ଘରେ ନାହିିଁ ଟିଭି ହେଲେ ଧନୀ ! ପଢନ୍ତୁ ୧୪ଟି ସନ୍ତାନର ଜନନୀ କେମିତି ହେଲେ କୋଟିପତି
୧୪ଟି ସନ୍ତାନର ଜନନୀ ହେଲେ କୋଟିପତି । ମାତ୍ର ଏହି ୧୪ ଜଣ ସନ୍ତାନ କେବେ ସ୍କୁଲର ମାଟି ମାଡି ନାହାଁନ୍ତି । ବର୍ତ୍ତମାନ ଆପଣ ଚିନ୍ତା କରୁଥିବେ କି କାହାଣୀଟି ନିଶ୍ଚୟ କୌଣସି ଗରୀବ ପରିବାରର ହୋଇଥିବ ନଚେତ୍ କାହାର ଲଟ୍ରି ଲାଗିଯାଇଥିବ ଯେଉଁଥିପାଇଁ ଉକ୍ତ ମହିଳା ଜଣକ ଏକାଥରକେ କୋଟିପତି ବନିଯାଇଥିବେ । କିନ୍ତୁ ଆପଣ ଯାହା ଚିନ୍ତା କରୁଛନ୍ତି ବାସ୍ତବରେ ସେମିତି କିଛି ବି ଘଟିନାହିଁ । ପ୍ରକୃତ ମାମଲାଟି ରହିଛି କିଛି ଅଲଗା ପ୍ରକାରର । ତେବେ ଆସନ୍ତୁ ଜାଣିବା ଏସଂପର୍କରେ ଅଧିକ ସୂଚନା ।
Kanak News is now on WhatsApp
Join and get latest news updates delivered to you via WhatsApp
ଆଜି ଆମେ ଆପଣଙ୍କୁ ଯାହାଙ୍କ ସଂପର୍କରେ ଆଲୋଚନା କରିବାକୁ ଯାଉଛୁ ସେ କୌଣସି ଗରିବ ପରିବାରର କାହାଣୀ ନୁହେଁ ବରଂ ଜଣେ କୋଟିପତି । ଭିର୍ଜିନିଆରେ ବାସକରୁଥିବା ୧୪ଟି ସନ୍ତାନର ଜନନୀ ହେଉଛନ୍ତି ତମ୍ମି ଉମ୍ବେଲ । ତେବେ ତମ୍ମିଙ୍କର ରହିଛି ପାଖାପାଖି ୧୭ ଲକ୍ଷ ଡଲାରର ନାଚୁରାଲ କସମେଟିକର ବ୍ୟବସାୟ । ଯାହାକୁ ସେ ବିନା କୌଣସି ବ୍ୟାଙ୍କ କିମ୍ବା ସଂସ୍ଥାର ସହାୟତା ନନେଇ ନିଜ କଠିନ ପରିଶ୍ରମ ବଳରେ ଠିଆ କରିଛନ୍ତି ।
ତମ୍ମି ନିଜ ସ୍ୱାମୀ ଏବଂ ୧୪ ସନ୍ତାନଙ୍କ ସହ ଭିର୍ଜିନିଆରେ ରହୁନ୍ତି । ଉମ୍ବେଲଙ୍କ ସ୍ୱାମୀ ଜଣେ ଡାକ୍ତର । ମାତ୍ର ଆପଣ ଜାଣିଲେ ଆଶ୍ଚର୍ଯ୍ୟ ହେବେ କି, ଏତେ ରୋଜଗାର ଥାଇ ସୁଦ୍ଧା ତାଙ୍କ ଘରେ ଟିଭିଟିଏ ବି ନାହିଁ । ଖାଲି ସେତିକି ନୁହେଁ, ଟଙ୍କା ଖର୍ଚ୍ଚ ହୋଇଯିବା ଭୟରେ ସେ ତାଙ୍କ ପିଲାଙ୍କର ନାଁ ସ୍କୁଲରେ ବି ଲେଖାଇ ନାହାଁନ୍ତି ଆଉ ନିଜ ଘରେ ହିଁ ପିଲାଙ୍କୁ ପାଠପଢାଉଛନ୍ତି । ସେ ପୁଣି ନିଜେ । ତେବେ ତାଙ୍କର ୪ ଜଣ ପିଲା ଏବେ କଲେଜରେ ମେଡିକାଲ, ଇଂଜିନିୟରିଂ ଏବଂ ସାଇବର ସିକ୍ୟୁରିଟି ପଢୁଥିବାବେଳେ ବାକି ପିଲାମାନଙ୍କୁ ତମ୍ମି ଏବେବି ନିଜେ ଘରେ ରଖି ପଢାଉଛନ୍ତି ।
ଏହାବତୀତ, ତମ୍ମି ନିଜ ବ୍ୟବସାୟଠାରୁ ଆରମ୍ଭ କରି ପିଲାଙ୍କୁ ପାଠପଢାଇବା ଯାଏଁ ଏକା ଏକା ହିଁ ସମ୍ଭାଳନ୍ତି । ବ୍ୟବସାୟ କାରଣରୁ ତାଙ୍କୁ ଅନେକ ସମୟରେ ବିଭିନ୍ନ ସ୍ଥାନର ପ୍ରାକୃତିକ ଜିନିଷକୁ ବୁଝିବା ଏବଂ ପୁଣି ସେଥିରୁ ନିଜ ଉତ୍ପାଦ ପ୍ରସ୍ତୁତ କରିବା ପାଇଁ ବାହାରକୁ ଯାତ୍ରା କରିବାକୁ ପଡିଥାଏ । ତମ୍ମି ତାଙ୍କ ଯାତ୍ରା କାଳରେ ଅନେକ ଥର ନିଜ ପିଲାମାନଙ୍କୁ ବି ସାଥିରେ ନେଇ ଯାତ୍ରା କରିଥାନ୍ତି । ତମ୍ମିଙ୍କ ମତରେ ପ୍ରକୃତିକୁ ଅନୁଭବ କରିବା ହିଁ ଶିକ୍ଷାର ଅନ୍ୟ ଏକ ଅଂଶ ବିଶେଷ ।
