ଆଇପିଏଲ ୨୦୨୦ରେ ଆସିବ ନୂଆ ନିୟମ । ଗୋଟିଏ ଟିମରେ ଖେଳିବେ କୋହଲି, ଧୋନି ଓ ରୋହିତ, ନୂଆ ନିୟମକୁ ଗାଙ୍ଗୁଲିଙ୍କ ଗ୍ରୀନ୍ ସିଗନାଲ ।
ମାର୍ଚ୍ଚ ୨୯ରେ ଆରମ୍ଭ ହେବାକୁ ଯାଉଛି ଆଇପିଏଲର ୧୩ ତମ ସଂସ୍କରଣ । ପୁଣିଥରେ ଫଟାଫଟ କ୍ରିକେଟର ମଜା ଉଠାଇବେ କ୍ରିକେଟପ୍ରେମୀ । ୮ଟି ଟିମକୁ ନେଇ ହେବ ମହାଲଢେଇ । ତେବେ ଚଳିତ ଆଇପିଏଲରେ କିଛି ନୂଆ ଦେଖିବାକୁ ମିଳିବ । ଆଇପିଏଲର ୧୩ ତମ ସଂସ୍କରଣରେ ଅନେକ ନୂଆ ନିୟମ ଦେଖିବାକୁ ପାଇବେ ଦର୍ଶକ । ଆଉ ଏହି ନୂଆ ନିୟମ ଆଇପିଏଲର ରୋମାଞ୍ଚକୁ ଦ୍ୱିଗୁଣିତ କରିବ । ନୂଆ ନିୟମକୁ ବିସିସିଆଇ ଓ ଆଇପିଏଲ ଗଭର୍ଣ୍ଣିଙ୍ଗ କାଉନସିଲ ଗ୍ରୀନ୍ ସିଗନାଲ ଦେଇଛି ।
Kanak News is now on WhatsApp
Join and get latest news updates delivered to you via WhatsApp
ମାର୍ଚ୍ଚ ୨୯ରେ ହେବାକୁ ଥିବା ଆଇପିଏଲ ସିଜିନ ୧୩ରେ ଯେଉଁ ନୂଆ ନିୟମକୁ ଅଧିକ ଚର୍ଚ୍ଚା ହେଉଛି ତାହା ହେଲା କନ-କସନ ସବଷ୍ଟିଚ୍ୟୁଟସ । ନୂଆ ନିୟମ ଅନୁଯାୟୀ, ମ୍ୟାଚ୍ ମଝିରେ ଯଦି କୌଣସି ବ୍ୟାଟସମ୍ୟାନ କିମ୍ବା ବୋଲର ଆହତ ହୁଅନ୍ତି ତେବେ ତାଙ୍କ ବଦଳରେ ଅନ୍ୟ ଖେଳାଳିଙ୍କୁ ସେହି ସ୍ଥାନରେ ଖେଳାଯିବ । ଯାହାକୁ କନ-କସନ ନିୟମ ବୋଲି କୁହାଯାଇଛି । ତେବେ ବଦଳ ଖେଳାଳିଙ୍କ ବାବଦରେ ମ୍ୟାଚ୍ ରେଫରୀ ଶେଷ ନିଷ୍ପତି ନେବେ । ଏହି ନୂଆ ନିୟମକୁ ନେଇ କ୍ରିକେଟପ୍ରେମୀ ଅଧିକ ଉତ୍ସାହିତ ଅଛନ୍ତି । ଏହି ନିୟମ ପୂର୍ବରୁ ଆସେସ ମ୍ୟାଚରେ ଦେଖିବାକୁ ମିଳିଛି । ଅଷ୍ଟ୍ରେଲିଆର ଷ୍ଟିଭ ସ୍ମିଥ ଆହତ ହେବା କାରଣରୁ ମାର୍କସ ଲାବୁସଚେଞ୍ଜଙ୍କୁ ସାମିଲ କରାଯାଇଥିଲା ।
