ଓଟିଭି ବିରୋଧରେ ସ୍ୱାଧିକାର ଭଙ୍ଗ ନୋଟିସ । କାହିଁକି ବାତିଲ ହେବନି ପ୍ରସାରଣ, କାରଣ ଦେଖାଇବେ ଚ୍ୟାନେଲ କର୍ତ୍ତୃପକ୍ଷ ।
ସୋମବାର ଓଟିଭିରେ ପ୍ରଦର୍ଶିତ ଏକ ରିପୋର୍ଟ ଆଧାରରେ ସ୍ୱାଧୀକାର ଭଙ୍ଗ ପ୍ରସ୍ତାବ ଆଣିଛନ୍ତି ବିରୋଧୀ ଦଳ ମୁଖ୍ୟ ସଚେତକ ।
କନକ ବ୍ୟୁରୋ : ଗଣମାଧ୍ୟମ ସଂସ୍ଥା ଓଟିଭି ବିରୋଧରେ ଆସିଲା ସ୍ୱାଧିକାର ଭଙ୍ଗ ପ୍ରସ୍ତାବ । ବିଧାନସଭାରେ ବିରୋଧୀ ଦଳ ମୁଖ୍ୟ ସଚେତକ ତାରାପ୍ରସାଦ ବାହିନୀପତି ଏସଂକ୍ରାନ୍ତୀୟ ନୋଟିସ ଆଣିଛନ୍ତି । ସୋମବାର ଓଟିଭିରେ ପ୍ରଦର୍ଶିତ ଏକ ରିପୋର୍ଟ ଆଧାରରେ ଏପରି ପ୍ରସ୍ତାବ ଆଗତ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ତାରା ପ୍ରସାଦ ବାହିନୀପତି ଆଣିଥିବା ପ୍ରସ୍ତାବକୁ ବାଚସ୍ପତି ପ୍ରଦୀପ ଅମାତ ଗ୍ରହଣ କରି ଚ୍ୟାନେଲ କର୍ତ୍ତୃପକ୍ଷଙ୍କୁ ନୋଟିସେ ପାଇଁ ବିଧାନସଭା ସଚିବଙ୍କୁ କହିଛନ୍ତି । କାହିଁକି ଚ୍ୟାନେଲର ସିଧା ପ୍ରସାରଣ ଏବଂ ପ୍ରବେଶ ଉପରେ ରୋକ ଲଗାଯିବ ନାହିଁ, ସେନେଇ ନୋଟିସ କରିବାକୁ ବାଚସ୍ପତି କହିଛନ୍ତି ।
ଗତକାଲି ବିଧାନସଭା ଅଧିବେଶନ କାର୍ଯ୍ୟ ଆରମ୍ଭ ହେବା କ୍ଷଣି ଗୃହର ମଧ୍ୟଭାଗକୁ ଆସି କଂଗ୍ରେସ ସଦସ୍ୟ ହୋହଲ୍ଲା କରିଥିଲେ । ବିଜେପି ସଦସ୍ୟ ନିଜ ଆସନରେ ଠିଆ ହୋଇ ନାରାବାଜି କରୁଥିବା ବେଳେ ଶାସକ ଦଳର ସଭ୍ୟ କେନ୍ଦ୍ର ବିରୋଧୀ ପ୍ରସଙ୍ଗ ଉଠାଇ ପ୍ରତିବାଦ କରୁଥିଲେ । ଆଉ ଏହାରି ଭିତରେ ଗୃହରେ ଶାସକ ଦଳର ସଭ୍ୟଙ୍କ ପ୍ରଶ୍ନର ଉତ୍ତର ରଖୁଥିଲେ ଅର୍ଥମନ୍ତ୍ରୀ ଶଶୀଭୂଷଣ ବେହେରା ।
ତେବେ ହଟ୍ଟଗୋଳ ଭିତରେ ଗୃହକାର୍ଯ୍ୟ ସ୍ୱାଭାବିକ ଭାବେ ଚାଲିପାରୁନଥିବାରୁ ଗୃହକୁ ମୁଲତବୀ ରଖିଥିଲେ ବାଚସ୍ପତି । ତେବେ ଏହାରି ଭିତରେ କଣ ସବୁ ଘଟଣା ମାନ ଘଟିଥିଲା, ଆଉ କିଭଳି ବିଧାନସଭା ସଚିବ ଆସି ବାଚସ୍ପତିଙ୍କୁ ମୁଲତବୀ ସଂକ୍ରାନ୍ତରେ କହିବା ପରେ ଗୃହକୁ ମୁଲତବୀ ରଖାଯାଇଥିଲା, ସେନେଇ ଏକ ରିପୋର୍ଟ ଦେଖାଇଥିଲେ ଓଟିଭି । ତେବେ ସ୍ୱାଧିକାର ଭଙ୍ଗ ପ୍ରସ୍ତାବ ଆଗତ ହେବା ଓ ନୋଟିସ ସଂକ୍ରାନ୍ତରେ ଓଟିଭି କର୍ତ୍ତୃପକ୍ଷଙ୍କ ପ୍ରତିକ୍ରିୟା ମିଳିପାରିନାହିଁ ।