କନକ ବ୍ୟୁରୋ: ଦୀର୍ଘ ଦିନର ଛାକପଞ୍ଝା ପରେ ବ୍ରଜରାଜନଗର ବିଧାନସଭା ଆସନ ପାଇଁ ପ୍ରାର୍ଥୀ ଘୋଷଣା କଲା ବିଜେଡି । ଅନୁପ ସାଏଙ୍କ ବଦଳରେ କିଶୋର ମହାନ୍ତିଙ୍କୁ ଟିକେଟ୍ ଦେଇଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ । ଝାରସୁଗୁଡ଼ାରୁ ନବଦାସଙ୍କୁ ଟିକେଟ୍ ଦେବାପରେ କିଶୋରଙ୍କୁ କିପରି ଥଇଥାନ କରାଇବେ ତାହାକୁ ନେଇ କଳ୍ପନାଜଳ୍ପନା ଲାଗି ରହିଥିଲା । ଏଥିରେ ପୂର୍ଣ୍ଣଛେଦ ପକାଇ ଶେଷରେ ବ୍ରଜରାଜନଗର ବିଜେଡିର ମଙ୍ଗ କିଶୋରଙ୍କ ହାତରେ ଦେଇଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ ।
Kanak News is now on WhatsApp
Join and get latest news updates delivered to you via WhatsApp
ସେପଟେ ଗତ ୨୦୧୪ ନିର୍ବାଚନରେ ବିଜେଡି ତରଫରୁ ପ୍ରାର୍ଥୀ ହୋଇଥିବା ଅନୁପ ସାଏଙ୍କୁ ଏଥର ଟିକେଟ୍ ରେସରୁ ବାଦ କରିଛନ୍ତି ସୁପ୍ରିମୋ । ଯଦି ପୂର୍ବ ନିର୍ବାଚନ ଫଳାଫଳକୁ ଅନୁଧ୍ୟାନ କଲେ, ୨୦୧୪ ନିର୍ବାଚନ ପୂର୍ବରୁ କଂଗ୍ରେସ ଦଳରୁ ଇସ୍ତଫା ଦେଇ ଶାସକ ବିଜେଡ଼ି ଦଳରେ ଯୋଗଦେଇ ବିଜେଡ଼ି ଟିକେଟରେ ପ୍ରତିଦ୍ବନ୍ଦିତା କରିଥିଲେ । ଏବଂ ଅନୁପ ବିଜେପିର ରାଧାରାଣୀ ପଣ୍ଡାଙ୍କୁ କଡ଼ା ଟକ୍କର ଦେଇଥିଲେ ମଧ୍ୟ ୬ ହଜାର ୭ ଶହ ଭୋଟ ବ୍ୟବଧାନରେ ରାଧାରାଣୀଙ୍କ ଠାରୁ ପରାସ୍ତ ହୋଇଥିଲେ ।
ଝାରସୁଗୁଡ଼ା ଜିଲ୍ଲାର ଚର୍ଚ୍ଚିତ ନିର୍ବାଚନମଣ୍ଡଳୀ ମଧ୍ୟରୁ ବ୍ରଜରାଜନଗର ବିଧାନସଭା ନିର୍ବାଚନମଣ୍ଡଳୀ ସବୁବେଳେ ଚର୍ଚ୍ଚାରେ ରହି ଆସିଛି । ଏଥର କିଶୋରଙ୍କୁ ସନ୍ତୁଷ୍ଟ କରିବା ପାଇଁ ବ୍ରଜରାଜନଗର ଟିକେଟ୍ ଦେଇଛନ୍ତି ନବୀନ ବୋଲି ଚର୍ଚ୍ଚା ହେଉଛି । ତେବେ ପଶ୍ଚିମ ଓଡ଼ିଶା ବିକାଶ ପରିଷଦ ଅଧ୍ୟକ୍ଷ କିଶୋର ମହାନ୍ତିଙ୍କ ଦବଦବା ଏଠାରେ ମଧ୍ୟ ବେଶ୍ ରହିଥିବା ଯୋଗୁଁ ନବୀନ ଅନୁପଙ୍କୁ ବାଦ୍ ଦେଇ କିଶୋରଙ୍କୁ ବାଛିଛନ୍ତି ବୋଲି ବିଜେଡି ଶିବିରରେ ଆଲୋଚନା ହେଉଛି । ଅନ୍ୟପଟେ ଟିକେଟ୍ ପାଇନଥିବା ଅନୁପ ସାଏଙ୍କ ଥଇଥାନ ବିଜେଡି ସୁପ୍ରିମୋ କିଭଳି କରିବେ ତାହାକୁ ନେଇ ଏବେ ସସପେନ୍ସ ଜାରି ରହିଛି ।