ସେହିଭଳି ଅନ୍ୟ ଏକ ନୂଆ ନିୟମ ଅନୁଯାୟୀ, ଫିଲ୍ଡ ଅମ୍ପାୟାର ନୋ ବଲ ନେଇ ଶେଷ ନିଷ୍ପତି ନେଇପାରିବେ ନାହିଁ । ଥାର୍ଡ ଅମ୍ପାୟାର ହିଁ ନୋ ବଲ ନେଇ ନିଷ୍ପତି ନେବେ । ଏହି ନିୟମ ଭାରତ-ୱେଷ୍ଟଇଣ୍ଡିଜ ଦିନିକିଆ ସିରିଜରେ ଲାଗୁ ହୋଇଥିଲା । ଯାହାକୁ ଏବେ ଆଇପିଏଲରେ ଲାଗୁ କରାଯିବ । କାରଣ ଏହାପୂର୍ବରୁ ୨୦୧୯ ଆଇପିଏଲର ୧୨ତମ ସଂସ୍କରଣରେ ନୋ ବଲକୁ ନେଇ ଅନେକ ବିବାଦ ଦେଖିବାକୁ ମିଳିଥିଲା । ଆରସିବି ଓ ମୁମ୍ବାଇ ଇଣ୍ଡିଆନ୍ସ ମଧ୍ୟରେ ହୋଇଥିବା ମ୍ୟାଚରେ ଅମ୍ପାୟାରଙ୍କ ନୋ ବଲ ନିଷ୍ପତି ମ୍ୟାଚର ଫଳାଫଳକୁ ବଦଳାଇ ଦେଇଥିଲା । ସେହିଭଳି ନୋ ବଲକୁ ନେଇ ଚେନ୍ନାଇ ସୁପର କିଙ୍ଗସର ଅଧିନାୟକ ମହେନ୍ଦ୍ର ସିଂ ଧୋନି ଅମ୍ପାୟାରଙ୍କ ସହ ଯୁକ୍ତିତର୍କ କରିବାକୁ ମଧ୍ୟ ପଛାଇ ନଥିଲେ । ତେଣୁ ନୋ ବଲ ନିୟମରେ କିଛିଟି ପରିବର୍ତ୍ତନ ଅଣାଯାଇଛି ।
ଏହାଛଡା ଚଳିତ ଆଇପିଏଲର ଉଦଘାଟନୀ ମ୍ୟାଚ୍ ପୂର୍ବରୁ ୮ ଟିମର ଖେଳାଳିଙ୍କୁ ନେଇ ଅଲଷ୍ଟାର୍ସ ମ୍ୟାଚ୍ ଖେଳାଯିବ । ଆଇପିଏଲ ଇତିହାସରେ ପ୍ରଥମ ଥର ପାଇଁ ଏଭଳି ଚ୍ୟାରିଟି ମ୍ୟାଚ୍ ଖେଳାଯିବ । ଉଦଘାଟନୀ ମ୍ୟାଚର ୩ ଦିନ ପୂର୍ବରୁ ଏହି ମ୍ୟାଚ୍ ଖେଳାଯିବ ବୋଲି ଜାତୀୟ ଗଣମାଧ୍ୟମରେ ଚର୍ଚ୍ଚା ହେଉଛି । ଏହି ମ୍ୟାଚ୍ ପାଇଁ ଆଇପିଏଲ ଗଭର୍ଣ୍ଣିଙ୍ଗ କାଉନସିଲ ଦୁଇଟି ଟିମ୍ ଗଠନ କରିବ । ଗୋଟିଏ ଟିମ ପୂର୍ବ ଓ ଉତ୍ତର ଭାରତର ରହିବାକୁ ଥିବା ବେଳେ ଅନ୍ୟ ଟିମ ଦକ୍ଷିଣ ଓ ପଶ୍ଚିମ ଭାରତର ରହିବ । ତେଣୁ ଦିଲ୍ଲୀ, ପଞ୍ଜାବ, ରାଜସ୍ଥାନ ଓ କୋଲକାତା ଫ୍ରାଞ୍ଚାଇଜକୁ ନେଇ ଗୋଟିଏ ଟିମ୍ ଓ ଚେନ୍ନାଇ, ମୁମ୍ବାଇ, ଆରସିବି ଓ ସନରାଇଜର୍ସ ହାଇଦ୍ରାବାଦକୁ ନେଇ ଅନ୍ୟ ଟିମ୍ ରହିବ । ତେଣୁ ଚଳିତ ବର୍ଷ ହେବାକୁ ଥିବା ଅଲ ଷ୍ଟାର୍ସ ମ୍ୟାଚରେ ରୋହିତ, କୋହଲି ଓ ଧୋନିଙ୍କୁ ଗୋଟିଏ ଟିମରେ ଦେଖିବାକୁ ମିଳିପାରେ ।
ଚଳିତ ବର୍ଷ ମୁମ୍ବାଇର ୱାଙ୍ଖଡେ ଷ୍ଟାଡିୟମରେ ଉଭୟ ଉଦଘାଟନୀ ଓ ଉଦଯାପନୀ ମ୍ୟାଚ୍ ଖେଳାଯିବ । ମାର୍ଚ୍ଚ ୨୯ରେ ଉଦଘାଟନୀ ମ୍ୟାଚ୍ ଖେଳାଯିବାକୁ ଥିବା ବେଳେ ମେ’ ୨୪ରେ ଫାଇନାଲ ମ୍ୟାଚ୍ ଖେଳାଯିବ ।