ଅମାନିଆଙ୍କୁ ବାନ୍ଧିଲା ପୁଲିସ୍: ଲକଡାଉନ୍ ନିୟମ ଉଲ୍ଲଂଘନ କରି ୨୨ ଦୋକାନୀ ଗିରଫ; ତାଲାବନ୍ଦ ସତ୍ୱେ ଦୋକାନ ଖୋଲି ଜମାଉଥିଲେ ଭିଡ଼
ଭଦ୍ରକରେ ୧୬ ଓ ମାଲକାନଗିରିରେ ୬ ଜଣ ଦୋକାନୀ ଗିରଫ
କନକ ବ୍ୟୁରୋ: ରାଜ୍ୟରେ ବଢି ଚାଲିଛି ଲକଡାଉନ ଆଇନ ଉଲ୍ଲଂଘନକାରୀଙ୍କ ସଂଖ୍ୟା । ଲକଡାଉନ୍ ନିୟମ ଉଲ୍ଲଂଘନ କରି ୨୨ ଦୋକାନୀଙ୍କୁ ଗିରଫ କରିଛି ପୁଲିସ୍ । ତେବେ ଲକଡାଉନ୍ ସତ୍ୱେ ଦୋକାନ ଖୋଲି ଭିଡ଼ ଜମାଉଥିିବା ଅଭିଯୋଗରେ ଭଦ୍ରକରେ ୧୬ ଓ ମାଲକାନଗିରିରେ ୬ ଜଣ ଦୋକାନୀଙ୍କୁ ଗିରଫ କରିଛି ପୁଲିସ୍ ।
Kanak News is now on WhatsApp
Join and get latest news updates delivered to you via WhatsApp
ଅନ୍ୟପଟେ, କରୋନାର ଭୟାବହତାକୁ ନଜରରେ ରଖି ଉଭୟ କେନ୍ଦ୍ର ଏବଂ ରାଜ୍ୟ ସରକାରଙ୍କ ନିର୍ଦ୍ଦେଶକ୍ରମେ ତାଲାବନ୍ଦ ଘୋଷଣା କରାଯାଇଛି । ଏପରିକି ଲକଡାଉନ କଟକଣାକୁ ଅବମାନନା କଲେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ନିର୍ଦ୍ଦେଶ ଦିଆଯାଇଛି । ମାତ୍ର ସରକାରଙ୍କ କଟକଣାକୁ ଫୁ କରି ଦେଉଛନ୍ତି ଲୋକେ । ଆଉ ଏଭଳି ଅମାନିଆ ଲୋକଙ୍କ ବିରୋଧରେ ପୁଲିସ କାର୍ଯ୍ୟାନୁଷ୍ଠାନ ମଧ୍ୟ ଗ୍ରହଣ କରିଛି । ତେବେ ପୁଲିସ ପକ୍ଷରୁ କାର୍ଯ୍ୟାନୁଷ୍ଠାନ ସତ୍ୱେ ଉଲ୍ଲଂଘନକାରୀଙ୍କ ସଂଖ୍ୟା ବଢି ଚାଲିଥିବା ଖବର ସାମ୍ନାକୁ ଆସିଛି ।
ଏଠାରେ ଆମେ କହି ରଖୁଛୁ ଯେ, କରୋନା ସଂକ୍ରମଣ ରୋକିବା ପାଇଁ ତାଲାବନ୍ଦ କଟକଣା ଜାରି କରାଯାଇଛି । ଅତି ଆବଶ୍ୟକ ନହେଲେ ଲୋକେ ଘରୁ ନବାହାରକୁ ସରକାରଙ୍କ ପକ୍ଷରୁ ପରାମର୍ଶ ଦିଆଯାଇଛି । ସେହିପରି ଅତ୍ୟାବଶ୍ୟକ ସେବାକୁ ଛାଡିଦେଲେ ସବୁ କିଛି ବନ୍ଦ କରି ଦେଇଛନ୍ତି ସରକାର । ଏପରିକି ସାଧାରଣ ପରିବହନରେ ବି କଟକଣା ଲଗାଯାଇଛି । ଟାକ୍ସି ଓ ଅଟୋ ରିକ୍ସା ଚଳାଚଳ ଉପରେ ରୋକ୍ ଲାଗିଥିବା ବେଳେ ସହର ସହର ମଧ୍ୟରେ ବସ୍ ଚଳାଚଳ ମଧ୍ୟ ବନ୍ଦ କରିଦିଆଯାଇଛି । ସେହିପରି ଗ୍ରୋସରୀ, ପରିବା, ମାଛ, ମାଂସ, ଅଣ୍ଡା ଆଦି ଦୋକାନ ଖୋଲା ରହିବ ଓ ଏହାର ପରିବହନ କାର୍ଯ୍ୟ ମଧ୍ୟ ଜାରି ରହିବ । ମେଡିସନ୍ ଓ ଚିକିତ୍ସା ଉପକରଣ ଦୋକାନ ଖୋଲା ରହିବ । ପେଟ୍ରୋଲ ପମ୍ପ, ଗ୍ୟାସ ଏଜେନ୍ସୀ ଓ ଏହାର ଗୋଦାମ ଖୋଲା ରହିବ, ପରିବହନ ମଧ୍ୟ ଜାରି ରହିବ ମଧ୍ୟ କୁହାଯାଇଛି । ତେବେ ନିୟମକୁ ଉଲଂଘନ କରି ଯେଉଁମାନେ ଜନଜୀବନ ପ୍ରତି ବିପଦ ଆଣିବେ, ସେମାନଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଚେତାବନୀ ଦେଇଛନ୍ତି ସରକାର ।