ସିଦ୍ଧପୁରୁଷ ନା’ ଯାଦୁଗର ! କଣ ରହିଛି ସତ୍ୟସାଇଙ୍କ ସତ୍ୟତା
ବାବା ସତ୍ୟସାଇ । ଯାହାଙ୍କର ଅନେକ ନାମ ଅନେକ ଯଶ । ବଡ ସେଲିବ୍ରିଟିଙ୍କ ଠାରୁ ଆରମ୍ଭ କରି ରାଜନେତା, କ୍ରିକେଟ୍ ଖେଳାଳି ସମସ୍ତେ ଥିଲେ ବାବା ସତ୍ୟସାଇଙ୍କ ଭକ୍ତ । ତେବେ ସତ୍ୟସାଇ ପ୍ରକୃତରେ ସିଦ୍ଧପୁରୁଷ ଥିଲେ ନା ଥିଲେ ଜଣେ ଯାଦୁଗର । ଏନେଇ ହୋଇଛି ଅନେକ ତର୍କ ବିତର୍କ । ଅନେକ ବାବାଙ୍କୁ ଯାଦୁଗର ବୋଲି ଅଭିଯୋଗ କରିଛନ୍ତି । ବାବାଙ୍କ ଅସ୍ତିତ୍ୱ ଉପରେ ପ୍ରଶ୍ନ ଉଠାଇବା ଭଳି ଭିଡିଓ ମଧ୍ୟ ସାମ୍ନାକୁ ଆସିଛି ।
Kanak News is now on WhatsApp
Join and get latest news updates delivered to you via WhatsApp
ଏମିତି ଏକ ଘଟଣା ସାମ୍ନାକୁ ଆସିଥିଲା ଯେତେବେଳେ ପ୍ରସିଦ୍ଧ ଯାଦୁଗର ପି.ସି ସରକାର ଯୁନିୟର୍ ତାଙ୍କ ମୁହଁ ଖୋଲିଥିଲେ । ତାଙ୍କ କହିବା ଅନୁଯାୟୀ ଯେତେବେଳେ ସେ ସତ୍ୟ ସାଇଙ୍କୁ ଦେଖା କରିବାକୁ ଚାହିଁଥିଲେ ସେତେବେଳେ ବାବା ଦେଖାକରିବାକୁ ମନା କରିଥିଲେ । ମାସ ମାସ ଧରି ଅପେକ୍ଷା କରିଥିଲେ ମଧ୍ୟ ବାବା ଦେଖାକରିବାକୁ ରାଜି ହୋଇନଥିଲେ । ତେଣୁ ପି.ସି ସରକାର ଯୁନିୟର୍ ଏକ ପ୍ଲାନ୍ କରିଥିଲେ । ନିଜକୁ କୋଲକାତାର ଜଣେ ଇଣ୍ଡଷ୍ଟ୍ରିଆଲିଷ୍ଟଙ୍କ ପୁଅର ପରିଚୟ କରି ଦେଖା କରିବାକୁ ଯାଇଥିଲେ ।
ଏହା ପରେ ସାଙ୍ଗେ ସାଙ୍ଗେ ବାବା ତାଙ୍କୁ ଦେଖାକରିଥିଲେ । ଦେଖାକରିବା ପରେ ପି.ସି ସରକାର ଯୁନିୟର୍ ବାବାଙ୍କୁ ଏକ ଉପହାର ମାଗିଥିଲେ । ଏହା ଶୁଣିବା ପରେ ବାବା ଅନ୍ୟ ଏକ କୋଠରୀକୁ ଯାଇ କିଛି ସମୟ ପରେ ଆସିଥିଲେ । ଆଉ ଏହି ସମୟ ମଧ୍ୟରେ ପି.ସି ସରକାର ଯୁନିୟର୍ କୋଠରୀ ଭିତରେ ମିଠା ରଖାଯାଇଥିବା ଏକ ପ୍ଲେଟ୍ ନିଜ ପାଖରେ ଲୁଚାଇଦେଇଥିଲେ । କିଛି ସମୟ ପରେ ବାବା ଆସି ଶୂନ୍ୟରେ ହାତ ବୁଲାଇ ତାଙ୍କୁ ସନ୍ଦେଶ ଖାଇବାକୁ ଦେଇଥିଲେ । କିନ୍ତୁ ସରକାର ଯୁନିୟର କହିଥିଲେ ମୋତେ ସନ୍ଦେଶ ନୁହେଁ ରସଗୋଲା ପସନ୍ଦ । ଏହା ପରେ ସନ୍ଦେଶକୁ ଲୁଚାଇ ପାଖରେ ରଖିଥିବା ରସେଗୋଲା ବାହାର କରି ବାବାଙ୍କୁ ଦେଇଥିଲେ । ଏସବୁ ଦେଖି ବାବା ତାଙ୍କୁ ନିଜ କୋଠରୀରୁ ବାହାର କରିଦେଇଥିଲେ ।
ଏହା ପରେ ଆଉ ଏକ ଘଟଣା ସାମ୍ନାକୁ ଆସିଲା ଯେତେବେଳେ ବାବା ତତ୍କାଳୀନ ପ୍ରଧାନମନ୍ତ୍ରୀ ନରସିଂହ ରାଓଙ୍କୁ ଉପହାର ଦେଇଥିଲେ । ଏହି ଦୃଶ୍ୟ ଦୁରଦର୍ଶନରେ ରେକର୍ଡ ହୋଇଥିଲା ଯେଉଁଥିରେ ବାବାଙ୍କ ଯାଦୁଗରୀ ଜଣା ପଡିଥିଲା । କିନ୍ତୁ ପ୍ରସାରଣ ସମୟରେ ଦୁରଦର୍ଶନ ଏହାକୁ କାଟି ଦେଇଥିଲେ । ସେହିପରି ବିବିସି ଏକ ଡକ୍ୟୁମେଂଟାରୀ ବନାଇଥିଲା ଯେଉଁଥିରେ ବାବାଙ୍କ ସତ୍ୟ ସାମ୍ନାକୁ ଆସିଥିବାର ଶୁଣିବାକୁ ମିଳିଥିଲା । ବାବାଙ୍କ ବିରୋଧରେ ଯୌନ ନିର୍ଯାତନା ଭଳି ସଙ୍ଗୀନ୍ ଅଭିଯୋଗ ମଧ୍ୟ ହୋଇଥିଲା ।
ତେବେ ଏକଥା ସତ ଯେ ବାବା ଗରିବ ଲୋକଙ୍କ ପାଇଁ ଡାକ୍ତରଖାନା , ଅନେକ ମନ୍ଦିର ଏବଂ ସ୍କୁଲ୍ ତିଆରି କରିଛନ୍ତି । କିନ୍ତୁ ଏକଥାକୁ ମଧ୍ୟ ଅସ୍ୱୀକାର କରିହେବ ନାହିଁ ଯେ ଏସବୁ ପଛରେ ଭକ୍ତ ମାନଙ୍କର ଟଙ୍କା ଲାଗିଛି । ତେବେ ସେ ଯାହା ହେଉନା କାହିଁକି ଆଜି ବି ସତ୍ୟସାଇଙ୍କୁ ଭଗବାନ ରୂପରେ ପୂଜା କରନ୍ତି ଭକ୍ତ ।