ଆଜି ରାଜ୍ୟସଭାର ଖାଲି ଥିବା ଆସନ ପାଇଁ ଭୋଟ ଗ୍ରହଣ ହେବ । ତେବେ ଉତରପ୍ରଦେଶର ରାଜ୍ୟସଭା ନିର୍ବାଚନ ଉପରେ ସମସ୍ତଙ୍କ ନଜର । ଏହି ନିର୍ବାଚନ ମଇଦାନରେ ଅଛନ୍ତି ଓଡିଆ ବୋହୂ ପ୍ରୀତି ମହାପାତ୍ର । ଉତରପ୍ରଦେଶରେ ୧୧ଟି ଆସନ ପାଇଁ ନିର୍ବାଚନ ହେବାକୁ ଥିବା ବେଳେ ରେସରେ ଅଛନ୍ତି ୧୨ ଜଣ । କଂଗ୍ରେସର ହାଇପ୍ରୋଫାଇଲ ନେତା କପିଲ ଶିବଲଙ୍କୁ ରୋକିବାକୁ ମୋଦି ପ୍ରୀତିଙ୍କୁ ବାଛିଛନ୍ତି । ଚର୍ଚ୍ଚା ଅନୁସାରେ ପ୍ରୀତି, ମୋଦିଙ୍କ ଖୁବ ନିକଟତର । ଏପରିକି ଗୁଜୁରାଟ ରାଜନୀତିରେ ମଧ୍ୟ ବେଶ ପ୍ରଭାବୀ । ଦେଶରେ ୧୦ ହଜାର ଟଏଲେଟ ନିର୍ମାଣ କରିବାକୁ ଘୋଷଣା କରି ଚର୍ଚ୍ଚାକୁ ଆସିଥିଲେ । ମୋଦିଙ୍କ ସ୍ୱଛ ଭାରତ ଅଭିଯାନକୁ ସଫଳତାର ସହ ରୂପାୟନ କରିବାକୁ ଅଂଟା ଭିଡିଥିଲେ ଏହି ସମାଜସେବୀ ।
Kanak News is now on WhatsApp
Join and get latest news updates delivered to you via WhatsApp
ଆଉ ଏବେ ମୋଦି ପ୍ରୀତିଙ୍କୁ ରାଜ୍ୟସଭା ଆଣିବାକୁ ଚେଷ୍ଟା କରିବା ପରେ ସମସ୍ତଙ୍କ ନଜରକୁ ଆସିଛନ୍ତି ଏହି ଓଡିଆ ବୋହୂ । ଜଣେ ନିର୍ଦ୍ଦଳୀୟ ପ୍ରାର୍ଥୀ ଭାବେ ସମର୍ଥନ ଯୋଗାଡ କରି ନିର୍ବାଚନ ଲଢିବା କାଠିକର ପାଠ ହୋଇଥିବା ବେଳେ ପ୍ରୀତିଙ୍କ ନାମାଙ୍କନ ପଛରେ ରହିଛି ୧୬ ବିଧାୟକଙ୍କ ସମର୍ଥନ । ଖାଲି ଏତିକି ନୁହେଁ, କୁହାଯାଉଛି ପ୍ରୀତିଙ୍କ ବିଜୟ ନିଶ୍ଚିତ କରିବାକୁ ଅଙ୍କ କଷିଛି ବିଜେପି । କେନ୍ଦ୍ରରେ କ୍ଷମତାସୀନ ବିଜେପି ଜଣେ ସମାଜସେବୀଙ୍କୁ ଆଣି ଉତରପ୍ରଦେଶରେ ପ୍ରାର୍ଥୀ କରିବା ପରେ ସାରା ଦେଶର ଗଣମାଧ୍ୟମର ନଜର ଏବେ ପ୍ରୀତିଙ୍କ ଉପରେ ।