ନବୀନଙ୍କ ଟାର୍ଗେଟରେ ବିଜେପି ! କହିଲେ, ଫମ୍ପା ମାଠିଆର ଶବ୍ଦ ବେଶି, ଜାଣନ୍ତୁ କାହିଁକି ଏଭଳି କହିଲେ ବିଜେଡି ସୁପ୍ରିମୋ
କନକ ବ୍ୟୁରୋ : ମୁଖ୍ୟମନ୍ତ୍ରୀଙ୍କ ଟାର୍ଗେଟରେ ବିଜେପି । ସ୍ୱତନ୍ତ୍ର ରାଜ୍ୟ ପାହ୍ୟା ପ୍ରସଙ୍ଗରେ ବିଜେପିକୁ କାଠଗଡ଼ାରେ ଠିଆ କରିଛନ୍ତି ନବୀନ ପଟ୍ଟନାୟକ । ଫମ୍ପା ମାଠିଆର ଶବ୍ଦ ବେଶି କହି-ପରୋକ୍ଷରେ ମୋଦି ସରକାରଙ୍କୁ ସମାଲୋଚନା କରିଛନ୍ତି । ବିିଜେଡି ସରକାର କଥାରେ ନୁହେଁ କାମରେ ବିଶ୍ୱାସ କରେ ଏବଂ ବିଜେଡି ସାଢେ ୪ କୋଟି ଓଡିଆଙ୍କ ଭରସାର ପ୍ରତୀକ ବୋଲି ଜନସଂପର୍କ ଯାତ୍ରାରେ କହିଛନ୍ତି ମୁଖ୍ୟମନ୍ତ୍ରୀ । ଏପଟେ ମୁଖ୍ୟମନ୍ତ୍ରୀଙ୍କ ସମାଲୋଚନାର ଜବାବ ରଖିଛି ବିଜେପି । କେବଳ ରାଜନୀତି କରିବାକୁ ୨୦୦୯ରୁ ନବୀନ ଏହି ପ୍ରସଙ୍ଗ ଉଠାଇ ଆସୁଥିବା ପାଲଟା ଅଭିଯୋଗ କରିଛି ଭାରତୀୟ ଜନତା ପାର୍ଟି ।
Kanak News is now on WhatsApp
Join and get latest news updates delivered to you via WhatsApp
ପ୍ରତିବର୍ଷ ଭଳି ଗାନ୍ଧି ଜୟନ୍ତୀରୁ ମାସିକିଆ ପଦଯାତ୍ରା ଆରମ୍ଭ କରିଥିବା ବିଜେଡି କାର୍ଯ୍ୟକ୍ରମକୁ ସମ୍ବୋଧିତ କରି ବେଶ ଆକ୍ରମଣାତ୍ମକ ନଜର ଆସିଛନ୍ତି ମୁଖ୍ୟମନ୍ତ୍ରୀ । ବିଜେପିର ନାଁ ନନେଇ ଫମ୍ପା ମାଠିଆ ସହ ତୁଳନା କରିଛନ୍ତି ନବୀନ ପଟ୍ଟନାୟକ । ବିଜେଡି ସୁପ୍ରିମୋ କହିଛନ୍ତି ଫମ୍ପା ମାଠିଆର ଶବ୍ଦ ବେଶି । ୨୦୧୪ରେ ବିଜେପିର ନିର୍ବାଚନୀ ଇସ୍ତାହାରରେ ଏକ ନମ୍ବରରେ ଥିଲା ଓଡିଶାକୁ ସ୍ୱତନ୍ତ୍ର ରାଜ୍ୟ ପାହ୍ୟା ମାନ୍ୟତା । ସେହି ପ୍ରତିଶ୍ରୁତି ପୂରଣ ହୋଇନାହିଁ ଏବଂ ଓଡିଶାବାସୀ ସ୍ୱତନ୍ତ୍ର ପାହ୍ୟାକୁ ଅନାଇ ବସିଥିବା କହି ବିଜେପିକୁ କାଠଗଡାରେ ଛିଡା କରାଇଛନ୍ତି ନବୀନ ।
