ଜୟଲଳିତାଙ୍କ ମୃତ୍ୟୁକୁ ନେଇ ସନ୍ଦେହ ପ୍ରକଟ କଲେ ମାଡ୍ରାସ ହାଇକୋର୍ଟ
କନକ ବ୍ୟୁରୋ : ତାମିଲନାଡୁର ପୂର୍ବତନ ମୁଖ୍ୟମନ୍ତ୍ରୀ ଜୟଳଳିତାଙ୍କ ମୃତ୍ୟୁକୁ ନେଇ ସସପେନ୍ସ । ଜୟାଙ୍କ ମୃତ୍ୟୁକୁ ନେଇ ସନ୍ଦେହ ପ୍ରକାଶ କରିଛନ୍ତି ମାଡ୍ରାସ ହାଇକୋର୍ଟ । ଅଧିକ ତଦନ୍ତ ପାଇଁ ଜୟାଲଳିତାଙ୍କ ଶବକୁ କବର ଖୋଳି କାହିଁକି ବାହାର କରାଯାଇପାରିବ ନାହିଁ ବୋଲି ମାଡ୍ରାସ ହାଇକୋର୍ଟ ପ୍ରଶ୍ନ କରିଛନ୍ତି । ଏନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, କେନ୍ଦ୍ର ସରକାର ଓ ରାଜ୍ୟ ସରକାରଙ୍କ ସମେତ ଅନ୍ୟାନ୍ୟଙ୍କୁ ନୋଟିସ୍ ଜାରି କରିଛନ୍ତି ଉଚ୍ଚତମ ନ୍ୟାୟାଳୟ।
Kanak News is now on WhatsApp
Join and get latest news updates delivered to you via WhatsApp
ଡାକ୍ତରଖାନାରେ ପାଖାପାଖି ୭୫ଦିନ ଚିକିତ୍ସାରେ ରହିବା ପରେ ଡିସେମ୍ବର ୫ତାରିଖରେ ଜୟାଙ୍କୁ ମୃତ ଘୋଷଣା କରାଯାଇଥିଲା । ତେବେ ଏହି ସମୟରେ ତାଙ୍କ ସ୍ୱାସ୍ଥ୍ୟାବସ୍ଥା ସମ୍ପର୍କରେ ସମସ୍ତ ତଥ୍ୟ ଗୋପନ ରଖାଯାଇଥିବାକୁ ନାପସନ୍ଦ କରିଛନ୍ତି ମାଡ୍ରାସ ହାଇକୋର୍ଟର ଅବକାଶକାଳୀନ ଖଣ୍ଡପୀଠ ।
ଏଆଇଏଡିଏମକେ କର୍ମୀ ପି.ଏ ଜୋଶେଫ କରିଥିବା ମାମଲାର ଶୁଣାଣି ସମୟରେ ଏହା କହିଛନ୍ତି ବିଚାରପତି ଏସ୍.ବୈଦ୍ୟନାଥନ ଓ ବିଚାରପତି ପାର୍ଥିବନଙ୍କ ଦ୍ୱାରା ଗଠିତ ଅବକାଶକାଳୀନ ଖଣ୍ଡପୀଠ ।
ଜୟଲଳିତାଙ୍କ ସ୍ୱାସ୍ଥ୍ୟାବସ୍ଥାରେ ଉନ୍ନତି ହେଉଥିବା ଗଣମାଧ୍ୟମରେ ଖବର ପ୍ରକାଶ ପାଇଥିଲା । ଡାକ୍ତରଖାନାରେ ସେ ବୈଠକରେ ମଧ୍ୟ ସାମିଲ ହେଉଥିଲେ ତେବେ ହଠାତ୍ କେମିତି ତାଙ୍କ ମୃତ୍ୟୁ ହେଲା ବୋଲି ମଧ୍ୟ ଖଣ୍ଡପୀଠ କହିଛନ୍ତି ।
ଏପରିକି ତାଙ୍କ ମୃତ୍ୟୁ ପରେ କୌଣସି ମେଡିକାଲ ରେକର୍ଡ ମଧ୍ୟ ଉପଲବ୍ଧ କରାଯାଇନଥିଲା । ୧୯୮୦ରେ ତାମିଲନାଡୁର ତତ୍କାଳୀନ ମୁଖ୍ୟମନ୍ତ୍ରୀ ଏମ.ଜି ରାମାଚନ୍ଦ୍ରନ ମଧ୍ୟ ଦୀର୍ଘ ଦିନ ଧରି ଡାକ୍ତରଖାନାରେ ଚିକିତ୍ସିତ ହେବା ପରେ ତାଙ୍କର ମୃତ୍ୟୁ ହୋଇଥିଲା ।
ମାମଲାର ଶୁଣାଣି ସମୟରେ ଏହି ଘଟଣାକୁ ମନେ ପକାଇଥିଲେ ବିଚାରପତି । ଏହି ମାମଲାର ପରବର୍ତୀ ଶୁଣାଣିକୁ ଜାନୁଆରୀ ୯ତାରିଖକୁ ସ୍ଥଗିତ କରାଯାଇଛି ।