ସାବଧାନ: ସସରେ ବିଷ ! ରିପୋର୍ଟରୁ ଆସିଲା ସାଂଘାତିକ ସତ, ଖାଇଲେ ହୋଇପାରେ କ୍ୟାନସର ଓ ହାଇପର ଟେନସନ ଭଳି ସାଂଘାତିକ ରୋଗ?
ରାଜ୍ୟରେ ମିଳୁଥିବା କିଛି ନିଦ୍ଦିଷ୍ଟ ବ୍ରାଣ୍ଡ ସସରେ ହେଉଛି ଅପମିଶ୍ରଣ ! ଅସୁକ୍ଷିତ ଓ ନିମ୍ନ ମାନର କହିଲା, ନମୂନା ଯାଂଚର ରିପୋର୍ଟ
କନକ ନ୍ୟୁଜ୍ : ଆପଣ ବଜାରରେ ଉପଲବ୍ଧ ହେଉଥିବା ଟମାଟୋ କିମ୍ବା ଚିଲି ସସ ଖାଉଛନ୍ତ କି ? ଯଦି ହଁ- ତେବେ ସାବଧାନ । କାରଣ ଏହି ସସରେ ହେଉଛି ଅପମିଶ୍ରଣ । କନକ ନ୍ୟୁଜ୍ ଅନୁସନ୍ଧାନରୁ ଯେଉଁ ତଥ୍ୟ ସାମ୍ନାକୁ ଆସିଛି, ତାହା ଆପଣଙ୍କୁ ଚକିତ କରିଦେବ । ଆଖିକୁ ସୁନ୍ଦର ଓ ପାଟିକୁ ସୁଆଦିଆ ଦେଖାଯାଉଥିବା ଏହି ସସ୍ ଆପଣଙ୍କ ସ୍ୱାସ୍ଥ୍ୟୃହାନୀର କାରଣ ହୋଇପାରେ । ଏମିତି କି କ୍ୟାନସର ଏବଂ ହାଇପର ଟେନସନ୍ ଭଳି ସାଂଘାତିକ୍ ସମସ୍ୟାରେ ପଡ଼ିବାର ଆଶଙ୍କା ରହିଛି ।
Kanak News is now on WhatsApp
Join and get latest news updates delivered to you via WhatsApp
କନକ ନ୍ୟୁଜ୍ ପକ୍ଷରୁ ସଂଗୃହୀତ କେତେକ ବ୍ରାଣ୍ଡେଡ୍ ସସକୁ ସରକାରୀ ପରୀକ୍ଷାଗାରରେ ପରୀକ୍ଷା କଲା ପରେ ଏଭଳି ତଥ୍ୟ ପଦାକୁ ଆସିଛି । ଟିପଟପ୍ ଟମାଟୋ ସସ୍ ନିମ୍ନମାନର ଓ ଅସୁରକ୍ଷିତ ବୋଲି ପ୍ରମାଣିତ ହୋଇଥିବା ବେଳେ, ପ୍ରାଇମ୍ ଚିଲି ସସ୍ ନିମ୍ନମାନର ବୋଲି ପ୍ରମାଣିତ ହୋଇଛି । ପ୍ରାୟ ମାସେ ତଳେ ଭୁବନେଶ୍ୱରର ୟୁନିଟ୍-୪ ମାର୍କେଟ୍ ଓ ଅନ୍ୟ କେତେକ ମାର୍କେଟରୁ କିଛି ବ୍ରଣ୍ଡେଡ୍ ଟମାଟୋ ଏବଂ ଚିଲି ସସର ନମୂନା ସଂଗ୍ରହ କରିଥିଲା କନକନ୍ୟୁଜ୍ । ଆଉ ଏହାକୁ ନେଇ ରାଜ୍ୟ ଜନସ୍ୱାସ୍ଥ୍ୟ ପରୀକ୍ଷାଗାରରେ ପରୀକ୍ଷା ପାଇଁ ଦେଇଥିଲା । ଆଉ ଯେତେବେଳେ ପରୀକ୍ଷା ରିପୋର୍ଟ ଆସିଲା ଜଣାପଡ଼ିଛି- କିଛି ବ୍ରାଣ୍ଡେଡ୍ ଟମାଟୋ ସସ୍ ଓ ଚିଲି ସସ୍ ବିପକ୍ଷରେ ଆସିଛି ଅତ୍ୟନ୍ତ ବିପଦଜନକ ଟିପ୍ପଣୀ ।
ଟିପ୍-ଟପ୍ ଟମାଟୋ ସସରେ କେତେବେଳେ ଓ କେଉଁଠି ଏହା ତିଆରି ହୋଇଛି ତାହା ଲେଖାନଥିବା ବେଳେ ଏଥିରେ ସିନ୍ଥେଟିକ୍ କଲର ଥିବା ପ୍ରମାଣିତ ହୋଇଛି । ଏଥିସହ ଏଥିରେ ସର୍ବନିମ୍ନ ୨୫ ପ୍ରତିଶତ ମିଶ୍ରଣଯୋଗ୍ୟ କଠିନ ପଦାର୍ଥ ମିଶିବା ଜାଗାରେ ମାତ୍ର ୧୧.୩ ପ୍ରତିଶତ ମିଶ୍ରଣଯୋଗ୍ୟ କଠିନ ପଦାର୍ଥ ଥିବା ଦେଖିବାକୁ ମିଳିିଥିଲା । ସେହିଭଳି ଭୁବନେଶ୍ୱରରେ ତିଆରି ହେଉଥିବା ପ୍ରାଇମ୍ ଚିଲି ସସରେ ୮ ପ୍ରତିଶତ ରୁ କମ୍ ମିଶ୍ରଣଯୋଗ୍ୟ କଠିନ ପଦାର୍ଥ ମିଶିବା ଜାଗାରେ ମାତ୍ର ୫.୮ ପ୍ରତିଶତ ମିଶ୍ରଣଯୋଗ୍ୟ କଠିନ ପଦାର୍ଥ ମିଶିଥିବା ଦେଖାଯାଇଛି । ଏସିଟିକ୍ ଏସିଡର ମାତ୍ର ୧ ପ୍ରତିଶତରୁ କମ୍ ନ ରହିବା ସ୍ଥାନରେ ଏହା ମାତ୍ର ୦.୬ ପ୍ରତିଶତ ରହିଛି । ଯାହାକି ନିମ୍ନ ମାନର ବୋଲି ପ୍ରମାଣିତ ହୋଇଛି ।
କନକ ନ୍ୟୁଜ୍ ପକ୍ଷରୁ ବଜାରରେ ଉପଲବ୍ଧ ହେଉଥିବା କିଛି ଖାଦ୍ୟ ସାମଗ୍ରୀର ନିରାପତା ଯାଂଚ ପାଇଁ ଜନସ୍ୱାସ୍ଥ୍ୟ ବିଭାଗର ପରକ୍ଷାଗାରରେ ଦିଆଯାଇଥିଲେ । ଯେଉଁଥିରେ ଟମାଟୋ ଏବଂ ଚିଲି ସସ୍ ମଧ୍ୟ ସାମିଲ ଥିଲା । ଆଉ ଯାଂଚ ରିପୋର୍ଟ ଆସିଲା ପରେ ସାମ୍ନାକୁ ଆସିଛି ଏହି ସାଂଘାତିକ ସତ । ଟମାଟୋ ଏବଂ ଚିଲି ସସ୍ ସଂପର୍କରେ ଯାଂଚ ପରିପୋର୍ଟ କଣ କହୁଛି ଦେଖି ନିଅନ୍ତୁ ।
କ’ଣ କହୁଛି ଯାଞ୍ଚ ରିପୋର୍ଟ ?
