ହାଇଦ୍ରାବାଦରେ ଜାତୀୟ ମାନବାଧିକାର କମିଶନଙ୍କ ଟିମ୍ । ଏନକାଉଣ୍ଟର ସ୍ଥଳକୁ ଯାଇ କରିବେ ତଦନ୍ତ

ଅଭିଯୁକ୍ତଙ୍କ ମୃତଦେହ ରଖାଯାଇଥିବା ମେହବୁବନଗର ହସ୍ପିଟାଲକୁ ବି କରିବେ ଗସ୍ତ । ସେପଟେ ଡିସେମ୍ବର ୯ ତାରିଖ ଯାଏ ମୃତଦେହ ସଂରକ୍ଷିତ ରଖିବାକୁ ହାଇକୋର୍ଟଙ୍କ ନିର୍ଦ୍ଦେଶ

379

କନକ ବ୍ୟୁରୋ: ହାଇଦ୍ରାବାଦ ପହଂଚିଲେ ଜାତୀୟ ମାନବାଧିକାର କମିଶନଙ୍କ ଟିମ୍ । ଏହି ଟିମ୍ ଏନକାଉଂଟର ସ୍ଥଳକୁ ଯାଇ ଅଧିକ ତଦନ୍ତ କରିବେ । ଏହାପରେ ଅଭିଯୁକ୍ତଙ୍କ ମୃତଦେହ ରଖାଯାଇଥିବା ମେହବୁବନଗର ହସ୍ପିଟାଲକୁ ବି ଗସ୍ତ କରିବେ ଜାତୀୟ ମାନବାଧିକାର କମିଶନର ସଦସ୍ୟ । ହାଇଦ୍ରାବାଦ ମହିଳା ଡାକ୍ତର ଗଣଦୁଷ୍କର୍ମ ଓ ହତ୍ୟା ଘଟଣାରେ ୪ ଅଭିଯୁକ୍ତଙ୍କୁ ଗତକାଲି ଭୋରରୁ ଏନକାଉଂଟର କରାଯାଇଛି । ସେପଟେ ଏହି ମାମଲାରେ ମୃତଦେହକୁ ସଂରକ୍ଷିତ କରି ରଖିବା ପାଇଁ ନିର୍ଦ୍ଦେଶ ଦେଇଛନ୍ତି ତେଲେଙ୍ଗାନା ହାଇକୋର୍ଟ ।

ଆସନ୍ତା ୯ ତାରିଖ ସନ୍ଧ୍ୟା ୬ଟା ପର୍ଯ୍ୟନ୍ତ ମୃତଦେହକୁ ସଂରକ୍ଷିତ ରଖିବା ପାଇଁ କହିଛନ୍ତି ହାଇକୋର୍ଟ । ଏଥିସହ ପୋଷ୍ଟମର୍ଟମର ଭିଡିଓକୁ ସିଡି କିମ୍ବା ପେନଡ୍ରାଇଭରେ ମେହବୁବନଗରର ପ୍ରିନିସପାଲ ଡିଷ୍ଟ୍ରିକ୍ଟ ଜଜଙ୍କୁ ଦେବା ପାଇଁ ନିର୍ଦ୍ଦେଶ ଦେଇଛନ୍ତି ହାଇକୋର୍ଟ । କିଛି ମାନବାଧିକାର କର୍ମୀ ଏବଂ ମହିଳା ସଂଗଠନ କରିଥିବା ଆବେଦନ ଉପରେ ଶୁଣାଣି କରି ଏହି ନିର୍ଦ୍ଦେଶ ଦେଇଛନ୍ତି ହାଇକୋର୍ଟ । ଆସନ୍ତା ୯ ତାରିଖରେ ଏହି ମାମଲାର ପରବର୍ତି ଶୁଣାଣି ହେବ । ହାଇଦ୍ରାବଦର ମହିଳା ଡାକ୍ତରଙ୍କ ସହ ଗଣଦୁଷ୍କର୍ମ ଓ ହତ୍ୟା ମାମଲାରେ ଗିରଫ ହୋଇଥିବା ୪ଅଭିଯୁକ୍ତଙ୍କୁ ନେଇ ପୁଲିସ ଘଟଣାସ୍ଥଳକୁ ଯାଇଥିବା ବେଳେ ସେଠାରୁ ସେମାନେ ଫେରାର ହେବା ପାଇଁ ଉଦ୍ୟମ କରିଥିଲେ ।

ଘଟଣାର ରିକ୍ରିଏସନ ପାଇଁ ପୁଲିସ, ଅଭିଯୁକ୍ତଙ୍କୁ ନେଇ ଘଟଣାସ୍ଥଳକୁ ଯାଇଥିଲା । ସେହି ସମୟରେ ଅଭିଯୁକ୍ତମାନେ ପୁଲିସର ବନ୍ଧୁକ ଛଡାଇ ତାଙ୍କୁ ଆକ୍ରମଣ କରିବା ସହ ସେଠାରୁ ଖସି ପଳାଇବାକୁ ଉଦ୍ୟମ କରିଥିଲେ । ଫଳରେ ପୁଲିସ ଆତ୍ମରକ୍ଷା ପାଇଁ ପ୍ରତିଆକ୍ରମଣ କରିଥିଲା ଯେଉଁଥିରେ ୪ଅଭିଯୁକ୍ତଙ୍କ ମୃତ୍ୟୁ ହୋଇଛି ।

Comments are closed.