ଗୋଟିଏ ମଞ୍ଚରେ ବସିବେନି ମୋଦି ଓ ନବୀନ ! ବାରିପଦା କାର୍ଯ୍ୟକ୍ରମରେ ସାମିଲ ହେବେନି ମୁଖ୍ୟମନ୍ତ୍ରୀ

174

କନକ ବ୍ୟୁରୋ: ପ୍ରଧାନମନ୍ତ୍ରୀଙ୍କ ବାରିପଦା କାର୍ଯ୍ୟକ୍ରମରେ ସାମିଲ ହେବେନି ମୁଖ୍ୟମନ୍ତ୍ରୀ । ପ୍ରଧାନମନ୍ତ୍ରୀଙ୍କ ସରକାରୀ କାର୍ଯ୍ୟକ୍ରମରେ ସାମିଲ ହେବେନି ବିଜେଡି ସୁପ୍ରିମୋ ନବୀନ ପଟ୍ଟନାୟକ । କିନ୍ତୁ ପୁରୀ ଏସଏଚଜି କାର୍ଯ୍ୟକ୍ରମରେ ନବୀନ ପଟ୍ଟନାୟକ ସାମିଲ ହେବେ ବୋଲି ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ତରଫରୁ ସୂଚନା ମିଳିଛି ।

ତେବେ ଏହା ପୂର୍ବରୁ ଗତ ଡିସେମ୍ବର ୨୪ ତାରିଖରେ ମୋଦିଙ୍କ ଅରଗୁଳ ସରକାରୀ କାର୍ଯ୍ୟକ୍ରମରେ ନବୀନ ସାମିଲ ହୋଇଥିଲେ । ସେଠାରେ ମୋଦିଙ୍କ ସହ ଗୋଟିଏ ମଞ୍ଚ ସେୟାର କରିଥିଲେ ନବୀନ । ଏପରିକି ମଞ୍ଚ ଉପରେ ବେଶ କିଛି ସମୟ ଉଭୟଙ୍କ ମଧ୍ୟରେ ବାର୍ତ୍ତାଳାପ ଦେଖିବାକୁ ମିଳିଥିଲା । ଯାହାକୁ ନେଇ ଅନେକ ରାଜନୈତିକ ଚର୍ଚ୍ଚା ହୋଇଥିଲା ।

କିନ୍ତୁ ଅରଗୁଳ କାର୍ଯ୍ୟକ୍ରମ ପରେ ଖୋର୍ଦ୍ଧା ସଭାରେ ନାଁ ନନେଇ ରାଜ୍ୟ ସରକାରଙ୍କୁ ଟାର୍ଗେଟ କରିଥିଲେ ମୋଦି । ୯ ପ୍ରଶ୍ନ ପଚାରି ସରକାରକୁ କାଠଗଡାରେ ଛିଡା କରିଥିଲେ ମୋଦି । ତେବେ ଏହାର ଗୋଟିଏ ଦିନ ପରେ ବିଜେଡିର ପ୍ରତିଷ୍ଠା ଦିବସରେ ଆଟାକିଙ୍ଗ ମୁଡକୁ ଆସି ଯାଇଥିଲେ ନବୀନ । ପ୍ରତିଷ୍ଠା ଦିବସରେ ନବୀନ ମଧ୍ୟ କେନ୍ଦ୍ର ସରକାରଙ୍କୁ ୯ଟି ପ୍ରଶ୍ନ ପଚାରିବା ସହ ଏହାର ଜବାବ ଓଡିଶା ମାଗୁଛି ବୋଲି କହିଥିଲେ ।ଯାହାକୁ ନେଇ ରାଜନୈତିକ ଚର୍ଚ୍ଚା ଆରମ୍ଭ ହୋଇଥିଲା । ଏପରିକି ସେବେଠାରୁ ବିଜେଡି ଓ ବିଜେପି ମଧ୍ୟରେ ବୟାନ ଯୁଦ୍ଧ ଆରମ୍ଭ ହୋଇଥିଲା । ଆଉ ଏସବୁ ଭିତରେ ଆସନ୍ତାକାଲି ପ୍ରଧାନମନ୍ତ୍ରୀ କାର୍ଯ୍ୟକ୍ରମରେ ନବୀନ ସାମିଲ ନ ହେବାକୁ ନେଇ ଅନେକ ପ୍ରଶ୍ନ ଛିଡା ହୋଇଛି ।

Comments are closed.