ଦେଶରେ ବଢିବନି ଲକଡାଉନ୍ ଅବଧି ? ୨୧ ଦିନ ପରେ ତାଲାବନ୍ଦ ଅବଧି ବୃଦ୍ଧି କରିବା ନେଇ କୌଣସି ଯୋଜନା ହୋଇନଥିବା ସ୍ପଷ୍ଟ କଲେ କେନ୍ଦ୍ର ସରକାର ।
କନକ ବ୍ୟୁରୋ : ୨୧ ଦିନ ପରେ ଦେଶରେ ଆଉ ବଢ଼ି ନପାରେ ଲକଡାଉନ୍ ଅବଧି । କେନ୍ଦ୍ର କ୍ୟାବିନେଟ ସଚିବ ଆଜି କହିଛନ୍ତି ଯେ, ସରକାର ତାଲାବନ୍ଦ ଅବଧି ବୃଦ୍ଧି କରିବା ନେଇ ବର୍ତ୍ତମାନ କୌଣସି ଯୋଜନା କରିନାହାନ୍ତି । କରୋନା ଭୂତାଣୁ ପାଇଁ ସରକାର ଆଗୁଆ ୩ ମାସ ପାଇଁ ବିଭିନ୍ନ ଘୋଷଣା କରୁଥିବା ବେଳେ ଅଧିକାଂଶ ଆଶଙ୍କା କରିଥିଲେ ଯେ, ତାଲାବନ୍ଦ ନିଷ୍ପତି ଆହୁରି ବୃଦ୍ଧି ପାଇବ । ହେଲେ ଏଭଳି ଆଶଙ୍କା ଭୁଲ ବୋଲି କହିଛନ୍ତି କେନ୍ଦ୍ର ସରକାର ।
Kanak News is now on WhatsApp
Join and get latest news updates delivered to you via WhatsApp
ସୋସିଆଲ ମିଡିଆରୁ ଆରମ୍ଭ କରି କେତେକ ପ୍ରମୁଖ ଗଣମାଧ୍ୟମରେ ଜୋରଦାର ପ୍ରଚାର ଚାଲିଥିଲା ଯେ, ୨୧ ଦିନିଆ ତାଲାବନ୍ଦକୁ ବୃଦ୍ଧି କରିପାରନ୍ତି ମୋଦି ସରକାର । ବିଶେଷ କରି ବିଭିନ୍ନ ସ୍ଥାନରେ ଫସିରହିଥିବା ଦାଦନ ଶ୍ରମିକଙ୍କ ଘରବାହୁଡା ଓ ରାଜରାସ୍ତାରେ ଭିଡ, ତାଲାବନ୍ଦକୁ ଆହୁରି ସପ୍ତାହେ ବିଳମ୍ବିତ କରିବା ଆଶଙ୍କା ବଢାଇ ଦେଇଛି । ହେଲେ ଏଭଳି ଆଶଙ୍କା ଭୁଲ ବୋଲି କହିଛନ୍ତି କେନ୍ଦ୍ର ସରକାର ।
୨୧ ଦିନ ପରେ ଦେଶରେ ଆଉ ବଢ଼ି ନପାରେ ଲକଡାଉନ ଅବଧି । କେନ୍ଦ୍ର କ୍ୟାବିନେଟ ସଚିବ ରାଜୀବ ଗୌବା ଏନେଇ ସ୍ପଷ୍ଟୀକରଣ ରଖିଥିବା ଟ୍ୱିଟ କରିଛି ପ୍ରସାର ଭାରତୀ ନ୍ୟୁଜ ସର୍ଭିସ । ପିବିଏନଏସ ଟ୍ୱିଟ କରି ଲେଖିଛି ଯେ, ଜାତୀୟ ଗଣମାଧ୍ୟମ ଦି ପ୍ରିଂଟର ଟ୍ୱିଟର ହ୍ୟାଣ୍ଡେଲରେ ଦିଆଯାଇଥିବା ଖବର ବାବଦରେ କ୍ୟାବିନେଟ ସଚିବଙ୍କ ସହ ଯୋଗାଯୋଗ କରାଯାଇଥିଲା । ସେ ଏଥିରେ ଆଶ୍ଚର୍ଯ୍ୟ ପ୍ରକାଶ କରିବା ସହ ତାଲାବନ୍ଦର ଅବଧିକୁ ବଢାଇବା ନେଇ କୌଣସି ଯୋଜନା ନାହିଁ ବୋଲି କହିଛନ୍ତି ।
