ଗାଡି ବଜାର ପରେ ଏବେ ସଂକଟରେ ସୂତାକଟା ବ୍ୟବସାୟ ! ଛଟେଇର ଶିକାର ହୋଇପାରନ୍ତି ହଜାର ହଜାର କର୍ମଚାରୀ ।
ଗାଡି ବଜାର ପରେ ଏବେ ସୂତାକଟା ଉଦ୍ୟୋଗରେ ମାଡିଆସିଲାଣି ସଂକଟ । ଦେଶର ପାଖାପାଖି ଏକ-ତୃତୀୟାଂଶ ଉତ୍ପାଦନ କ୍ଷମତା ବନ୍ଦ ହୋଇଯାଇଛି ଏବଂ ଉଣାଅଧିକେ ଯେଉଁ ବ୍ୟବସାୟ ଚାଲିଛି ତା କଥା ନ କହିବା ଭଲ । ଏହି ସଂକଟ ଦୂର ନହେଲେ ଯେ ହଜାର ହଜାର ଲୋକ ଚାକିରି ହରାଇବେ ଏଥିରେ କୌଣସି ସନ୍ଦେହ ନାହିଁ । ୨୦୧୦ -୧୧ ରେ ଦେଖାଦେଇଥିବା ମାନ୍ଦାବସ୍ତା ଭଳି ଏବେ କଟନ୍ ଏବଂ ମିଶ୍ରଣ ବ୍ୟବସାୟରେ ମଧ୍ୟ ଅବସ୍ଥା ସଂକଟାପର୍ଣ୍ଣ ହୋଇଯାଇଛି । ଏପ୍ରିଲ୍ ମାସରୁ ଜୁନ୍ ପର୍ଯ୍ୟନ୍ତ ଏହି ତିନିମାସ ଭିତରେ କଟନ୍ ସୁତା ୩୪.୬ ପ୍ରତିଶତ କ୍ଷତି ସହିଛି । କେବଳ ଜୁନ୍ ମାସରେ ୫୦ ପ୍ରତିଶତ କ୍ଷତି ହୋଇଥିଲା ।
Kanak News is now on WhatsApp
Join and get latest news updates delivered to you via WhatsApp
କପାଚାଷ ଏବେ ସୂତାକଳର ଅବସ୍ଥା ଏତେ ଶୋଚନୀୟ ହୋଇପଡିଛି ଯେ ଭାରତୀୟ କପା କିଣିବା ମଧ୍ୟ କାଠିକର ପାଠ ହୋଇପଡିବ । ଏଭଳି ଯଦି ଅବସ୍ଥା ରହିବ ତେବେ ଆଗାମୀ ଋତୁରେ ବଜାରକୁ ଆସୁଥିବା ପାଖାପାଖି ୮୦ ହଜାର କୋଟି ଟଙ୍କାର ୪ କୋଟି ଗାଣ୍ଠ କପାକୁ କିଣିବା ପାଇଁ ଗ୍ରାହକ ମିଳିବେ ନାହିଁ । ଭାରତୀୟ ଟେକ୍ସଟାଇଲ୍ ବ୍ୟବସାୟରେ ପରୋକ୍ଷ ଏବଂ ପ୍ରତ୍ୟକ୍ଷ ଭାବରେ ପାଖାପାଖି ୧୦ କୋଟି ଲୋକଙ୍କୁ ରୋଜଗାର ମିଳିଛି । କୃଷି ପରେ ଲୋକଙ୍କୁ ଅଧିକ ରୋଜଗାର ଦେଉଥିବା ଏହି କ୍ଷେତ୍ରରେ ସଂକଟ ଅବସ୍ଥା ଦେଖାଗଲେ ବେରୋଜଗାରର ମଧ୍ୟ ସମସ୍ୟା ଦେଖାଦେବ । ଅଧିକ ପରିମାଣରେ ଲୋକଙ୍କ ଚାକିରୀରୁ ଛଟେଇ ହେବ ତେଣୁ ଟେକ୍ସଟାଇଲ୍ ମିଲ୍ସ ସଂଘ ପକ୍ଷରୁ ସରକାରଙ୍କୁ ଏନେଇ ତୁରନ୍ତ ପଦକ୍ଷେପ ନେବାକୁ କୁହାଯାଇଛି ।
ଚାକିରୀ ଏବଂ ଲୋକଙ୍କ ଜୀବନ ବଞ୍ଚାଇବାକୁ ସରକାରଙ୍କ ଆଗରେ ନେହୁରା ହୋଇଛି ଏହି ସଂଘ । କରଜରେ ବୁଡି ରହିଥିବା ଏହି ଉଦ୍ୟୋଗ କଞ୍ଚାମାଲର ମହଙ୍ଗା ଦର , ଏବଂ କପଡା ଓ ସୂତାର ଶସ୍ତା କ୍ୱାଲିଟି ନେଇ ଅନେକ ସମସ୍ୟା ଦେଇ ଗତି କରୁଛି । ବର୍ଦ୍ଧିତ ଦରର କଞ୍ଚାମାଲ୍ କାରଣରୁ ପ୍ରତିକିଲୋ ୨୦ ରୁ ୨୫ ଟଙ୍କାର କ୍ଷତି ସହିବାକୁ ପଡୁଛି । ଏହାଛଡା ଶ୍ରୀଲଙ୍କା , ବାଙ୍ଗଲାଦେଶ,ଇଣ୍ଡୋନେସିଆ ଭଳି ଦେଶର ଶସ୍ତା କପଡା ବୋଝ ଉପରେ ନଳିତା ବିଡା ସଦୃଶ କାମ କରୁଛି । ଚଳିତବର୍ଷ ଚାକିରୀକୁ ନେଇ ଲୋକେ ଚିନ୍ତିତ ଥିବାବେଳେ ଏଭଳି ଖବର ଲୋକଙ୍କ ଆଖିରୁ ନିଦ ହଜାଇ ଦେଲାଣି ।