କଲେଜ କ୍ୟାମ୍ପସରେ କଡା ନିୟମ । ମୋବାଇଲ୍ ଆଣିଲେ ବହିଷ୍କାର ହେବେ ଛାତ୍ରଛାତ୍ରୀ, ପିନ୍ଧି ପାରିବେନି ରଙ୍ଗୀନ ଓ ଚିପା ଡ୍ରେସ ।
କନକ ବ୍ୟୁରୋ : କଲେଜ କ୍ୟାମ୍ପସକୁ ମୋବାଇଲ୍ ମନା । ଛାତ୍ରଛାତ୍ରୀମାନଙ୍କୁ ଶୃଙ୍ଖଳିତ କରିବା ଦିଗରେ କିଛି ଏଭଳି କଡା ପଦକ୍ଷେପ ନେଇଛନ୍ତି ବାଲୁଗାଁ ମହାବିଦ୍ୟାଳୟ କର୍ତ୍ତୃପକ୍ଷ । ଆଉ ସବୁଠାରୁ ବଡ କଥା ହେଉଛି, କଲେଜରେ ଯେଉଁ ଛାତ୍ରଛାତ୍ରୀମାନେ ମୋବାଇଲ୍ ଫୋନ୍ ବ୍ୟବହାର କରିବେ, ସେମାନଙ୍କୁ କଲେଜରୁ ବହିଷ୍କାର କରାଯିବ ।
Kanak News is now on WhatsApp
Join and get latest news updates delivered to you via WhatsApp
ତେବେ ଏଭଳି କଡା ନିଷ୍ପତ୍ତି ନେଇ କଲେଜ ଅଧ୍ୟକ୍ଷା ବିନତୀ ମଞ୍ଜରୀ ରାଉତଙ୍କ କହିବା କଥା, କିଛି ବର୍ଷ ହେବ ମହାବିଦ୍ୟାଳୟର ଛାତ୍ରଛାତ୍ରୀମାନେ ବିଶୃଙ୍ଖଳିତ ହୋଇପଡିଥିଲେ । ଯାହା ଦ୍ୱାରା ପରୀକ୍ଷାରେ ମଧ୍ୟ ଫଳାଫଳ ଭଲ ହୋଇନଥିଲା । ତେଣୁ ଛାତ୍ରଛାତ୍ରୀଙ୍କୁ ଶୃଙ୍ଖଳିତ କରିବା ଦିଗରେ ଏକ ବୈଠକ ବସିଥିଲା । ଆଲୋଚନାରେ ହୋଇଥିବା ନିଷ୍ପତ୍ତି ଅନୁଯାୟୀ, କଲେଜ ପରିସରକୁ ଛାତ୍ରଛାତ୍ରୀମାନେ ମୋବାଇଲ୍ ଫୋନ୍ ନେଇପାରିବେ ନାହିଁ । ଏହା ସହ ରଙ୍ଗୀନ ଓ ଚିପା ଡ୍ରେସ୍ ପିନ୍ଧିବାକୁ ମଧ୍ୟ ବାରଣ କରାଯାଇଥିଲା । କିନ୍ତୁ ଏହି ନିୟମ ପାଳନ କରିବାରେ ଖିଲାପ ହେବାରୁ ଏବେ ଏଭଳି କଡା ପଦକ୍ଷେପ ନେଇଛନ୍ତି କଲେଜ କର୍ତ୍ତୃପକ୍ଷ ।
ତେବେ ଏଭଳି କଡା ନିଷ୍ପତ୍ତିକୁ ନେଇ ସବୁଠାରୁ ବଡ ପ୍ରଶ୍ନ ଉଠୁଛି, ଛାତ୍ରଛାତ୍ରୀଙ୍କ ବ୍ୟକ୍ତିଗତ ଅଧିକାରକୁ କ୍ଷୁର୍ଣ୍ଣ କରୁଛନ୍ତି କି କଲେଜ୍ କର୍ତ୍ତୃପକ୍ଷ ? କଲେଜ ପରିସରରେ ଛାତ୍ରଛାତ୍ରୀମାନେ ମୋବାଇଲ୍ ବ୍ୟବହାର କଲେ ଅସୁବିଧା କେଉଁଠି ? ପରୀକ୍ଷାରେ ଫଳାଫଳ ଖରାପ ହେବା ପଛରେ, କେବଳ ଛାତ୍ରଛାତ୍ରୀମାନେ ଦାୟୀ, ନା ଶିକ୍ଷା ବ୍ୟବସ୍ଥାରେ କେଉଁଟି ତୃଟି ରହିଛି ? ମୋବାଇଲ୍ ଫୋନ୍ ନିଷେଧ କରାଗଲେ କଣ ଛାତ୍ରଛାତ୍ରୀମାନେ ପରୀକ୍ଷାରେ ଭଲ ଫଳାଫଳ କରିପାରିବେ ? ଏଭଳି କିଛି ପ୍ରଶ୍ନ ସୃଷ୍ଟି ହୋଇଥିବା ବେଳେ କଲେଜ କର୍ତ୍ତୃପକ୍ଷଙ୍କ ଏଭଳି ନିଷ୍ପତିକୁ କେତେକ ଅଭିଭାବକ ସ୍ୱାଗତ କରିଥିବା ବେଳେ, ଅନେକ ଏହାକୁ ନାପସନ୍ଦ କରିଛନ୍ତି ।
ଶିକ୍ଷା ବ୍ୟବସ୍ଥାରେ ଉନ୍ନତି ପାଇଁ ସରକାର ଅନେକ ଯୋଜନା କରୁଥିବା ବେଳେ, ଅନେକ ସ୍ଥାନରେ ସ୍ମାର୍ଟ ପଦ୍ଧତିରେ ମଧ୍ୟ ଶିକ୍ଷାଦାନ କରାଯାଉଛି । ଆଉ ଗୁରୁତ୍ୱପୂର୍ଣ୍ଣ କଥା ହେଉଛି, ଛୋଟ ଛୋଟ ପ୍ରଶ୍ନ ଠାରୁ ଆରମ୍ଭ କରି ଜଟିଳ ପ୍ରଶ୍ନର ଉତ୍ତର ମଧ୍ୟ କ୍ଷଣିକ ସମୟ ମଧ୍ୟରେ ମୋବାଇଲ୍ ଫୋନ୍ ବ୍ୟବହାର କରି ଇଣ୍ଟରନେଟ୍ ଜରିଆରେ ଜଣାଯାଇଥାଏ । ଏପରିକି ଅନଲାଇନରେ ଅନେକ ଶିକ୍ଷଣୀୟ ତଥ୍ୟ ମଧ୍ୟ ମିଳିଥାଏ । ତେବେ ସବୁକିଛି ସ୍ମାର୍ଟ ହେଉଥିବା ବେଳେ, କଲେଜ କ୍ୟାମ୍ପସରେ ମୋବାଇଲ୍ ଫୋନ୍ ବ୍ୟବହାର ଉପରେ କଟକଣା ଲଗାଇବା କେତେ ଦୂର ଠିକ୍ ? ତାକୁ ନେଇ ଏବେ ଉଠିଛି ବଡ ପ୍ରଶ୍ନ ।