ଦଫା ଲାଗିଲା ଫାଶୀ ଦଣ୍ଡର । ପୁରୀ ଗଣଦୁଷ୍କର୍ମ ମାମଲାର ଅଭିଯୁକ୍ତଙ୍କୁ ମିଳିବନି ତ୍ରାହି, ୨୦ ଦିନ ଭିତରେ ଫାଇଲ ହେବ ଚାର୍ଜସିଟ୍ ।
କନକ ବ୍ୟୁରୋ : ପୁରୀ ନାବାଳିକା ଗଣଦୁଷ୍କର୍ମ ମାମଲାରେ ଅଭିଯୁକ୍ତଙ୍କ ବିରୋଧରେ ସଙ୍ଗୀନ ଦଫା ଲଗାଇଲା ପୋଲିସ । ପକସୋ ଆଇନର ଧାରା-୬କୁ ମଧ୍ୟ ଅଭିଯୁକ୍ତଙ୍କ ବିରୋଧରେ ଲାଗୁ କରାଯାଇଛି । ଏହି ଧାରା ଅନୁସାରେ, ଅଭିଯୁକ୍ତ ଦୋଷୀ ପ୍ରମାଣିତ ହେଲେ ଫାଶୀ ଦଣ୍ଡର ବ୍ୟବସ୍ଥା ରହିଛି । ମାମଲାର ସମ୍ବେଦନଶୀଳତାକୁ ଦୃଷ୍ଟିରେ ରଖି ଆଜି ପୁରୀ ପୋଲିସ ପକ୍ଷରୁ ୨୦ ଦିନ ଭିତରେ ତଦନ୍ତ କରି ଚାର୍ଜସିଟ୍ ଦାଖଲ କରିବାକୁ ନିଷ୍ପତି ହୋଇଛି । ଅଭିଯୁକ୍ତମାନଙ୍କୁ କିଭଳି ଅଧିକରୁ ଅଧିକ ଦଣ୍ଡ ମିଳିବ ସେଥିପାଇଁ ଆବଶ୍ୟକ ତଥ୍ୟ ପ୍ରମାଣ ଯୋଗାଡରେ ଲାଗିଛି ପୋଲିସ ।
Kanak News is now on WhatsApp
Join and get latest news updates delivered to you via WhatsApp
ଯେତେବେଳେ ହାଇଦ୍ରାବାଦରେ ଜଣେ ଡାକ୍ତରଙ୍କୁ ଦୁଷ୍ମର୍ମ ପରେ ହତ୍ୟା ଘଟଣାକୁ ନେଇ ସାରା ଦେଶରେ ପ୍ରତିବାଦର ନିଆଁ ଜଳୁଛି, ଠିକ୍ ସେମିତି ବେଳେ ପୁରୀରେ ଗଣଦୁଷ୍କର୍ମ ଭଳି ସାଂଘାତିକ୍ ଘଟଣା ଜଳୁଥିବା ଏହି ନିଆଁରେ ଘିଅ ଢାଳି ଦେଇଛି । ଆଉ ଏଭଳି ସମ୍ବେଦନଶୀଳ ଘଟଣାକୁ ବେଶ ଗୁରୁତର ସହ ନେଇଛି ପୁଲିସ୍ ।
ପୁରୀ ଗଣଦୁଷ୍କର୍ମ ଘଟଣା ଗିରଫ ହୋଇଥିବା ମୁଖ୍ୟ ଅଭିଯୁକ୍ତ ଜିତେନ୍ଦ୍ର କୁମାର ସେଠୀ ଏବଂ ତାର ସହଯୋଗୀ ରାଜେଶ ସେଠୀଙ୍କୁ ପୁଲିସ୍ କୋର୍ଟ ଚାଲାଣ କରିଥିବା ବେଳେ ତାଙ୍କ ବିରୋଧରେ ଲାଗିଛି ପକସୋ ଆଇନର ୬ ଧାରା । ଏହି ଧାରା ଅନୁସାରେ ଅଭିଯୁକ୍ତ ଦୋଷୀ ପ୍ରମାଣିତ ହେଲେ ଫାଶିଖୁଂଟରେ ଝୁଲିବେ । ଏହା ସହିତ
