ଲୋକଙ୍କ ମନ ଜଣିବାକୁ କଂଗ୍ରେସ ପ୍ରଭାରୀଙ୍କ ନୂଆ ଫର୍ମୁଲା ! ଏସି ଗାଡି ଛାଡି ସିଟି ବସରେ ଗଲେ ଜିତେନ୍ଦ୍ର ସିଂହ, ରାଜ୍ୟ କଂଗ୍ରେସର ସ୍ଥିତି ନେଇ ଲୋକଙ୍କ ସହ କଲେ ଆଲୋଚନା
କନକ ବ୍ୟୁରୋ : ଲୋକଙ୍କ ପାଖରେ ପହଞ୍ଚିବାକୁ ଓଡିଶା କଂଗ୍ରେସ ପ୍ରଭାରୀ ଜିତେନ୍ଦ୍ର ସିଂଙ୍କ ଭିନ୍ନ ପ୍ରୟାସ । ଆଉ ଏଥିପାଇଁ ଏସି ଗାଡି ଛାଡି ସିଟି ବସରେ ଯାତ୍ରା କରିଛନ୍ତି ଜିତେନ୍ଦ୍ର । ଓଡିଶାରେ କଂଗ୍ରେସର ସ୍ଥିତି କଣ , ଲୋକ ମାନଙ୍କ ମନରେ କଂଗ୍ରେସ ପ୍ରତି କଣ ଧାରଣା ରହିଛି ଜାଣିବା ପାଇଁ ଜିତେନ୍ଦ୍ର ସିଟି ବସରେ ଯାତ୍ରା କରିଥିଲେ । ଆଉ ଜିତେନ୍ଦ୍ରଙ୍କୁ ପାଖରେ ଦେଖି ସିଟି ବସରେ ଯାତ୍ରା କରୁଥିବା ଯାତ୍ରୀ ମାନେ ମଧ୍ୟ ଆଶ୍ଚର୍ଯ୍ୟ ହୋଇ ଯାଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ଘଟଣା ଅନୁଯାୟୀ, ୨୦୧୯ ନିର୍ବାଚନ ପାଇଁ ରାଜ୍ୟ କଂଗ୍ରେସର ମାରାଥନ ବୈଠକ ଚାଲିଥିବା ବେଳେ ଓଡିଶାରେ ଡେରା ପକାଇଛନ୍ତି ଜିତେନ୍ଦ୍ର । ପ୍ରାର୍ଥୀ ତାଲିକା ଠାରୁ ଆରମ୍ଭ କରି ସଙ୍ଗଠନ ସଜାଡିବା ପାଇଁ ଚାଲିଛି ଜୋରଦାର ଉଦ୍ୟମ । ଆଉ ଏହି କ୍ରମରେ ଆଜି କଂଗ୍ରେସ ଭବନରେ ପ୍ରଦେଶ ନିର୍ବାଚନ କମିଟିର ବସିଥିଲା ଦ୍ୱିତୀୟ ବୈଠକ । ତେବେ ବୈଠକ ପୂର୍ବରୁ ପ୍ରଭାରୀ ଜିତେନ୍ଦ୍ରଙ୍କୁ ଆଣିବା ପାଇଁ ସକାଳୁ ଗାଡି ପହଞ୍ଚିଥିଲା କ୍ରାଉନ ହୋଟେଲ ସାମ୍ନାରେ । କିନ୍ତୁ ଏସି ଗାଡି ପରିବର୍ତ୍ତେ ସିଟି ବସରେ ଏକାକୀ ଚଢିଥିଲେ ଜିତେନ୍ଦ୍ର ।
ଓଡିଶାରେ ସାଧାରଣ ଲୋକଙ୍କ ସମସ୍ୟା କଣ ରହିଛି । କଂଗ୍ରେସ ଠାରୁ ଲୋକ କଣ ଆଶା ରଖିଛନ୍ତି, ଓଡିଶାରେ କଂଗ୍ରେସର ସ୍ଥିିତି କଣ ତାହା ଜାଣିବା ପାଇଁ ସିଟି ବସରେ ଚଢିଥିଲେ ଜିତେନ୍ଦ୍ର । ଏପରିକି ନିଜ ସାଥୀରେ କୌଣସି କଂଗ୍ରେସ ନେତାଙ୍କୁ ମଧ୍ୟ ଯିବାକୁ ମନା କରିଥିଲେ ଜିତେନ୍ଦ୍ର । ଆଉ ବସରେ ଜିତେନ୍ଦ୍ରଙ୍କୁ ଦେଖି ଲୋକମାନେ ଆଶ୍ଚଯ୍ୟ ହୋଇଯାଇଥିଲେ । ତେବେ ଯାତ୍ରା ସମୟରେ ସାଧାରଣ ଲୋକଙ୍କ ଭଳି ଯାତ୍ରୀ ମାନଙ୍କ ସହ ଓଡିଶା ରାଜନୀତିକୁ ନେଇ ଆଲୋଚନା ପରେ କଂଗ୍ରେସ ଭବନ ନିକଟରେ ଓହ୍ଲାଇଥିଲେ ଜିତେନ୍ଦ୍ର । ସିଟି ବସରୁ ଜିତେନ୍ଦ୍ରଙ୍କୁ ଓହ୍ଲାଇବା ଦେଖି କଂଗ୍ରେସ ନେତା ମାନେ ମଧ୍ୟ ତାଜୁବ ହୋଇ ଯାଇଥିଲେ । ଆଉ ଏହାକୁ ନେଇ କଂଗ୍ରେସ ଶିବିରରେ ଆରମ୍ଭ ହୋଇଥିଲା ଚର୍ଚ୍ଚା । ପୂର୍ବରୁ ଜିତେନ୍ଦ୍ର ଉପା ସରକାର ସମୟରେ ପ୍ରତିରକ୍ଷା ଏବଂ କ୍ରୀଡା ଓ ଯୁବ ବ୍ୟାପାର ମନ୍ତ୍ରୀ ଭାବେ ସ୍ୱାଧୀନ ଦାୟିତ୍ୱ ତୁଲାଇଛନ୍ତି । ଏପରିକି ରାହୁଲ ଗାନ୍ଧୀଙ୍କର ଘନିଷ୍ଠ ସହଯୋଗୀ ଭାବେ ଜିତେନ୍ଦ୍ର ଜଣାଶୁଣା । ଖାସ୍ ସେଥିପାଇଁ ଜିତେନ୍ଦ୍ରଙ୍କୁ ଓଡିଶା କଂଗ୍ରେସର ଦାୟିତ୍ୱ ଦେଇଛନ୍ତି ରାହୁଲ । ଆଉ ୨୦୧୯ରେ କଂଗ୍ରେସ ଯେପରି ଅଧିକରୁ ଅଧିକ ଆସନ ଜିତିବ ସେଥିପାଇଁ ଦିନରାତି ଏକ କରି ଦେଇଛନ୍ତି ଜିତେନ୍ଦ୍ର ସିଂ ।