ୍ୟର ନିର୍ଦ୍ଦେଶରେ ରଘୁନାଥଙ୍କୁ ତରନ୍ତ ଘର ଓ ଅନ୍ୟାନ୍ୟ ସହାୟତା ଯୋଗାଇ ଦେବାକୁ ନିର୍ଦ୍ଦେଶ ଆସିଲା । ଏପରିକି ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ବି ଜିଲ୍ଲାପାଳଙ୍କୁ ଆସିଥିଲା ସ୍ୱତନ୍ତ୍ର ନିର୍ଦ୍ଦେଶ । କିନ୍ତୁ କୌଣସି ସୁଫଳ ମିଳିଲାନି । ଦୀର୍ଘ ଦେଢ ବର୍ଷ ଭିତରେ କେତେ ବିଡିଓ ଆସି ବଦଳି ହେଲେଣି କିନ୍ତୁ ରଘୁନାଥଙ୍କ ପାଇଁ କିଛି ବି ପଦକ୍ଷେପ ନିଆଯାଇନି । ନା ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ କାର୍ଯ୍ୟକାରୀ ହେଲା ନା ପ୍ରଧାନମନ୍ତ୍ରୀଙ୍କ ନିର୍ଦ୍ଦେଶ । କେବଳ ରଘୁନାଥଙ୍କୁ ଯଦି କିଛି ମିଳିଛି ତାହା ହେଲା, ଅହସ୍ୟ ଯନ୍ତ୍ରଣା । କେବଳ ଦୁଇଟି ଆଶାବାଡି ରଘୁନାଥଙ୍କୁ କେଇପାଦ ଆଗେଇନେବାରେ ସହାୟକ ହୋଇଛି । ସରକାର ଯୋଗାଉଥିବା କେଇ କେଜି ଚାଉଳ ଓ ୫ ଶହ ଟଙ୍କା ଭତାରେ ବିତୁଛି ଜୀବନ । କିନ୍ତୁ ଅସହାୟ ରଘୁନାଥଙ୍କୁ ଘର ଖଣ୍ଡିଏ ମିଳୁପାରୁନାହିଁ । ରଘୁନାଥଙ୍କ କଥା ଦେଖିଲେ ଲାଗୁଛି ସତେ ଯେମିତି ସରକାରଙ୍କ ଘର ଯୋଗାଇବାର ଯୋଜନା ଏଠି ଫେଲ ମାରିଛି । କେବଳ ଏତିକି କୁହାଯାଇପାରେ, ରଘୁନାଥଙ୍କ ଯନ୍ତ୍ରଣାକୁ ଅନୁଭବ କରି ତୁରନ୍ତ ତାଙ୍କୁ ସରକାରୀ ସହାୟତା ଯୋଗାଇବା ପାଇଁ ଉଦ୍ୟମ ଆରମ୍ଭ ହେଉ । ତେବେ ଯାଇ କହିହେବ ଏବେବି ବଂଚିଛି ମାନବିକାତା ।