ଚାଷୀ ଆକାଉଂଟକୁ ଆସିଲା କାଳିଆ ଟଙ୍କା ! ଗୋଟିଏ ଦିନରେ ୧୨ ଲକ୍ଷ ୪୫ ହଜାର ଚାଷୀଙ୍କୁ ପଠାଗଲା ୬୬୨କୋଟି, ନବୀନ କହିଲେ କାଳିଆ ଯାତ୍ରାକୁ ରୋକିପାରିବେନି କେହି ।
କନକ ବ୍ୟୁରୋ : ପ୍ରଥମ ଦିନରେ ହିଁ ଚାଷୀଙ୍କ ପାଖରେ ପହଂଚିଛି କାଳିଆ ଟଙ୍କା । ପୁରୀ ଚାଷୀ ସମାବେଶରେ ମୁଖ୍ୟମନ୍ତ୍ରୀ ଚାଷୀଙ୍କୁ ଆର୍ଥିକ ପ୍ରୋତ୍ସାହନ ରାଶି ପଠାଇବାର କାର୍ଯ୍ୟକ୍ରମ ଆରମ୍ଭ କରିଥିବା ବେଳେ ସନ୍ଧ୍ୟା ସୁଦ୍ଧା ରାଜ୍ୟର ୧୨ ଲକ୍ଷ ୪୫ ହଜାର ଚାଷୀଙ୍କ ଖାତାରେ ପହଂଚି ଯାଇଛି କାଳିଆ ଟଙ୍କା । ଡିବିଟି ମାଧ୍ୟମରେ ୬ ଶହ ୬୨ କୋଟି ଟଙ୍କା ଚାଷୀଙ୍କ ଆକାଉଂଟକୁ ପଠାଇଛନ୍ତି ରାଜ୍ୟ ସରକାର । ସରକାରଙ୍କ ପାଖରେ ଥିବା ୧୦ ଲକ୍ଷ ୫୦ ହଜାର ଚାଷୀଙ୍କ ମୋବାଇଲ ନମ୍ବରକୁ ଟଙ୍କା ପହଂଚାଯାଇଥିବା ନେଇ ମେସଜ୍ ମଧ୍ୟ ପଠାଯାଇଛି । ଏପଟେ ମୁଖ୍ୟମନ୍ତ୍ରୀ କହିଛନ୍ତି-କାଳିଆ ଯାତ୍ରାକୁ କେହି ରୋକିପାରିବେ ନାହିଁ ।
Kanak News is now on WhatsApp
Join and get latest news updates delivered to you via WhatsApp
କାଳିଆ ଯାତ୍ରାକୁ କେହି ରୋକିପାରିବେ ନାହିଁ ବୋଲି ମୁଖ୍ୟମନ୍ତ୍ରୀ ଦୃଢ଼ୋକ୍ତି ପ୍ରକାଶ କରିବା ସହ ଚାଷୀଙ୍କୁ ପ୍ରୋତ୍ସାହିତ କରିବା ପାଇଁ ଦେଇଛନ୍ତି ଅଭୟବାଣୀ । କାଳିଆ ଯୋଜନାରେ ଚାଷୀଙ୍କୁ ଆର୍ଥିକ ପ୍ରୋତ୍ସାହନ ତଥା ସହାୟତା ରାଶି ଯୋଗାଇ ଦେବାର ପ୍ରକ୍ରିୟାକୁ ପୁରୀ ଚାଷୀ ସମାବେଶରେ ଆରମ୍ଭ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଏହି ଯୋଜନା କେବଳ ଯେ, ଓଡ଼ିଶାର ଅର୍ଥନୀତିକୁ ବୃଦ୍ଧି କରିବ ନାହିଁ ବରଂ ୩ ବର୍ଷରେ ୬ଟି ଋତୁ ପାଇଁ ଚାଷୀଙ୍କ ଚାଷ କାର୍ଯ୍ୟକୁ ସୁନିଶ୍ଚିତ କରିବ ବୋଲି କହିଛନ୍ତି ମୁଖ୍ୟମନ୍ତ୍ରୀ । ଏହି କାଳିଆ ଯୋଜନାରେ,
– ଖରିଫ ପାଇଁ ଅକ୍ଷୟ ତୃତୀୟ ଦିନ ଚାଷୀଙ୍କୁ ମିଳିବ ୫ ହଜାର ଟଙ୍କା
– ରବି ଫସଲ ପାଇଁ ନୂଆଁଖାଇ ଦିନ ମିଳିବ ଆଉ ୫ ହଜାର ଟଙ୍କା
ଏସବୁ ଭିତରେ ଯୋଜନାର ନାଁ କାଳିଆ କାହିଁକି ରଖାଗଲା ତାହା ବି ସ୍ପଷ୍ଟ କରିଛନ୍ତି ମୁଖ୍ୟମନ୍ତ୍ରୀ । ଯୋଜନାର ପ୍ରଥମ ପର୍ଯ୍ୟାୟର ୧୦ ଜଣ ହିତାଧିକାରୀକାରୀଙ୍କୁ କାଳିଆ ସହାୟତାପତ୍ର ପ୍ରଦାନ କରିଥିଲେ ମୁଖ୍ୟମନ୍ତ୍ରୀ । ଯେଉଁଥିରେ ଥିଲେ ରାଜ୍ୟର କୋଣ ଅନୁକୋଣରୁ ଆସିଥିବା ଚାଷୀ ।
ରାଜ୍ୟର ୯୨ ପ୍ରତିଶତ ଚାଷୀ ଏହି କାଳିଆ ଯୋଜନାରେ ଉପକୃତ ହେବାକୁ ଥିବା ବେଳେ ପ୍ରଥମ ପର୍ଯ୍ୟାୟରେ ଟଙ୍କା ଆସିବା ଆରମ୍ଭ ହେବା ପରେ ରାଜ୍ୟବାପୀ ଖୁସି ଜାହିର କରିଛନ୍ତି ଚାଷୀ । ଏମିତିକି ଚାଷୀଙ୍କ ମୋବାଇଲକୁ ପହଂଚିବାରେ ଲାଗିଛି ମ୍ୟାସେଜ୍ । ଆଜିଠାରୁ ରାଜ୍ୟର ୧୨ ଲକ୍ଷ ୪୫ ହଜାର ଚାଷୀଙ୍କ ଖାତାକୁ ଡିବିଟି ମାଧ୍ୟମରେ ସିଧାସଳଖ ୫ ହଜାର ଟଙ୍କା ଯିବା ପ୍ରକ୍ରିୟା ଆରମ୍ଭ ହୋଇଛି । ଆସନ୍ତାକାଲିଠୁ ପର୍ଯ୍ୟାୟକ୍ରମେ ଯୋଗ୍ୟ ହିତାଧିକାରୀଙ୍କ ପାଖକୁ ପହଂଚିବ କାଳିଆ ଟଙ୍କା ।