ଉଡିବା ଲାଗି ବିିମାନରେ ନଥିଲା ଆବଶ୍ୟକୀୟ ଇନ୍ଧନ ! ଲକ୍ଷ୍ନୌରେ ଜରୁରୀ ଅବତରଣ କଲା ଭିସ୍ତାର ବିମାନ

କନକ ବ୍ୟୁରୋ : ଖରାପ ପାଗ ଯୋଗୁଁ ଅବତରଣ କରି ନ ପାରି ଦିଲ୍ଲୀ ଆକାଶରେ ଏକ ଘଣ୍ଟାରୁ ଅଧିକ କାଳ ଚକ୍କର୍ କାଟିବା ପରେ ମୁମ୍ବାଇରୁ ୧୫୩ ଜଣ ଯାତ୍ରୀ ନେଇ ଯାଇଥିବା ଭିସ୍ତାରା ବିମାନ ସେଠାରୁ ଲକ୍ଷ୍ନୌ ଓ ଲକ୍ଷ୍ନୌରୁ ପ୍ରୟାଗରାଜ ଯାଇ ପୁଣି ଲକ୍ଷ୍ନୌକୁ ଫେରି ଅବରତଣ କରିଥିଲା। ସେତେବେଳକୁ ବିମାନରେ ଆଉ ମାତ୍ର ୫ ମିନିଟ୍ ଉଡ଼ାଣ ପାଇଁ ଇନ୍ଧନ ଥିବାରୁ ପାଇଲଟ୍ ‘ମେ ଡେ’ ଆଲର୍ଟ ବଜାଇଥିଲେ। ଖରାପ ପାଗ ଯୋଗୁଁ କମ୍ ଦୃଶ୍ୟତା ଥିବାରୁ ଦିଲ୍ଲୀରେ ଅବତରଣ କରାଇ ନ ପାରି ପାଇଲଟ୍ ‘ୟୁକେ୯୪୪’ ବିମାନକୁ ଲକ୍ଷ୍ନୌ ନେଇ ଯାଇଥିଲେ, କିନ୍ତୁ ସେଠାରେ ମଧ୍ୟ ହଠାତ୍ ଦୃଶ୍ୟତା କମିଯିବାରୁ ନିରାପଦ ଅବତରଣ ସମ୍ଭବ ହୋଇ ନ ଥିଲା।

ଅପରାହ୍ଣ ୩: ୩୦ରେ ମୁମ୍ବାଇରୁ ୧୫୩ ଜଣ ଯାତ୍ରୀଙ୍କୁ ଧରି ବିମାନଟି ଉଡ଼ାଣ ଆରମ୍ଭ କରି ପ୍ରାୟ ସନ୍ଧ୍ୟା ୫ଟା ବେଳେ ଦିଲ୍ଲୀ ନିକଟବର୍ତ୍ତୀ ହୋଇଯାଇଥିଲା। ସନ୍ଧ୍ୟା ପ୍ରାୟ ୫: ୪୫ ମିନିଟରେ ବାଟ ଭାଙ୍ଗି ବିମାନଟି ଲକ୍ଷ୍ନୌ ଅଭିମୁଖେ ଏବଂ ପୁଣି ସେଠାରୁ ୫: ୪୫ରେ ପ୍ରୟାଗରାଜ ଆଡ଼କୁ ଯାଇଥିଲା। ସେଠାରୁ ଫେରି ସନ୍ଧ୍ୟା ୬: ୩୦ରେ ଲକ୍ଷ୍ନୌରେ ଅବତରଣ କରିଥିଲା। ପରେ ରାତି ପ୍ରାୟ ୧: ୦୦ ବେଳେ ସେ ବିମାନଟି ଯାଇ ଦିଲ୍ଲୀରେ ଅବତରଣ କରିଥିଲା। ମୁମ୍ବାଇରୁ ଆସିବା ବେଳେ ବିମାନରେ ଥିଲା ୮, ୫୦୦ କିଲୋ ଇନ୍ଧନ ଏବଂ ଲକ୍ଷ୍ନୌରେ ଅବତରଣ କରିବା ବେଳେ ଥିଲା ମାତ୍ର ୨୦୦ କିଲୋ ଅର୍ଥାତ୍ ମାତ୍ର ୫ ମିନିଟ୍ ଉଡ଼ାଣ ପାଇଁ। ତେଣୁ ବିମାନକୁ ଜରୁରୀ ଅବତରଣ କରାଯାଇଥିବା ନେଇ ସୂଚନା ମିଳିଛି ।