କନକ ବ୍ୟୁରୋ : ପ୍ରେମ ସ୍ୱଗୀୟ, ଶାଶ୍ୱତ ତଥା ଚିରନ୍ତନ ବୋଲି କବି ମାନେ କହି ବୁଲନ୍ତି । ସୃଷ୍ଟିର ପ୍ରେମରେ ଆଦାମ ଆଉ ଇଭ ହୁଅନ୍ତୁ କିମ୍ବା ଲେଲା ମଝନୁ ବା ଆମ ସଂସ୍କୃତିର କେଦାର ଗୌରୀ ସମସ୍ତେ ପ୍ରେମର ପ୍ରତୀକ । ଏହି ପ୍ରେମ ଯେ କେବଳ ମଣିଷ ଭିତରେ ସୀମିତ ତା ନୁହେଁ ବରଂ ପ୍ରେମ ପଶୁପକ୍ଷୀ , ଜୀବଜନ୍ତୁ ଏପରିକି ହିଂସ୍ର ସରୀସୃପ ମଧ୍ୟ କରିଥାନ୍ତି । ଯାହାର ଉଦାହରଣ ଦେଖିବାକୁ ମିଳିଛି ଭଦ୍ରକ ଧୂଷୁରୀ ଥାନା ଭଟ୍ଟସାହିରେ । ଦୁଇ ନାଗ ନାଗୁଣୀଙ୍କ ସ୍ନେହ , ପ୍ରେମ ଓ ଭଲପାଇବା ସମସ୍ତଙ୍କୁ ଚକିତ କରିଛି । ଭାଲେଣ୍ଟାଇନ ସପ୍ତାହରେ ନାଗ ନାଗୁଣୀଙ୍କ ପ୍ରେମ କାହାଣୀ ସମସ୍ତଙ୍କୁ ଆଶ୍ଚର୍ଯ୍ୟ କରିଛି ।
Kanak News is now on WhatsApp
Join and get latest news updates delivered to you via WhatsApp
ଭଦ୍ରକ ଧୂଷୁରୀ ଥାନା ଭଟ୍ଟ ସାହି ମନ୍ଦିର ନିକଟରେ ଦୁଇଟି ବିଷଧର ସାପ ବୁଲୁଥିବା ଘଟଣା ସାମ୍ନାକୁ ଆସିବା ପରେ ସ୍ଥାନୀୟ ଲୋକ ଭୟଭୀତ ହୋଇଥିଲେ । ଏନେଇ ଭଦ୍ରକର ସ୍ନେକ ହେଲ୍ପ ଲାଇନ ସହ ଯୋଗାଯୋଗ କରିବା ପରେ ଘଟଣାସ୍ଥଳରେ ପହଞ୍ଚିଥିଲେ ସ୍ନେକ ହେଲ୍ପଲାଇନ ସଦସ୍ୟ ମିର୍ଜ଼ା ଅରିଫ । ପ୍ରଥମେ ଘଟଣାସ୍ଥଳରୁ ଏକ ବିରାଟକାୟ ନାଗ ସାପକୁ ଧରିବା ପରେ ଭୟଭୀତ ହୋଇଯାଇଥିଲେ ସ୍ଥାନୀୟ ବାସିନ୍ଦା ।
ତେବେ କିଛି ସମୟ ପରେ ନାଗୁଣୀକୁ ଧରିଥିଲେ ମିର୍ଜା ଅରିଫ । ତେବେ ସାପ ଦୁଇଟି ଧରା ପଡିବା ପରେ ପ୍ରତିଆକ୍ରମଣ କରିବା ବଦଳରେ ବେଶ ଶାନ୍ତ ରହିଥିଲେ । ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରିଥିଲା । କାରଣ ସାପକୁ ଧରିବା ବେଳେ ସାଧାରଣତଃ ଏମାନେ ଆକ୍ରମଣ କରିଥାନ୍ତି କିମ୍ବା ଖସିଯିବାକୁ ଉଦ୍ୟମ କରିଥାନ୍ତି । କିନ୍ତୁ ଏହି ଦୁଇ ନାଗ-ନାଗୁଣୀ ଏଭଳି ନକରି ପରସ୍ପରକୁ ବେଶ କିଛି ସମୟ ଅନାଇ ରହିଥିଲେ । ଲାଗୁଥିଲା ସତେ ଯେମିତି ବିଚ୍ଛେଦ ହେବା ପୂର୍ବରୁ ଶେଷ ଥର ପାଇଁ ଦୁହେଁ ଦୁହିଁଙ୍କୁ ଦେଖୁଛନ୍ତି । ଆଉ ଏହି ଦୁଇ ସାପଙ୍କର ଏଭଳି ହରକତ ଦେଖି ସାଧାରଣ ଲୋକଙ୍କ ମଧ୍ୟରେ ବେଶ ଉତ୍ସାହ ଦେଖିବାକୁ ମିଳିଥିଲା ।
ସ୍ନେକ ହେଲ୍ପ ଲାଇନ ସଦସ୍ୟ ସାପଙ୍କୁ ଧରିଥିଲେ ମଧ୍ୟ ଏମାନେ ଏହାକୁ ବୋଧହୁଏ ଖାତିର କରିନଥିଲେ । ବେଶ କିଛି ସମୟ ଶାନ୍ତ ରହିବା ସହ ପ୍ରେମର ଆବିଳତା ମଧ୍ୟରେ ନିଜକୁ ବାନ୍ଧି ରଖିଥିଲେ । ନା ଏମାନେ ଚୋଟ ମାରିବାକୁ ପ୍ରୟାସ କରୁଥିଲେ ନା ପରସ୍ପରକୁ ଛାଡିବାକୁ ଚାହୁଁଥିଲେ । ତେବେ ଏଭଳି ଦୃଶ୍ୟ ସ୍ନେକ ହେଲ୍ପଲାଇନ ସଦସ୍ୟଙ୍କୁ ମଧ୍ୟ ଆଶ୍ଚଯ୍ୟ କରିଛି । ମିର୍ଜା ଅରିଫଙ୍କ କହିବା ଅନୁଯାୟୀ, ଏଭଳି କେତେ ସାପ ଧରିଛି । ସାପକୁ ଧରିବା ମାତ୍ରେ ଏମାନେ ହିଂସ୍ର ହୋଇ ଚୋଟ ପରେ ଚୋଟ ମାରିଥାନ୍ତି । କିନ୍ତୁ ସାପଙ୍କ ମଧ୍ୟରେ ଏଭଳି ଲକ୍ଷଣ ପୂର୍ବରୁ କେବେ ଦେଖିନାହିଁ । ଲାଞ୍ଜକୁ ଧରିବା ପରେ ମଧ୍ୟ ଏହି ଯୋଡି ଖସିଯିବାକୁ ଉଦ୍ୟମ କରିନଥିଲେ । ସ୍ଥିର ହୋଇ ରହିବା ସହ ବେଶ କିଛି ସମୟ ପରସ୍ପରକୁ ଚାହିଁ ରହିଥିଲେ । ଏଭଳି ଘଟଣା ଜୀବନରେ ପ୍ରଥମ ଥର ପାଇଁ ଦେଖିଛି ବୋଲି କହିଛନ୍ତି ମିର୍ଜା । ଏହା ବୋଧହୁଏ ପ୍ରେମ ବୋଲି କହିଛନ୍ତି ମିର୍ଜା ଅରିଫ୍ । ତେବେ ଭାଲେଣ୍ଟାଇନ ସପ୍ତାହରେ ଯେତେବେଳେ ମଣିଷ ପ୍ରେମରେ ମସଗୁଲ ରହିଛି ସେତେବେଳେ ଏହି ଦୁଇ ସାପଙ୍କ ପ୍ରେମରେ ବ୍ରେକଅପ ହେବ ବା କେମିତି । ସାପ ଦୁଇଟିକୁ ଧରିବା ପରେ ଜଙ୍ଗଲରେ ଛାଡି ଦେଇଛନ୍ତି ମିର୍ଜା ଅରିଫ୍ ।