ବିପଦକୁ ଖୋଲା ନିମନ୍ତ୍ରଣ । ଗମନାଗମନ ପାଇଁ ନାହିଁ ରାସ୍ତା, ପୁରୁଣା ଦେଶୀ ଡଙ୍ଗା ପାଲଟିଛି ଭରସା ।
କନକ ବ୍ୟୁରୋ : ଏବେ ମଣିଷ ଜହ୍ନରେ ଘର କରିବାକୁ ଚିନ୍ତା କରୁଛି । ସରକାର ଡିଜିଟାଲ ଇଣ୍ଡିଆର କଥା କହୁଛନ୍ତି । ହେଲେ ଆଜି ବି ରାଜ୍ୟର ଅନେକ ସ୍ଥାନକୁ ଗମନାଗମନ ସୁଗମ ହୋଇନାହିଁ । ଯେଉଁଠି ଲୋକେ ଦୈନନ୍ଦିନ କାର୍ଯ୍ୟ ପାଇଁ ବିପଦକୁ ନିମନ୍ତ୍ରଣ କରି ଦେଶୀ ଡଙ୍ଗା ଉପରେ ନିର୍ଭର କରୁଛନ୍ତି । ଗୋଲାମୁଣ୍ଡରୁ ଦେଖିବା ଦେଶୀ ଡଙ୍ଗାରେ ଜୀବନ ।
Kanak News is now on WhatsApp
Join and get latest news updates delivered to you via WhatsApp
ବିପଦକୁ ବରଣ କରି ପ୍ରତିଦିନ ଦେଶୀ ଡଙ୍ଗାରେ ଚିରସ୍ରୋତା ତେଲ ନଦୀ ପାରି ହେଉଛନ୍ତି କଳାହାଣ୍ଡି ଗୋଲାମୁଣ୍ଡା ବ୍ଲକ ହଜାର ହଜାର ଲୋକ । ବ୍ଲକର ବଡ଼ଚେରଗାଁ, ଉଛୁଲା, ଚହାକା, ନୂଆଗାଁ ପଂଚୟତର ହଜାର ହଜାର ଲୋକ ଦୈନନ୍ଦିନ କାର୍ଯ୍ୟ ପାଇଁ ବହୁ ପୁରୁଣା ଦେଶୀ ଡଙ୍ଗାକୁ ହିଁ ଭରସା କରି ବଞ୍ଚୁଛନ୍ତି । କାରଣ ଏହି ଦେଶୀ ଡଙ୍ଗାରେ ନଦୀ ପାରି ନହେଲେ ପ୍ରାୟ ୬୦ରୁ ୮୦ କିଲୋମିଟର ରାସ୍ତା ଅତିକ୍ରମ କରି ସଦର ମହୁକମା ଓ ଭବାନୀପାଟଣାକୁ ଯିବାକୁ ପଡିବ ।
ଖରା ଓ ଶୀତ ଦିନରେ ଲୋକେ ଯାହା ଯେମିତି ଡଙ୍ଗାରେ ନଦୀ ପାର ହେଉଥିବା ବେଳେ ବର୍ଷା ଦିନ କଥା କହିଲେ ନସରେ । ସେପଟେ ସ୍ଥାନୀୟ ଅଂଚଳବାସୀଙ୍କ ସମସ୍ୟାକୁ ଦୃଷ୍ଟିରେ ରଖି ୩ ବର୍ଷ ତଳୁ ତେଲ ନଦୀ ଉପରେ ବଡଚେରଗାଁ ପାଂଚାୟତ ଅଧିନସ୍ଥ ଗରଗାବ ନିକଟରେ ବିଜୁ ସେତୁ ନିର୍ମାଣ ଚାଲିଛି । ହେଲେ ପୋଲ କାମ ମନ୍ଥର ଗତିରେ ଚାଲୁଥିବାରୁ କେବେ ଶେଷ ହେବ ତାର ଠିକଣା ନାହିଁ । ଲୋକେ ଜୀବନକୁ ବାଜିରେ ଲଗାଇ ଦଦରା ଦେଶୀ ଡଙ୍ଗାରେ ନଦୀ ପାର ହେଉଥିବା ବେଳେ ପୋଲ ନିର୍ମାଣ କାମ ଉପରେ ପ୍ରଶାସନ ଗୁରୁତ୍ୱ ଦେଉ ବୋଲି ସ୍ଥାନୀୟ ବାସିନ୍ଦା ଦାବି କରିଛନ୍ତି ।