୨୧ ଦିନର ଅବଧି ପରେ ପୁଣି ଲକଡାଉନ ଘୋଷଣା ହୋଇପାରେ ବୋଲି ଜୋରଦାର ଚର୍ଚ୍ଚା ଚାଲିଥିଲା । ହୁଏତ ଆପଣଙ୍କ ପାଖକୁ ମଧ୍ୟ ଏଭଳି ହ୍ୱାଟ୍ସଆପ ମେସେଜ ଆସିଥାଇପାରେ । କିନ୍ତୁ ଏହା ସଂପୂର୍ଣ୍ଣ ମିଛ ଓ ବର୍ତ୍ତମାନ କେନ୍ଦ୍ର ସରକାର ଏଭଳି କିଛି ଯୋଜନା କରିନାହାନ୍ତି ବୋଲି ସ୍ପଷ୍ଟ ହୋଇଛି ।
ବିଶ୍ୱ ମହାମାରୀ କରୋନା ଭୂତାଣୁର ମୁକାବିଲା ପାଇଁ ଗତ ସପ୍ତାହରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମାର୍ଚ୍ଚ ୨୫ରୁ ଏପ୍ରିଲ ୧୪ ପର୍ଯ୍ୟନ୍ତ ୨୧ ଦିନ ପାଇଁ ଲକଡାଉନ ଘୋଷଣା କରିଥିଲେ । ଏହି ସମୟରେ କାହାରିକୁ ଘରୁ ନବାହାରିବାକୁ ଅପିଲ କରାଯାଇଥିଲା । ଯିଏ ଯେଉଁଠି ଅଛନ୍ତି ସେହିଠାରେ ରହିବା ପାଇଁ କୁହାଯାଇଥିଲା । ହେଲେ ଅତ୍ୟାବଶ୍ୟକ ସାମଗ୍ରୀ ପାଇଁ କୁହନ୍ତୁ ଅଥବା ରାଜ୍ୟ ବାହାରେ ଫସିରହିଥିବା ଶ୍ରମିକ କଟକଣା ନମାନି ବାହାରକୁ ବାହାରି ଆସୁଥିବାରୁ ଏହି ଅବଧି ବୃଦ୍ଧ ନେଇ ଚର୍ଚ୍ଚା ବଢିଥିଲା ।
ଦିଲ୍ଲୀ ଓ ଉତ୍ତର ପ୍ରଦେଶରେ ହଜାର ହଜାର ଶ୍ରମିକ ନିଜନିଜ ଘରକୁ ଫେରିବା ଲାଗି ରାଜପଥରେ ଭିଡ ଜମାଇବାର ଦୃଶ୍ୟ ସାମ୍ନାକୁ ଆସିବା ପରେ ଏହି ଚର୍ଚ୍ଚା ଅଧିକ ବଢିଯାଇଥିଲା । ସାମାଜିକ ଦୂରତ୍ୱ ନେଇ ପ୍ରୟାସଟି ଭଣ୍ଡୁର ହୋଇଯିବା ଆଶଙ୍କାରେ ଏହାର ଅବଧି ବଢିବା ଅନୁମାନ କରାଯାଉଥିଲା ।
କରୋନା ମୁକାବିଲା ପାଇଁ ଆଇସୋଲେସନ ବା ସଙ୍ଗରୋଧ ସବୁଠାରୁ ବଡ ଆବଶ୍ୟକତା । ତେଣୁ ପ୍ରଧାନମନ୍ତ୍ରୀ ମୋଦି ୨୧ ଦିନର ଲକଡାଉନ ଘୋଷଣା କରିଛନ୍ତି । ରବିବାର ଠାରୁ ଏହାକୁ ଆହୁରି କଡାକଡି କରିବା ପାଇଁ ରାଜ୍ୟ ଓ ଜିଲ୍ଲା ସ୍ତରରେ ସୀମାଗୁଡିକ ସିଲ କରିବା ପାଇଁ କେନ୍ଦ୍ର ନିର୍ଦ୍ଦେଶ ଦେଇଛି । ଏହା ଫଳରେ ଶ୍ରମିକମାନଙ୍କର ଚଳପ୍ରଚଳକୁ ମଧ୍ୟ ବନ୍ଦ୍ କରାଯାଇଛି । ତାଲାବନ୍ଦ କାରଣରୁ ଆଶ୍ୱସ୍ତିକର ଅନୁଭବ କରୁଥିବା ଦେଶବାସୀଙ୍କୁ କେନ୍ଦ୍ରର ଏହି ନିଷ୍ପତି ବଡ ଆଶ୍ୱସ୍ତି ଦେଇଛି ।