-ଖାଦ୍ୟ ସୁରକ୍ଷା ଓ ଗୁଣବତ୍ତା ବିଧିର ଉଲଙ୍ଘନ ହୋଇଛି
-ଖାଦ୍ୟ ସାମଗ୍ରୀରେ ମିଶ୍ରିତ ଉପାଦାନର ଅନୁପାତ ଠିକ୍ ରହୁନି
-କିଛି ନିର୍ଦ୍ଧିଷ୍ଟ ଟମାଟୋ ଓ ଚିଲି ସସରେ ଆଇନର ଉଲଙ୍ଘନ
– ଟିପ୍ ଟପ୍ ଟମାଟୋ ସସ୍ ଅସୁରକ୍ଷିତ ଏବଂ ନିମ୍ନମାନର
– ଟିପ୍ ଟପ୍ ଟମାଟୋ ସସରେ ସିନ୍ଥେଟିକ୍ କଲର ମିଶ୍ରଣ ହେଉଛି
-ହଳଦିଆ ରଙ୍ଗ ମିଶ୍ରଣ ହେଉଥିବା ଯାଂଚରେ ରିପୋର୍ଟରେ ପ୍ରକାଶ
-ଟମାଟୋ ସସ୍ରେ ସର୍ବନିମ୍ନ ୨୫% ମିଶ୍ରଣଯୋଗ୍ୟ କଠିନ ପଦାର୍ଥ ରହିବା ଆବଶ୍ୟକ
-ମାତ୍ର ଟିପ୍ ଟପ୍ ଟମାଟୋ ସସରେ ମାତ୍ର ୧୧.୩% ମିଶ୍ରଣଯୋଗ୍ୟ କଠିନ ପଦାର୍ଥ ରହୁଛି
-ପ୍ରାଇମ୍ ଚିଲି ସସ୍ ନିମ୍ନ ମାନର
-ପ୍ରାଇମ୍ ଚିଲି ସସରେ ମିଶ୍ରିତ ଉପାଦାନର ଅନୁପାତ ଠିକ୍ ରହୁନି
-ଏଥିରେ ଏସିଟିକ୍ ଏସିଡର ମାତ୍ରା ନିର୍ଦ୍ଧାରିତ ଅନୁପାତରୁ କମ୍ ରହୁଛି
-ସର୍ବନିମ୍ନ ୧% ଏସିଟିକ୍ ଏସିଡ୍ ବଦଳରେ ରହୁଛି ମାତ୍ର ୦.୬%
– ମିଶ୍ରଣ ଯୋଗ୍ୟ କଠିନ ପଦାର୍ଥ ୮% ବଦଳରେ ରହୁଛି ମାତ୍ର ୫.୮%
ବ୍ରାଣ୍ଡେଡ୍ ସସ୍ ଭାବି ଯଦି ଆପଣ ନିଶ୍ଚିତରେ ବଜାରରୁ ଆଣି ଏସବୁ ସସ୍ ଖାଉଛନ୍ତି, ତାହେଲେ ସାବଧାନ । କାରଣ ଏହା ବିଭିନ୍ନ ମାରାତ୍ମକ ରୋଗର କାରଣ ବି ହୋଇପାରେ । ଖାଦ୍ୟ ସୁରକ୍ଷା ଓ ମାନକ ଆଇନ ୨୦୧୧ ଅନୁଯାୟୀ ଜୋରିମାନା ଓ ଜେଲ୍ ଭଳି ବ୍ୟବସ୍ଥା ଥିବାବେଳେ କିଛି ଅସାଧୁ ବ୍ୟବସାୟୀ ସରକାରୀ ଆଖିରୁ ଖସିଯାଉଛନ୍ତି କିଭଳି ତାହା ଆଶ୍ଚର୍ଯ୍ୟ ସୃଷ୍ଟି କରୁଛି ।