ଆସନ୍ତାକାଲି ଜନ୍ମାଷ୍ଟମୀ: ଶ୍ରୀକ୍ଷେତ୍ରରେ ବ୍ୟାପକ ପ୍ରସ୍ତୁତି, ସେପଟେ ଫୁଲବାଣୀରେ ଜନ୍ମାଷ୍ଟମୀ ନେଇ ସୁରକ୍ଷା କଡାକଡି
କନକ ବ୍ୟୁରୋ: ଆସନ୍ତାକାଲି ଜନ୍ମାଷ୍ଟମୀ । ଭାଦ୍ରବ କୃଷ୍ଣପକ୍ଷ ଅଷ୍ଟମୀ ତିଥିରେ ଓ ସାରା ଦେଶରେ ପାଳନ କରାଯାଏ କୃଷ୍ଣ ଜନ୍ମ । ହିନ୍ଦୁ ପରମ୍ପରା ଅନୁସାରେ ଶ୍ରୀମନ୍ଦିର ସହିତ ମଠ ମନ୍ଦିର ଓ ଘରମାନଙ୍କର ଖୁବ ଧୁମଧାମରେ ଶ୍ରୀକୃଷ୍ଣଙ୍କ ଜନ୍ମ ପାଳନ କରାଯାଏ । ପୁରୀ ଶ୍ରୀମନ୍ଦିରରେ ଶ୍ରୀଜିଉଙ୍କ ବାରମାସର ତେର ଯାତ୍ରାରେ ହରି ଜନ୍ମାଷ୍ଟମୀ ଏକ ସ୍ୱତନ୍ତ୍ର ଉତ୍ସବ ।
Kanak News is now on WhatsApp
Join and get latest news updates delivered to you via WhatsApp
ଏହି ଦିନ ଶ୍ରୀଜଗନ୍ନାଥଙ୍କର ସଂନ୍ଧ୍ୟା ଧୂପ ପରେ ଭିତର କାଠ ନିକଟରେ ଜଗନ୍ନାଥଙ୍କ ଆଜ୍ଞାମାଳ ଆସିବା ପରେ ଭଦ୍ରାସନ ଉପରେ ଜନ୍ମନୀତି ଅନୁଷ୍ଠିତ ହୋଇଥାଏ । ପୁରୀ ସହରର ବିଭିନ୍ନ ମଠମାନଙ୍କରେ ଭଜନ କୀର୍ତନ କରାଯାଇ ଭ୍କ୍ତମାନେ ଉପବାସ ରହି ଶ୍ରୀକୃଷ୍ଣଙ୍କ ଜନ୍ମାଷ୍ଟମୀ ବ୍ରତ କରିଥାନ୍ତି । ବିଶେଷକରି ଗୌଡିୟ ମଠମାନଙ୍କରେ ଶ୍ରୀକୃଷ୍ଣଙ୍କ ଜନ୍ମାଷ୍ଟମୀ ଓ ନନ୍ଦୋତ୍ସବ ଖୁବ ଧାମଧାମରେ ପାଳନ ହୋଇଥାଏ ।
ଜନ୍ମାଷ୍ଟମୀ ପାଇଁ କନ୍ଧମାଳ ସୁରକ୍ଷା ଛାଉଣୀ ହୋଇଛି । କୌଣସି ଅପ୍ରୀତିକର ପରିସ୍ଥିତିକୁ ଏଡାଇବା ଲାଗି ପୋଲିସ ମୁତୟନ ହୋଇଛନ୍ତି । ୨୦୦୮ ମସିହାରେ ଜନ୍ମାଷ୍ଟମୀ ଦିନ ତୁମୁଡିବନ୍ଧର ଜଲେଶପେଟ୍ଟା ଆଶ୍ରମରେ ସ୍ୱାମୀ ଲକ୍ଷଣାନନ୍ଦ ସରସ୍ୱତୀଙ୍କୁ ହତ୍ୟା କରାଯାଇଥିଲା । ଏହା ପରେ କନ୍ଧମାଳରେ ଦଙ୍ଗା ପରିସ୍ଥିତି ସୃଷି ହୋଇଥିଲା ।
ଜିଲ୍ଲାରେ ପ୍ରତ୍ୟେକ ଛକରେ ଯାଂଚକୁ କଡାକଡି କରାଯିବା ସହ ସମସ୍ତ ଥାନା ଆଲର୍ଟରେ ରହିଛନ୍ତି । ଜଲେଶପେଟ୍ଟା ଓ ଚକାପାଦ ଆଶ୍ରମରେ କଡା ସୁରକ୍ଷା ବ୍ୟବସ୍ଥା ହୋଇଛି । ଜଲେଶପେଟ୍ଟା ଓ ଚକାପାଦ ଆଶ୍ରମରେ ପୋଲିସ ଫୋର୍ସ ମୁତୟନ ହୋଇଛନ୍ତି । କାଲି ସକାଳେ ଶୋଭାଯାତ୍ରା ବାହାରିବା ସହ ହୋମଯଜ୍ଞର ଆୟୋଜନ କରାଯିବ ।