ନିର୍ବାଚନ ପୂର୍ବରୁ ମୋଦିଙ୍କ ଉପହାର: ଏଣିକି ରାସନକାର୍ଡଧାରୀଙ୍କୁ ମିଳିବ ମାଗଣାରେ ଗ୍ୟାସ୍, ଜାଣନ୍ତୁ କିଭଳି ପାଇବେ ଆପଣ
ଖୁବ୍ ଶୀଘ୍ର ହିଁ ସବୁ ପ୍ରକାରର ରାସନ କାର୍ଡ ଧାରକଙ୍କୁ ଉଜ୍ଜ୍ୱଳା ଯୋଜନା ଅନୁସାରେ ମାଗଣାରେ ଏଲପିଜି ଗ୍ୟାସ କନେକ୍ସନ ମିଳିବ । ଜାତୀୟ ଗଣମାଧ୍ୟମରେ ପ୍ରକାଶିତ ଖବର ଅନୁସାରେ. ଏନେଇ ମୋଦି ସରକାର ଚଳିତ ସପ୍ତାହରେ ହିଁ ଘୋଷଣା କରିପାରନ୍ତି । ଯୋଜନାରେ କିଛି ପରିବର୍ତ୍ତନ କରାଯିବା ପରେ ସବୁ ପ୍ରକାରର ରାସନ କାର୍ଡ ଧାରକଙ୍କୁ ତଥା ଗରିବ ସୀମାରେଖା ତଳେ ବାସକରୁଥିବା ସମସ୍ତ ପରିବାରକୁ ଏହି ସୁବିଧା ପ୍ରଦାନ କରାଯିବ । ତେବେ ଏଥିପାଇଁ ସେମାନଙ୍କୁ ଏକ ଘୋଷଣା ପତ୍ର ସରକାରଙ୍କୁ ଦେବାକୁ ପଡିବ । ଯେଉଁଥିରେ ସେ ଗରିବ ବୋଲି ଉଲ୍ଲେଖ ରହିଥିବ ।
Kanak News is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ମଇ ୨୦୧୬ରେ ଗରିବ ପରିବାରଙ୍କୁ ରୋଷେଇ ପାଇଁ ଇନ୍ଧନ ଉପଲବ୍ଧ କରାଇବା ଉଦ୍ଦେଶ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉଜ୍ଜ୍ୱଳା ଯୋଜନାର ଶୁଭାରମ୍ଭ କରିଥିଲେ । ତେବେ ୩ ବର୍ଷ ଭିତରେ ୫କୋଟି ପରିବାରକୁ ମାଗଣାରେ ଏଲପିଜି କନେକ୍ସନ ଉପଲବ୍ଧ କରାଇବାର ଲକ୍ଷ୍ୟ ରଖାଯାଇଥିଲା । ସେତେବେଳେ ୨୦୧୧ରେ ହୋଇଥିବା ସାମାଜିକ ଆର୍ଥିକ ଏବଂ ଜାତିଗତ ଜନଗଣନାରେ ଗରିବ ସୀମାରେଖା ତଳେ ରହିଥିବା ପରିବାରକୁ ଏହାର ଲାଭ ଦେବା ସୁନିଶ୍ଚିତ କରାଯାଇଥିଲା । ଏଥିପାଇଁ ସରକାର ୮ ହଜାର ଟଙ୍କାର ବଜେଟ୍ ଆକଳନ କରିଥିଲେ । ଯାହା ନିର୍ଧାରିତ ସମୟ ପୂର୍ବରୁ ହିଁ ପୂରଣ ହୋଇସାରିଛି ।
ତେଣୁ ଏହି ଯୋଜନାର ସଫଳତାକୁ ଦୃଷ୍ଟିରେ ରଖି ଗତ ବଜେଟ ସମୟରେ ଅର୍ଥମନ୍ତ୍ରୀ ଏଥିପାଇଁ ୪ହଜାର ୮୦୦କୋଟି ଟଙ୍କାର ଅତିରିକ୍ତ ବଜେଟ ଆକଳନ କରିଥିଲେ । ଏଥି ସହିତ ହିଁ ଏହି ଯୋଜନାର ଲକ୍ଷ୍ୟକୁ ବଢାଯାଇ ୨୦୨୦ ସୁଦ୍ଧା ୮କୋଟି ପରିବାରକୁ ଏହି ଯୋଜନାରେ ଅନ୍ତର୍ଭୁକ୍ତ କରିବାକୁ ଲକ୍ଷ୍ୟ ରଖାଯାଇଛି । ତେବେ ଏଯାବତ୍ ଏହି ଯୋଜନାର ଲାଭ ପାଖାପାଖି ୫.୮ କୋଟି ପରିବାର ଉଠାଇସାରିଲେଣି । ଯାହା ୮କୋଟି ପରିବାର ଲକ୍ଷ୍ୟଠାରୁ ବହୁ ଗୁଣା କମ୍ ରହିଛି । ତେଣୁ ଏହାକୁ ଦୃଷ୍ଟିରେ ରଖି ସରକାର ଏହି ଯୋଜନାକୁ ସମସ୍ତ ଗରିବ ପରିବାରଙ୍କ ପାଇଁ ଖୋଲିବାକୁ ନିଷ୍ପତି ନେଇଛନ୍ତି । ଏଠାରେ ଆମେ କହି ରଖୁଛୁ କି, ସାରା ଦେଶରେ ପାଖାପାଖି ୯କୋଟି ୨୭ ଲକ୍ଷ ରାସନ କାର୍ଡ ଧାରକ ଅଛନ୍ତି । ତେବେ ଏହି ପରିବର୍ତନ ଦ୍ୱାରା କୋଟି କୋଟି ଜନତାଙ୍କୁ ଏହି ଯୋଜନାର ଫାଇଦା ମିଳିବ ।