ଦିଲ୍ଲୀର ଜବାହାରଲାଲ ନେହେରୁ ବିଶ୍ୱବିଦ୍ୟାଳୟରେ ଚାଲିଥିବା ଛାତ୍ର ଆନ୍ଦୋଳନକୁ ଦୃଷ୍ଟିରେ ରଖି ଜେଏନୟୁ କର୍ତ୍ତୃପକ୍ଷ ବର୍ଦ୍ଧିତ ହଷ୍ଟେଲ ଫିକୁ ଆଂଶିକ ଭାବେ ପ୍ରତ୍ୟାହାର କରିନେଇଛନ୍ତି । ଏହା ସତ୍ତ୍ୱେ ବି ଆନ୍ଦୋଳନ ଜାରି ରଖିବାକୁ ଛାତ୍ରଛାତ୍ରୀମାନେ ନିଷ୍ପତ୍ତି ନେଇଛନ୍ତି । ବୁଧବାର ଦିନ ରାତିରେ କିଛି ଛାତ୍ର କୁଳପତିଙ୍କ କାର୍ଯ୍ୟାଳୟରେ ଲାଗିଥିବା ନାମଫଳକକୁ ଭାଙ୍ଗିବା ସହ କବାଟ ଓ କାନ୍ଥରେ ଅଭଦ୍ର ଟିପ୍ପଣୀମାନ ଲେଖିଥିଲେ । ବିଶେଷ କରି ଉପକୁଳପତିଙ୍କୁ ବହିଷ୍କାର କରିବା ପାଇଁ ବିଭିନ୍ନ ଭାଷାରେ ଲେଖାଯାଇଥିବା ବେଳେ ଓଡ଼ିଆ ଭାଷାରେ ମଧ୍ୟ ଲେଖାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଉପକୁଳପତି ଇସ୍ତଫା ଦେବାକୁ ଓଡ଼ିଆ ଭାଷାରେ ଲେଖାଯାଇଛି। ତେବେ ଏହା କେଉଁ ଛାତ୍ରଗୋଷ୍ଠୀ ପକ୍ଷରୁ ଲେଖାଯାଇଛି ତାହା ଏଯାଏଁ ସ୍ପଷ୍ଟ ହୋଇନାହିଁ । ଏହା ପୂର୍ବରୁ ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କ ନିଷ୍ପତ୍ତି କ୍ରମେ ହଷ୍ଟେଲ ଫି ବୃଦ୍ଧିକୁ ସୀମିତ କରାଯାଇଛି ।
ନୂଆ ନିଷ୍ପତ୍ତି ଅନୁସାରେ ଡବଲ-ସିଟର ରୁମ ଭଡା ପୂର୍ବରୁ ୧୦ ଟଙ୍କା ଥିବାବେଳେ ତାହାକୁ ୨୦୦ ଟଙ୍କା କରିବା ବଦଳରେ ୧୦୦ ଟଙ୍କା କରାଯିବ । ସେହିପରି ସିଙ୍ଗଲ ସିଟର ରୁମ ପୂର୍ବରୁ ମାତ୍ର ୨୦ ଟଙ୍କା ଥିବାବେଳେ ତାହାକୁ ୬୦୦ ଟଙ୍କା କରାଯାଇଥିଲା । ଏବେ ନୂଆ ନିଷ୍ପତ୍ତି ଅନୁସାରେ ତାହାକୁ ୨୦୦ ଟଙ୍କା କରାଯାଇଛି । ତେବେ ବର୍ଦ୍ଧିତ ଫିକୁ ସମ୍ପୂର୍ଣ୍ଣ ପ୍ରତ୍ୟାହାର କରିବାକୁ ଛାତ୍ରଛାତ୍ରୀମାନେ ଅଡି ବସିଛନ୍ତି । ଏହା ସମ୍ପୂର୍ଣ୍ଣ ପ୍ରତ୍ୟାହାର ନହେବା ପର୍ଯ୍ୟନ୍ତ ଆନ୍ଦୋଳନ ଚାଲୁ ରଖିବାକୁ ନିଷ୍ପତ୍ତି ନିଆଯାଇଛି ।