୨୦୧୯ ସାଧାରଣ ନିର୍ବାଚନ ପୂର୍ବରୁ ଲୋକଙ୍କ ନିକଟତର ହେବାକୁ ବିଜେଡିର ଜନ ସଂପର୍କ ପଦ ଯାତ୍ରା । ଆଉ ଏହି ଅବସରରେ ନବୀନ କହିଛନ୍ତି
– ସାଢେ ୪ କୋଟି ଓଡିଆଙ୍କ ଭରସାର ପ୍ରତିକ ବିଜେଡି ସରକାର
– ବିଜେଡି ସବୁବେଳେ ଲୋକଙ୍କ ସହ ଅଛି ଓ ଲୋକଙ୍କ ପାଇଁ କାମ କରୁଛି
– ସମସ୍ତେ ଜାଣିଛନ୍ତି କିଏ ପ୍ରତିଶ୍ରୁତି ପାଳନ କରୁଛି ଓ କିଏ କରୁନାହିଁ
– ବିଜେଡି ସବୁବେଳେ ଦେଇଆସିଥିବା ପ୍ରତିଶ୍ରୁତି ପୂରଣ କରୁଛି
– ତାଙ୍କ ସରକାର କଥାରେ ନୁହେଁ କାମରେ ବିଶ୍ୱାସ କରେ
ନିଜ ଅଭିଭାଷଣରେ ଦଳର ନେତା ଓ କର୍ମୀଙ୍କୁ ନବୀନ ସ୍ପଷ୍ଟ କରିଦେଇଛନ୍ତି ଯେ, ଚତୁର୍ଥ ପାଳିର ବିଜେଡି ସରକାରଙ୍କ ଲୋକାଭିମୁଖୀ ଯୋଜନାକୁ ନେଇ ଲୋକଙ୍କ ପାଖକୁ ଯାଅ ଓ କେନ୍ଦ୍ର ସରକାରଙ୍କ ଛଳନାର ମୁଖା ଖୋଲିଦିଅ । ବିଜେଡି ମୁଖିଆଙ୍କ ତେରେଛା ବାଣ ପରେ ଚିହିଁକି ଉଠିଛି ବିଜେପି । ଓଡିଶା ସ୍ୱତନ୍ତ୍ର ରାଜ୍ୟ ହୋଇପାରିବ ନାହିଁ ବୋଲି ଜାଣି ମଧ୍ୟ କେବଳ ରାଜନୀତି କରିବାକୁ ୨୦୦୯ରୁ ନବୀନ ଏହି ପ୍ରସଙ୍ଗ ଉଠାଇ ଆସୁଥିବା ପାଲଟା ଅଭିଯୋଗ କରିଛି ଭାରତୀୟ ଜନତା ପାର୍ଟି ।
ଗାନ୍ଧି ଜୟନ୍ତୀରେ ଭୁବନେଶ୍ୱର ଝରଣା ବସ୍ତିରୁ ଆରମ୍ଭ ହୋଇଛି ବିଜୁ ଜନତା ଦଳର ଜନ ସଂପର୍କ ପଦଯାତ୍ରା । ଆଗାମୀ ନଭମ୍ବେର ୨ ତାରିଖ ପର୍ଯ୍ୟନ୍ତ ଲୋକଙ୍କ ସହ ସଂପର୍କ ଯୋଡିବାକୁ ପ୍ରୟାସ କରିବ ଦଳ । ଆମ ଗାଁ ଆମ ବିକାଶ, ଆମ ସହର ଆମ ଉନ୍ନତି, ବିଜୁ ସ୍ୱାସ୍ଥ୍ୟ କଲ୍ୟାଣ ଯୋଜନା, ରାଜ୍ୟ ସରକାରଙ୍କ ନିଜସ୍ୱ ଖାଦ୍ୟ ସୁରକ୍ଷା ଯୋଜନା, ସହରାଂଚଳ ବସ୍ତି ବାସିନ୍ଦାଙ୍କୁ ଭୂମି ଅଧିକାର ଭଳି ଏକାଧିକ ଯୋଜନାକୁ ବିଜ୍ଞାପିତ କରିବେ ନେତା ଓ କର୍ମୀ । ଯାହାର ଆଗାମୀ ନିର୍ବାଚନରେ ଏକ ବଡ ପ୍ରଭାବ ନେଇ ଅନୁମାନ କରାଯାଉଛି ।