ମାଟ୍ରିକ ପରୀକ୍ଷାର୍ଥୀଙ୍କ ପାଇଁ ବଦଳିବ ନିୟମ ! ଏଣିକି ନିଜ ସ୍କୁଲରେ ଆଉ ପରୀକ୍ଷା ଦେଇପାରିବେନି ଛାତ୍ରଛାତ୍ରୀ
କନକ ବ୍ୟୁରୋ : ପୁଣି ବଦଳିବ ମାଟ୍ରିକ୍ ପରୀକ୍ଷା ଢାଞ୍ଚା। ନିଜ ବିଦ୍ୟାଳୟରେ ଆଉ ମାଟ୍ରିକ୍ ପରୀକ୍ଷା ଦେଇପାରିବେନି ଛାତ୍ରଛାତ୍ରୀ । ପୂର୍ବରୁ ମାଧ୍ୟମିକ ଶିକ୍ଷା ପରିଷଦ ଅଧୀନରେ ଦଶମ ଶ୍ରେଣୀ ଛାତ୍ରଛାତ୍ରୀ ନିଜ ସ୍କୁଲରେ ମାଟ୍ରିକ ପରୀକ୍ଷା ଦେଉଥିଲେ । କିନ୍ତୁ ଏଣିକି ମାଟ୍ରିକ ପରୀକ୍ଷା ଦେବା ପାଇଁ ଅନ୍ୟ ସ୍କୁଲକୁ ଯିବାକୁ ପଡିବ । ପୂର୍ବରୁ ପ୍ରଚଳିତ ଥିବା ଏହି ବ୍ୟବସ୍ଥାକୁ ପୁଣିଥରେ ଲାଗୁ କରିବାକୁ ଯୋଜନା ପ୍ରସ୍ତୁତ କରିଛି ବିଦ୍ୟାଳୟ ଓ ଗଣଶିକ୍ଷା ବିଭାଗ। କିନ୍ତୁ ପରୀକ୍ଷା କେନ୍ଦ୍ରର ଦୂରତା କମାଇ ଦିଆଯାଇଛି। ଏବେ ବିଦ୍ୟାଳୟଠାରୁ ୫ କି.ମି. ମଧ୍ୟରେ ପିଲାଙ୍କ ଲାଗି ପରୀକ୍ଷା କେନ୍ଦ୍ର ହେବ। ଏନେଇ ଆଜି ସଚିବାଳୟରେ ବରିଷ୍ଠ ଅଧିକାରୀଙ୍କୁ ନେଇ ପ୍ରାରମ୍ଭିକ ଆଲୋଚନା ସରିଛି। ଆସନ୍ତା ସପ୍ତାହରେ ବିଭାଗୀୟ ଅଧିକାରୀଙ୍କ ଗୁରୁତ୍ୱପୂର୍ଣ୍ଣ ବୈଠକ ବସି ଚୂଡ଼ାନ୍ତ ନିଷ୍ପତ୍ତି ନିଆଯିବ ବୋଲି ସୂଚନା ମିଳିଛି।
Kanak News is now on WhatsApp
Join and get latest news updates delivered to you via WhatsApp
ଗଣଶିକ୍ଷା ବିଭାଗ ପକ୍ଷରୁ ଏ ନେଇ ଶିକ୍ଷାବିତଙ୍କ ସହ ଆଲୋଚନା କରାଯାଇ ମତାମତ ବି ନିଆଯାଇଛି। ପରୀକ୍ଷାରେ ସ୍ୱଚ୍ଛତା ରଖିବା ସହ ଛାତ୍ରଛାତ୍ରୀଙ୍କୁ ଗୁଣାତ୍ମକ ଶିକ୍ଷା ପ୍ରଦାନ ଦିଗରେ ଏହି ପ୍ରକ୍ରିୟା ସହାୟକ ହେବ ବୋଲି ଶିକ୍ଷାବିତମାନେ ମତପ୍ରକାଶ କରିଛନ୍ତି। ଶିକ୍ଷାବିତମାନେ କହିଛନ୍ତି ଯେ ନିଜ ବିଦ୍ୟାଳୟରେ ପରୀକ୍ଷା ହେବା ଦ୍ୱାରା ଛାତ୍ରଛାତ୍ରୀ କପି କରୁଛନ୍ତି। ଯେଉଁଥିପାଇଁ ପାସ୍ ହାର ବଢ଼ୁଛି। ଗୋଟିଏ ପଟେ ପିଲାଙ୍କୁ ଗୁଣାତ୍ମକ ଶିକ୍ଷା ମିଳୁ ନ ଥିବା ବେଳେ ଅନ୍ୟପଟେ ପାସ୍ ହାର ବଢ଼ି ଚାଲିଛି। ପିଲାମାନେ କପି କରିବାର ସୁଯୋଗ ପାଉଛନ୍ତି। ତେଣୁ ପରୀକ୍ଷା କେନ୍ଦ୍ରରେ ପରିବର୍ତନ କରାଯିବାର ଆବଶ୍ୟକତା ରହିଛି। ନିଜ ବିଦ୍ୟାଳୟରେ ପରୀକ୍ଷା କେନ୍ଦ୍ର ନ କରି ଅନ୍ୟ ବିଦ୍ୟାଳୟରେ କେନ୍ଦ୍ର ହେବା ଦରକାର ବୋଲି ସେମାନେ ମତ ପ୍ରକାଶ କରିଛନ୍ତି।
ଶିକ୍ଷାବିତଙ୍କ ପରାମର୍ଶ ପରେ ପରୀକ୍ଷାରେ ସ୍ୱଚ୍ଛତା ଆଣିବାକୁ ଗଣଶିକ୍ଷା ବିଭାଗ ଅଣ୍ଟା ଭିଡ଼ିଛି। ୨୦୧୮ ମାଟ୍ରିକ୍ ପରୀକ୍ଷାରୁ ଏହି ବ୍ୟବସ୍ଥା ପୁଣିଥରେ ପୁରୁଣା ଢାଞ୍ଚା ଲାଗୁ କରିବାକୁ ବିଭାଗ ଲକ୍ଷ୍ୟ ରଖିଛି। ଏନେଇ ଆସନ୍ତା ୩ରୁ ୫ ଦିନ ମଧ୍ୟରେ ବିଭାଗୀୟ ମନ୍ତ୍ରୀ ବଦ୍ରି ନାରାୟଣ ପାତ୍ରଙ୍କ ଅଧ୍ୟକ୍ଷତାରେ ବୈଠକ ବସିବ। ଏହି ବୈଠକରେ ମନ୍ତ୍ରୀଙ୍କ ସମେତ ବିଭାଗୀୟ ସଚିବ, ମାଧ୍ୟମିକ ଶିକ୍ଷା ପରିଷଦ କର୍ତୃପକ୍ଷ ବି ସାମିଲ ହେବେ। ବୈଠକରେ ଏହି ପ୍ରସ୍ତାବକୁ ମୋହର ମରାଯିବା ପରେ ନୂଆ ନିୟମ ଲାଗୁ ହେବ ବୋଲି ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି।
ଅଧିକାରୀ ଜଣକ କହିଛନ୍ତି ଯେ ନିଜ ବିଦ୍ୟାଳୟରେ ପରୀକ୍ଷା ହେବା ଦ୍ୱାରା ପାସ୍ ହାର ବୃଦ୍ଧି ପାଉଛି। ପ୍ରତିବର୍ଷ ପାସ୍ ହାର ୨ରୁ ୩ ପ୍ରତିଶତ ବି ବଢ଼ୁଛି। କିନ୍ତୁ ପିଲାଙ୍କୁ ଗୁଣାତ୍ମକ ଶିକ୍ଷା ମିଳିପାରୁ ନାହିଁ। ଯେଉଁ ସ୍କୁଲରେ ପରୀକ୍ଷା କେନ୍ଦ୍ର ହେଉଛି ସେଠାକାର ପିଲା ଭଲ ପ୍ରଦର୍ଶନ କରୁଛନ୍ତି। ଛାତ୍ରଛାତ୍ରୀ ବହୁ ପରିମାଣରେ କପି କରୁଥିବା ନଜରକୁ ଆସୁଛି। ତାହାକୁ ଦୃଷ୍ଟିରେ ରଖି ପୁଣିଥରେ ପରୀକ୍ଷା କେନ୍ଦ୍ର ଢାଞ୍ଚା ପରିବର୍ତ୍ତନ କରିବାକୁ ଯୋଜନା ହୋଇଛି। ଚଳିତ ମାସ ଶେଷ ସୁଦ୍ଧା ପରୀକ୍ଷା କେନ୍ଦ୍ର ଚିହ୍ନଟ ହେବାକୁ ଥିବାରୁ ଏହା ପୂର୍ବରୁ ନିଷ୍ପତ୍ତି ନିଆଯିବ।