-ଆଇପିସି ଧାରା ୩୬୩ ଅର୍ଥାତ୍ ବଳପୂର୍ବକ ଅପହରଣ । ଦଣ୍ଡ ବ୍ୟବସ୍ଥା- ସର୍ବାଧିକ ୭ ବର୍ଷ ପର୍ଯ୍ୟନ୍ତ ଜେଲ ଓ ଜରିମାନା
– ଆଇପିସି ଧାରା ୩୭୬ ଡିଏ ଅର୍ଥାତ୍ ନାବାଳିକାକୁ ଦୁଷ୍କର୍ମ ଓ ଗଣଦୁଷ୍କର୍ମ । ଦଣ୍ଡ ବ୍ୟବସ୍ଥା-ଆଜୀବନ କାରାଦଣ୍ଡ
-ଆଇପିସି ଧାରା ୩୯୪ ଅର୍ଥାତ୍ ମାଡ ମାରିବା, ଆଘାତ ଦେବା ଓ ଡକାୟତି କରିବା । ଭଳି ସଂଗୀନ ମାମଲା ଲାଗିଛି । ଏହି ଧାରାରେ ୧୦ ବର୍ଷ ପର୍ଯ୍ୟନ୍ତ ଜେଲ ବ୍ୟବସ୍ଥା ରହିଛି ।
ମାମଲାର ସମ୍ବେଦନଶୀଳତାକୁ ଆଖି ଆଗରେ ରଖି କେନ୍ଦ୍ରାଚଂଳ ଡିଆଇଜି କହିଛନ୍ତି-
– ୨୦ ଦିନ ଭିତରେ ତଦନ୍ତ କରି ଚାର୍ଜସିଟ୍ ଦାଖଲ କରିଯିବ
– ମାମଲାର ତୁରନ୍ତ ବିଚାର ପାଇଁ ଫାଷ୍ଟଟ୍ରାକ୍ କୋର୍ଟକୁ ଅନୁରୋଧ କରାଯିବ
-ପୀଡ଼ିତାଙ୍କୁ ଆଇନଗତ ସହାୟତା ଦେବା ପାଇଁ ସ୍ୱତନ୍ତ୍ର ଓକିଲ ଯୋଗଇ ଦିଆଯିବ
-ଅଭିଯୁକ୍ତଙ୍କ ବିରୋଧରେ ଦୃଷ୍ଟାନ୍ତମୂଳକ ପଦକ୍ଷେପ ନେଇ ପ୍ରୟାସ କରାଯିବ ବୋଲି ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ।
ଏପଟେ ପୀଡ଼ିତାଙ୍କ ବୟାନ ରେକର୍ଡ କରିବା ସହ ପୀଡ଼ିତାଙ୍କ ସୁରକ୍ଷା ପାଇଁ ପୁଲିସ୍ ପକ୍ଷରୁ ବ୍ୟବସ୍ଥା କରାଯାଇଛି । ସେହିପରି ଏହି ଘଟଣାରେ ସଂପୃକ୍ତ ଥିବା ଅନ୍ୟ ଅଭିଯୁକ୍ତଙ୍କୁ ଅଟକ ରଖି ପଚରାଉଚୁରା କରୁଛି ପୁଲିସ୍ । ପୀଡ଼ିତାଙ୍କ ଅଭିଯୋଗ ଅନୁସାରେ ସେ, ନିମାପଡ଼ାରୁ କାକଟପୁର ଯିବା ପାଇଁ ବସକୁ ଅପେକ୍ଷା କରିଥିବା ସମୟରେ ବହିଷ୍କୃତ ପୁଲିସ୍ କର୍ମଚାରୀ ଜିତେନ୍ଦ୍ର ସେଠୀ ଏବଂ ତାଙ୍କର ସହଯୋଗୀ, କାକଟପୁରରେ ଛାଡ଼ି ଦେବାକୁ କହି କାର୍ରେ ନେଇ ଯାଇଥିଲେ । ହେଲେ କାକଟପୁର ପରିବର୍ତେ ପୁରୀ ନେଇଯାଇଥିଲେ । ଏବଂ ପୁରୀରେ ଥିବା କ୍ୱାଟରରେ ଗଣଦୁଷ୍କର୍ମ କରିଥିଲେ ।