ତମ୍ମି କୁହନ୍ତି କି, ‘ମୁଁ ନିଜର ବ୍ୟବସାୟକୁ ପୁରୁଣା ପଦ୍ଧତିରେ ଚଲାଇବାକୁ ଚାହେଁ, ଯେଉଁଥିରେ ପ୍ରଥମେ ଟଙ୍କା ରୋଜଗାର କରି ତାକୁ ପୁଣି ଥରେ ନିବେଶ କରିବା ପାଇଁ ଏକ ଅଲଗା ଅନୁଭୂତି ଆପଣାଇ ଯାଇଥାଏ । ମୁଁ କେବେ ଆଉ କାହାଠାରୁ ବି ଟଙ୍କା ଉଧାର ନେଇ ବ୍ୟବସାୟ କରିବାକୁ ଚିନ୍ତା କରିନି’ ।
ତମ୍ମି ପ୍ରଥମେ କପଡା ବ୍ୟବସାୟ ଆରମ୍ଭ କରିଥିଲେ ମାତ୍ର ସେଥିରୁ କୌଣସି ଲାଭ ନମିଳିବାରୁ ସେ ଏହାକୁ ବନ୍ଦ କରିବା ସହିତ ତୁରନ୍ତ ଅନ୍ୟ ଏକ ପ୍ରଡକ୍ଟ ଆରମ୍ଭ କରିବାକୁ ଚିନ୍ତା କରିବା କରିଦେଇଥିଲେ । ଏହାପରେ ‘ଶିଆ ଟେରା ଅର୍ଗାନିକ’ ନାମକ ଏକ କଂପାନୀ ଆରମ୍ଭ କରିଥିଲେ ତମ୍ମି । ଯାହାକି ଏକ ପ୍ରାକୃତିକ ପ୍ରଡକ୍ଟ ଅଟେ । ଏଥିସହିତ ଏହା ଆଦିବାସୀ ସମୂହ ଏବଂ ବିଭିନ୍ନ ଦେଶର କଂଚାମାଲରୁ ଉତ୍ପାଦନ କରାଯାଇଥାଏ ।
ତମ୍ମି ଉମ୍ବେଲ ଏହି କଂପାନୀଟିକୁ ଦୀର୍ଘ ୧୭ ବର୍ଷ ହେଲା ଏକା ଚଳାଇ ଆସୁଛନ୍ତି । ତମ୍ମି ନିଜ ବ୍ୟବସାୟର ପ୍ରସାର ପାଇଁ ସେହି ଗାଁଗୁଡିକୁ ଗସ୍ତ କରିବା ଆରମ୍ଭ କରିଥିଲେ ଯେଉଁଠାରେ ତ୍ୱଚା ବା ଚର୍ମର ଜନିତ ସମସ୍ୟାର ଚିକିତ୍ସା ନିମନ୍ତେ ଏବେବି ବିଭିନ୍ନ ଦେଶୀ ବା ଘରୋଇ ଉପଚାର ପ୍ରୟୋଗ କରାଯାଇଥାଏ ।
ତମ୍ମି କୁହନ୍ତି କି, ‘ମୁଁ ସେହି ସବୁ ସ୍ଥାନରେ ମୋର ରୋଜଗାର ପାଇଁ ଜରିଆ କରିଛି ଯାହାକି ଜନଜୀବନଠାରୁ ଖୁବ୍ ଦୂରରେ ରହିଛି । ମୁଁ ଜାଣିଥିଲି କି ସେହି ସବୁ ଜାଗାମାନଙ୍କରେ ଏଭଳି ଅନେକ ଜିନିଷ ରହିଛି ଯାହାକି ପ୍ରକୃତିର ଖୁବ୍ ନିକଟବର୍ତ୍ତୀ, କିନ୍ତୁ ଲୋକଲୋଚନଠାରୁ ଖୁବ୍ ଦୂରରେ ରହିଛି’ ।
ତେବେ ତମ୍ମିଙ୍କ କଂପାନୀ ଆମେରିକାର ଭିର୍ଜିନିୟାରେ ଅବସ୍ଥିତ ଏବଂ ଅନଲାଇନ ଜରିଆରେ ନିଜର ଉତ୍ପାଦକୁ ବିକ୍ରୀ କରନ୍ତି ତମ୍ମି । ମାତ୍ର ଗତକିଛି ବର୍ଷ ହେଲା ତମ୍ମିଙ୍କୁ ଏକ ସମସ୍ୟାର ସାମ୍ନା କରିବାକୁ ପଡିଛି । ଯାହାର ମୁଖ୍ୟ କାରଣ ହେଲା ବଜାରରେ ମିଳୁଥିବା ନକଲି ପ୍ରଡକ୍ଟ । ଅର୍ଥାତ୍ ବଜାରରେ ନାଚୁରାଲ ପ୍ରଡକ୍ଟ ନାଁରେ ଅନେକ ନକଲି ପ୍ରଡକ୍ଟମାନ ବିକ୍ରୀ ହେବାରେ ଲାଗିଛି ଯେଉଁ କାରଣରୁ ତମ୍ମିଙ୍କୁ ବ୍ୟବସାୟରେ ଅନେକ କ୍ଷତି ସହିବାକୁ ପଡୁଛି ।
ସୌଜନ୍ୟ – ବିବିସି ନ୍ୟୁଜ୍