ପେଟ୍ରୋଲ୍ ଦର ୭୦ ଟଙ୍କା ଟପିବ! ପ୍ରତିଦିନ ଦର ସଂଶୋଧନ ପରେ ଦର ୭ ଟଙ୍କା ବଢ଼ିଲାଣି
କନକ ବ୍ୟୁରୋ: ଦେଶରେ ପେଟ୍ରୋଲ ଏବଂ ଡିଜେଲର ଦୈନିକ ମୂଲ୍ୟ ସଂଶୋଧନକୁ ନେଇ ଏବ ବଡ଼ ଧରଣର ବିତର୍କ ଆରମ୍ଭ ହେଲାଣି । ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ମୂଲ୍ୟ ଏବେ ବ୍ୟାରେଲ ପିଛା ପାଖାପାଖି ୫୦ ଡଲାର ଥିଲେ ମଧ୍ୟ ଦେଶରେ ପେଟ୍ରୋଲ ଏବଂ ଡିଜେଲ ମୂଲ୍ୟ କାହିଁକି ଏତେ ଉଚ୍ଚସ୍ତରରେ ରହିଛି ତାହାକୁ ନେଇ ଗ୍ରାହକ ପ୍ରଶ୍ନ କରିବା ଆରମ୍ଭ କଲେଣି ।
Kanak News is now on WhatsApp
Join and get latest news updates delivered to you via WhatsApp
ଭୁବନେଶ୍ୱରରେ ଗତକାଲି ପେଟ୍ରୋଲ ମୂଲ୍ୟ ଲିଟର ପିଛା ୬୯ ଟଙ୍କା ୧୦ ପଇସା ରହିଥିବାବେଳେ ଡିଜେଲ ମୂଲ୍ୟ ୬୨ ଟଙ୍କା ୭୮ ପଇସା ରହିଛି । ତେଲ ମୂଲ୍ୟ ଦୈନିକ ସଂଶୋଧନ ହେବାପରଠାରୁ ରାଜ୍ୟରେ ପେଟ୍ରୋଲ ମୂଲ୍ୟ ପାଖାପାଖି ୬ରୁ ୭ ଟଙ୍କା ବୃଦ୍ଧି ଘଟିଲାଣି । ଦୈନିକ ମୂଲ୍ୟ ସଂଶୋଧନ ପରଠାରୁ ପେଟ୍ରୋଲ ଏବଂ ଡିଜେଲ ଦର ଯେଉଁ ଧାରାରେ ବୃଦ୍ଧି ଘଟୁଛି ଭୁବନେଶ୍ୱରରେ ପେଟ୍ରୋଲ ମୂଲ୍ୟ ଲିଟର ପିଛା ୭୦ ଟଙ୍କା ଟପିବାକୁ ଆଉ ଅଧିକ ଦିନ ଲାଗିବ ନାହିଁ ବୋଲି ଜଳଜଳ ଦିଶିଲାଣି ।
ଉପା ସରକାରଙ୍କ ଅମଳରୁ ପେଟ୍ରୋଲ ଏବଂ ଡିଜେଲ ଦର ପ୍ରତି ୧୫ ଦିନରେ ଥରେ ବଦଳୁଥିଲା । ଅନ୍ତର୍ଜାତୀୟ ବଜାରରେ ଅଶୋଧିତ ତୈଳର ମୂଲ୍ୟ ଏବଂ ଡଲାର ତୁଳନାରେ ଟଙ୍କାର ବିନିମୟ ମୂଲ୍ୟକୁ ଦେଖି ସରକାରୀ ତେଲ କମ୍ପାନି ଗୁଡ଼ିକ ଏହି ମୂଲ୍ୟ ସଂଶୋଧନ କରୁଥିଲେ । ଏହାଫଳରେ ପେଟ୍ରୋଲ ଏବଂ ଡିଜେଲ ଦର ଏକାଥରରେ ଦୁଇ ତିନି ଟଙ୍କା ବଢ଼ୁଥିଲା କିମ୍ବା କମୁଥିଲା । କିନ୍ତୁ ଏନଡିଏ ସରକାର ଆସିବା ପରେ ଚଳିତ ବର୍ଷ ଜୁନ୍ ୧୬ ପରଠାରୁ ଦେଶରେ ପ୍ରତିଦିନ ପେଟ୍ରୋଲ ଏବଂ ଡିଜେଲ ମୂଲ୍ୟ ସଂଶୋଧନ କରିବା ଆରମ୍ଭ କରିଛନ୍ତି । ପ୍ରଥମେ ଚଳିତବର୍ଷ ମେ ପହିଲାରୁ ଦେଶର ପାଞ୍ଚଟି ସହରରେ ନୂଆ ମୂଲ୍ୟ ସଂଶୋଧନ ବ୍ୟବସ୍ଥାର ମୂଲ୍ୟ ସଂଶୋଧନ ନେଇ ପାଇଲଟ ପ୍ରକଳ୍ପ ଆରମ୍ଭ କରିଲେ । ଏହାପରେ ଚଳିତବର୍ଷ ଜୁନ୍ ୧୬ ତାରିଖରୁ ଦେଶବ୍ୟାପୀ ପେଟ୍ରୋଲ ଏବଂ ଡିଜେଲର ଦୈନିକ ମୂଲ୍ୟ ସଂଶୋଧନ କରି ଆସୁଛନ୍ତି । କିନ୍ତୁ ଦୈନିକ ମୂଲ୍ୟ ସଂଶୋଧନ ହେଲେ ଗ୍ରାହକଙ୍କୁ ଯେଉଁ ଲାଭ ମିଳିବ ବୋଲି ଆଶା ରଖାଯାଇଥିବା ସେହି ଆଶା ଏବେ ମିଳାଇ ଗଲାଣି ।
ପେଟ୍ରୋଲ ମୂଲ୍ୟ ଲିଟର ପିଛା ଗତକାଲି ମୁମ୍ବାଇରେ ୭୯ ଟଙ୍କା ୪୧ ପଇସା ଛୁଇଛି । ଫଳରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅମଳରେ ପେଟ୍ରୋଲ ମୂଲ୍ୟ ଗତକାଲି ସର୍ବୋଚ୍ଚ ସ୍ତରରେ ପହଞ୍ଚିଛି । ଗତ କିଛି ଦିନ ହେଲା ଅନ୍ତର୍ଜାତୀୟ ବଜାରରେ ଅଶୋଧିତ ତେଲ ମୂଲ୍ୟ ବୃଦ୍ଧି ଘଟୁଥିବାରୁ ପେଟ୍ରୋଲ ମୂଲ୍ୟ ବୃଦ୍ଧି ପାଉଛି ବୋଲି କୁହାଯାଉଛି । ଏବେ ଅନ୍ତର୍ଜାତୀୟ ବଜାରରୁ ଭାରତ ଅଶୋଧିତ ତେଲକୁ ବ୍ୟାରେଲ ପିଛା ପ୍ରାୟ ୫୩ ଡଲାରରେ କିଣୁଛି । ତେଣୁ ପେଟ୍ରୋଲ ଏବଂ ଡିଜେଲ ମୂଲ୍ୟ ଏତେ ଅଧିକ ରହିବା ବିଷୟକୁ ଅନେକ ଉପଯୁକ୍ତ ବୋଲି ମନେ କରୁନାହାନ୍ତି ।
ଅତୀତ ମୂଲ୍ୟ ଉପରେ ନଜର ପକାଇଲେ ଜଣାଯାଏ ଯେ, ଉପା ସରକାର ଅମଳରେ ୨୦୧୩ ସେପ୍ଟେମ୍ବରରେ ପେଟ୍ରୋଲ ମୂଲ୍ୟ ଭୁବନେଶ୍ୱରରେ ସର୍ବାଧିକ ୭୫ ଟଙ୍କା ୩୨ ପଇସା ରହିଥିବାବେଳେ ଡିଜେଲ ଦର ସର୍ବାଧିକ ୬୦ ଟଙ୍କା ପାଖାପାଖି ରହିଥିଲା । ଭୁବନେଶ୍ୱର ମୂଲ୍ୟ ବିଚାରକୁ ନେଲେ ଏନଡିଏ ସରକାର ଅମଳରେ ୨୦୧୪ ଜୁଲାଇ ୧୯ ତାରିଖରେ ପେଟ୍ରୋଲ ମୂଲ୍ୟ ସର୍ବାଧିକ ୭୪ ଟଙ୍କା ୨୨ ପଇସା ଛୁଇଁଥିଲା । ସେହିଭଳି ଡିଜେଲ ଦର ଲିଟର ପିଛା ସର୍ବାଧିକ ୬୪ ଟଙ୍କା ୨୫ ପଇସାରେ ପହଞ୍ଚିଥିଲା ଚଳିତବର୍ଷ ଜାନୁଆରି ୧୬ ତାରିଖରେ । ତେଣୁ ଭୁବନେଶ୍ୱରରେ ପେଟ୍ରୋଲ ଏବଂ ଡିଜେଲ ମୂଲ୍ୟ ରେକର୍ଡ ଭାଙ୍ଗିବାକୁ ଆଉ କିଛି ଦିନ ଲାଗିବ । ପେଟ୍ରୋଲ ଏବଂ ଡିଜେଲ ମୂଲ୍ୟ ଯଦି ଏହି ଧାରାରେ ବୃଦ୍ଧି ଘଟିବ ତାହେଲେ ମୂଲ୍ୟ ସଂଶୋଧନ ବ୍ୟବସ୍ଥାରେ ସଂସ୍କାର ଆଣିବାର ମୌଳିକ ଲକ୍ଷ୍ୟ ହାସଲ ହୋଇପାରିବ ନାହିଁ ବୋଲି ଅନେକ ମତ ଦେଉଛନ୍ତି ।