#WebExclusive ସାତକୋଶିଆକୁ ଆସିପାରୁନି ମହାବଳ । ରାଜ୍ୟ ଓ କେନ୍ଦ୍ରର ଗ୍ରୀନ ସିଗନାଲ ସତ୍ୱେ କାହିଁକି ଅଟକିଛି ସ୍ଥାନାନ୍ତରଣ?
ବାଘ ଆସିବାରେ ବିଳମ୍ବ । ସମସ୍ତ ପ୍ରସ୍ତୁତି ସତ୍ତେ୍ୱ ସାତକୋଶିଆ ଅଭୟାରଣ୍ୟକୁ ଆସିପାରୁନି ମଧ୍ୟପ୍ରଦେଶ ବାଘ । ଉଭୟ ରାଜ୍ୟ ଏଥିପାଇଁ ସହମତି ହେବା ପରେ କେନ୍ଦ୍ର ମଧ୍ୟ ଏନେଇ ଗ୍ରୀନ ସିଗନାଲ ଦେଇସାରିଛି । ଏପରିକି ବାଘଙ୍କୁ ପ୍ରାଥମିକ ପର୍ଯ୍ୟାୟରେ ରଖାଯିବାକୁ ଥିବା ଏନକ୍ଲୋଜର କାମ ସମ୍ପୂର୍ଣ୍ଣ ହୋଇସାରିଥିବା ବେଳେ ୮ ଜଣ ବନ କର୍ମଚାରୀ ମଧ୍ୟପ୍ରଦେଶ ଯାଇ ହାସଲ କରିସାରିଛନ୍ତି ତାଲିମ । କିନ୍ତୁ ମଧ୍ୟପ୍ରଦେଶ ବନବିଭାଗ କର୍ମଚାରୀ ତାଙ୍କ ଦରମା ବୃଦ୍ଧି ଦାବୀରେ ଆନ୍ଦୋଳନ ଚଲାଇଥିବାରୁ ସଫଳ ହୋଇପାରୁନି ରାଜ୍ୟ ସରକାରଙ୍କର ଏହି ବହୁ ପ୍ରତୀକ୍ଷିତ ଯୋଜନା ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଯୋଗ୍ୟ ଯେ, ରାଜ୍ୟ ସରକାର ମଧ୍ୟପ୍ରଦେଶରୁ ୩ହଳ ଅର୍ଥାତ ୬ଟି ମହାବଳ ବାଘ ଆଣିବାକୁ ଦୀର୍ଘ ଦିନ ହେବ ପ୍ରକ୍ରିୟା ଆରମ୍ଭ କରିଥିଲେ । ଏହି ବାଘଙ୍କୁ ସାତକୋଶିଆ ବ୍ୟାଘ୍ର ଅଭୟାରଣ୍ୟରେ ଛଡାଯିବାର ବନ୍ଦୋବସ୍ତ କରାଯାଇଥିଲା । ଲକ୍ଷ୍ୟ ଥିଲା ରାଜ୍ୟରେ ବାଘ ବଂଶ ବୃଦ୍ଧି କରିବା ସହ, ଜଙ୍ଗଲ ଭିତରେ ଅବାଧ ପ୍ରବେଶ ଓ ଶୀକାର ଉପରେ ରୋକ୍ ଲଗାଇବା । ଏହାସହ ଜୈବ ବିବିଧତାକୁ ମଧ୍ୟ ସଂରକ୍ଷଣ କରାଯାଇପାରିବ । ଏଥିପାଇଁ ରାଜ୍ୟ ସରକାରଙ୍କ ଅନୁରୋଧ ରକ୍ଷା କରି ମଧ୍ୟପ୍ରଦେଶ ସରକାର ୬ଟି ମହାବଳ ବାଘ ଦେବାକୁ ସହମତି ପ୍ରକାଶ କରିଥିଲେ । ମଧ୍ୟପ୍ରଦେଶରେ ଥିବା କାହ୍ନା, ପାନ୍ନା ଓ ବାନ୍ଧବଗଡ ବ୍ୟାଘ୍ର ପ୍ରକଳ୍ପରୁ ଏହି ବାଘଙ୍କୁ ଓଡିଶାକୁ ଅଣାଯାଇଥାନ୍ତା । ଏ ନେଇ ଜାତୀୟ ବ୍ୟାଘ୍ର ସଂରକ୍ଷଣ ପ୍ରାଧିକରଣ ପକ୍ଷରୁ ମଧ୍ୟ ଅନୁମତି ମିଳିସାରିଥିଲା ।
ଜୁନ ପ୍ରଥମ ସପ୍ତାହରେ ପ୍ରାଥମିକ ପର୍ଯ୍ୟାୟରେ ଗୋଟିଏ ମହାବଳ ବାଘକୁ ସାତକୋଶିଆକୁ ସ୍ଥାନାନ୍ତରଣ କରିବାକୁ ସମସ୍ତ ପ୍ରକ୍ରିୟା ଚୂଡାନ୍ତ ହୋଇସାରିଥିଲା । କିନ୍ତୁ ମଧ୍ୟପ୍ରଦେଶ ବନବିଭାଗ କର୍ମଚାରୀଙ୍କ ଆନ୍ଦୋଳନ ଯୋଗୁ ଏହା ସମ୍ଭବ ହୋଇପାରୁନି । ରାଜ୍ୟ ପୋଲିସ ସହ ସମାନ ଅଙ୍କର ଦରମା ଦାବୀ କରି ସେଠାକାର ବନ କର୍ମଚାରୀମାନେ ୮ ଦିନ ହେଲାଣି କାମ ଛାଡ ଆନ୍ଦୋଳନ ଚଳାଇଛନ୍ତି । ଏହା ସତ୍ତେ୍ୱ ଖୁବ୍ ଶୀଘ୍ର ଏହି ଆନ୍ଦୋଳନ ସମାପ୍ତ ହେବ ଓ ରାଜ୍ୟକୁ ମଧ୍ୟପ୍ରଦେଶରୁ ବାଘ ଆସି ସାତକୋଶିଆରେ ପହଂଚିବ ବୋଲି ଆଶା ବାନ୍ଧିଛନ୍ତି ରାଜ୍ୟ ସରକାର । ବିଳମ୍ବ ସତ୍ତେ୍ୱ ରାଜ୍ୟ ସରକାର ଆଶା ରଖିଛନ୍ତି, ଚଳିତ ମାସ ଶେଷ ସୁଦ୍ଧା ଏହି ପ୍ରକଳ୍ପ କାର୍ଯ୍ୟକାରୀ କରିବାକୁ । ଅର୍ଥାତ, ଜୁନ ଶେଷ ସୁଦ୍ଧା ସାତକୋଶିଆରେ ମହାବଳ ଛାଡିବାକୁ ରହିଛି ଟାର୍ଗେଟ ।