ଦୁଇଟି ମାମଲାରେ ଗତକାଲି ସିବିଆଇର ସ୍ୱତନ୍ତ୍ର କୋର୍ଟ ରାମ ରହିମଙ୍କୁ ୨୦ ବର୍ଷ ଜେଲ ଦଣ୍ଡାଦେଶ ଦେଇଥିଲେ । ଏହାପରେ ଜେଲରେ ପ୍ରଥମ ରାତି କାଟିଛନ୍ତି ରାମ ରହିମ । କେବେ କୋଟି କୋଟି ଟଙ୍କାର ସଂପତ୍ତିର ମାଲିକ ରହିଥିବା ବାବା ରାମରହିମଙ୍କୁ ଏବେ ଜେଲରେ ଯେଉଁ ପାରିଶ୍ରମିକ ଦିଆଯିବ ସେଥିରୁ ହିଁ ଚଳିବାକୁ ପଡିବ । ପୂର୍ବ ଭଳି ଆଉ ଦେଖିବାକୁ ମିଳିବନି ବାବାଙ୍କୁ । ତେବେ ଆସନ୍ତୁ ଜାଣିବା ଜେଲରେ କିଭଳି ବିତିଲା ବିବାଦୀୟ ବାବା ରାମରହିମଙ୍କ ପ୍ରଥମ ରାତି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଦଣ୍ଡାଦେଶ ପରେ ଜେଲରେ ପ୍ରଥମ ରାତି କାଟିଛନ୍ତି ଡେରା ସଚ୍ଚା ସୌଦା ମୁଖ୍ୟ ରାମ ରହିମ ଆଉ ଦଣ୍ଡର ପ୍ରଥମ ରାତିରୁ ହିଁ ଜେଲରେ ପୁରା ଅସ୍ଥିର ରହିପଡିଥିଲେ ବାବା । ଜେଲର ଜଣେ ବରିଷ୍ଠ ଅଧିକାରୀଙ୍କ ସୂଚନା ମୁତାବକ, ରାତ୍ରି ଭୋଜନରେ ବାବାଙ୍କୁ କେବଳ ୪ ପଟ ରୁଟି ଓ ଭଜା ଦିଆଯାଇଥିଲା । କିନ୍ତୁ ରାମ ରହିମ ସେଥିରୁ ମାତ୍ର ଫାଳିଏ ରୁଟି ଓ ଅଳ୍ପ ଭଜା ଖାଇଥିଲେ ଏବଂ ବାକି ସବୁ ଛାଡି ଦେଇଥିଲେ । ସାରା ରାତି ବାବା ପୁରା ଅସ୍ତବ୍ୟସ୍ତ ହୋଇପଡିଥିଲ । ନଶୋଇ ରାତି ସାରା ଖାଲି ଟହଲ ମାରିଥିଲେ । ତେବେ ଜେଲରେ ସେ କଏଦୀ ନମ୍ବର ୮୬୪୭ ହୋଇଛନ୍ତି । ଖାଲି ସେତିକି ନୁହେଁ ଜେଲରେ ରାମରହିମଙ୍କୁ ଏବେ ମାଳି କାମ କରିବା ସହ ଫ୍ୟାକ୍ଟ୍ରିରେ ମଧ୍ୟ କାମ କରିବାକୁ ପଡିବ । ଆଉ ପାରିଶ୍ରମିକ ବାବଦକୁ ବାବାଙ୍କୁ ମିଳିବ ପ୍ରତ୍ୟେକ ଦିନ ମାତ୍ର ୪୦ ଟଙ୍କା ।
ଏଠାରେ ଆମେ କହି ରଖୁଛୁ କି, ଯେତେବେଳେ ଜେଲରେ ନିର୍ମିତ ଅସ୍ଥାୟୀ କୋର୍ଟରେ ସିବିଆଇ ବିଚାରପତି ଦଣ୍ଡାଦେଶ ଶୁଣାଇବା ପରେ କିଛି ସମୟ ପାଇଁ ମଧ୍ୟ ଦେଖିବାକୁ ମିଳିଥିଲା ବାବାଙ୍କ ହାଇଭୋଲଟେଜ୍ ଡ୍ରାମା । ଦୁଇପକ୍ଷ ଓକିଲଙ୍କ ଯୁକ୍ତି ଶୁଣୁଥିବା ବାବା ରାମରହିମ ଜଜଙ୍କୁ ହାତଯୋଡ଼ି କ୍ଷମା ଭିକ୍ଷା କରିଥିଲେ ମାତ୍ର କୌଣସି ସୁଫଳ ମିଳିନଥିଲା ଶେଷରେ ବାବା ନିଜର କୋହ ସମ୍ବରଣ କରିନପାରି ଚଟାଣରେ ବସିପଡ଼ି କାନ୍ଦିବାରେ ଲାଗିଥିଲେ ।
ସୂଚନାଯୋଗ୍ୟ ଯେ, ଏହି ଦୁଷ୍କର୍ମ ମାମଲାରେ ଗତ ଶୁକ୍ରବାର ହରିଆଣାର ପଞ୍ଚକୁଲା ସ୍ଥିତ ସ୍ୱତନ୍ତ୍ର ସିବିଆଇ ଅଦାଲତରେ ରାମ ରହିମ ଦୋଷୀ ସାବ୍ୟସ୍ତ ହୋଇଥିଲେ। ଏହି ଖବର ପ୍ରଚାର ମାତ୍ରେ ତାଙ୍କର ଅନୁଗାମୀ ଓ ସମର୍ଥକମାନେ ବ୍ୟାପକ ପୋଡ଼ାଜଳା ଓ ହିଂସାକାଣ୍ଡ ରଚାଇଥିଲେ। ଫଳରେ ୩୦ ଜଣ ପ୍ରାଣ ହରାଇଥିଲେ ଏବଂ ୨୦୦ରୁ ଅଧିକ ଆହତ ହୋଇଥିଲେ ।
ଏଭଳି ଅଘଟଣର ପୁନରାବୃତ୍ତି ନହେବା ଲାଗି ରାମ ରହିମଙ୍କ ଦଣ୍ଡାଦେଶ ଶୁଣାଣିକୁ ସେ ରହୁଥିବା ରୋହତକ ନିକଟ ସୁନାରିଆ ଜିଲ୍ଲା କାରାଗାର ପରିସରରେ ଏକ ଅସ୍ଥାୟୀ ଅଦାଲତରେ କରିବା ଲାଗି ନିଷ୍ପତ୍ତି ହୋଇଥିଲା । ସ୍ୱତନ୍ତ୍ର ସିବିଆଇ ଜଜ୍ ହେଲିକପ୍ଟର ଯୋଗେ ସୁନାରିଆ ଜେଲ୍ ପରିସରକୁ ଆସିଥିଲେ ଏବଂ ବାବା ରାମ ରହିମଙ୍କୁ ଦୁଇଟି ମାମଲ ପାଇଁ ୧୦ ବର୍ଷ ଲେଖାଏଁ ସଜା ଶୁଣାଇବା ସହ ୩୦ ଲକ୍ଷ ଟଙ୍କା ଜରିମାନା ଓ ଦୁଇ ପୀଡିତାଙ୍କୁ ୧୪ ଲକ୍ଷ ଟଙ୍କା ଲେଖାଏଁ ପ୍ରଦାନ କରିବାକୁ ନିର୍ଦ୍ଦେଶ ଦେଇଥିଲେ ।